ಅಕ್ವೈರ್ಡ್ ಇಮ್ಯೂನ್ ಡಿಫಿಷಿಯನ್ಸಿ ಸಿಂಡ್ರೊಮ್ (ಆರ್ಜಿತ ರೋಗ ನಿರೋಧಕ ಶಕ್ತಿ ಹೀನತೆ) ಅಥವಾ ಅಕ್ವೈರ್ಡ್ ಇಮ್ಯುನೊ ಡಿಫಿಷಿಯನ್ಸಿ ಸಿಂಡ್ರೊಮ್ (AIDS ) ಮಾನವನ ನಿರೋಧಕ ವ್ಯವಸ್ಥೆಯ ರೋಗವಾಗಿದ್ದು, ಇದು ಹ್ಯೂಮನ್ ಇಮ್ಯುನೊ ಡಿಫಿಷಿಯನ್ಸಿ ವೈರಸ್ (HIV)(ಮಾನವನ ನಿರೋಧಕ ವ್ಯವಸ್ಥೆಯನ್ನು ಶಕ್ತಿ ಹೀನವಾಗಿ ಮಾಡುವ ವೈರಸ್)ನಿಂದಾಗಿ ಬರುತ್ತದೆ.[೧][೨][೩]
ಈ ಸ್ಥಿತಿಯು ಮಾನವನ ನಿರೋಧಕ ವ್ಯವಸ್ಥೆಯನ್ನು ಕ್ರಮೇಣವಾಗಿ ಬಲಹೀನಗೊಳಿಸುವುದು ಮತ್ತು ಇದರಿಂದಾಗಿ ವ್ಯಕ್ತಿಗಳಿಗೆ ಬೇಗನೆ ಇತರೆ ಅವಕಾಶವಾದಿ ಸೋಂಕುಗಳು ಮತ್ತು ಗಡ್ಡೆ ರೋಗಗಳು ಅಂಟಿಕೊಳ್ಳುತ್ತವೆ. ಲೋಳೆಯ ಪೊರೆಯ ನೇರ ಸಂಪರ್ಕಕ್ಕೆ ಬರುವುದರಿಂದ ಅಥವಾ ದೈಹಿಕ ದ್ರವಗಳಾದ ರಕ್ತ, ವೀರ್ಯ, ಯೋನಿ ದ್ರವ, ವೀರ್ಯ, ಮತ್ತು ಸ್ತನ ಹಾಲುರಕ್ತದ ಜೊತೆಗೆ ಸೇರಿಕೊಳ್ಳುವುದರಿಂದ HIV ಹರಡುತ್ತದೆ. [೪][೫]
ಗುದದ್ವಾರ, ಯೋನಿ ಅಥವಾ ಮುಖ ಸಂಭೋಗ, ರಕ್ತ ದಾನ, ಚರ್ಮದಡಿಯಲ್ಲಿ ಚುಚ್ಚುಮದ್ದು ಕೊಡಲು ಬಳಸುವ ಕಲುಷಿತ ಸೂಜಿಗಳು, ಗರ್ಭಿಣಿಯಾಗಿದ್ದಾಗ ತಾಯಿ ಮತ್ತು ಮಗುವಿನ ನಡುವಣ ವಿನಿಮಯ, ಶಿಶು ಜನನ, ಸ್ತನ್ಯಪಾನ ಅಥವಾ ಮೇಲಿನ ಇತರಾವುದೇ ರೀತಿಯಲ್ಲಿ ದೈಹಿಕ ದ್ರವದ ಸಂಪರ್ಕಕ್ಕೆ ಬರುವುದರಿಂದಲೂ ಏಡ್ಸ್ ತಗುಲಬಹುದು. AIDS ಈಗ ಸರ್ವವ್ಯಾಪಿ ರೋಗವಾಗಿದೆ.[೬] ಜಗತ್ತಿನಾದ್ಯಂತ ಸುಮಾರು 33.2 ದಶಲಕ್ಷ ಜನರು ಈ ರೋಗದಿಂದ ಬಳಲುತ್ತಿದ್ದಾರೆ ಎಂದು 2007ರಲ್ಲಿ ಅಂದಾಜು ಮಾಡಲಾಗಿದೆ, ಮತ್ತು 330,000 ಮಕ್ಕಳು ಸೇರಿದಂತೆ 2.1 ದಶಲಕ್ಷ ಜನರು AIDS ಮಹಾಮಾರಿಯಿಂದ ಸತ್ತಿದ್ದಾರೆಂದು ಅಂದಾಜು ಮಾಡಲಾಗಿದೆ.[೭] ಈ ಪೈಕಿ ಮೂರುಕಾಲು ಭಾಗಕ್ಕಿಂತಲೂ ಹೆಚ್ಚು ಸಾವುಗಳು ಆಫ್ರಿಕಾ ಉಪ-ಸಹರಾ[೭]ಭೂಭಾಗದಲ್ಲಿ ಸಂಭವಿಸಿದ್ದು, ಇದು ಅಲ್ಲಿನ ಆರ್ಥಿಕ ಬೆಳವಣಿಗೆಯನ್ನು ಕುಂಠಿತಗೊಳಿಸಿದೆ ಮತ್ತು ಮಾನವ ಸಂಪನ್ಮೂಲವನ್ನು ನಾಶಪಡಿಸಿದೆ.[೮]
ಹತ್ತೊಂಬತ್ತನೆ ಶತಮಾನದ ಕೊನೆ ಅಥವಾ 20ನೆ ಶತಮಾನದ ಆದಿಯಲ್ಲಿ ಪಶ್ಚಿಮ-ಕೇಂದ್ರ ಆಫ್ರಿಕಾದಲ್ಲಿ HIV ಹುಟ್ಟಿಕೊಂಡಿತು ಎಂದು ಜೀನುಗಳ ಕುರಿತ ಸಂಶೋಧನೆಗಳು ತಿಳಿಸಿವೆ.[೯] [೧೦] 1981ರಲ್ಲಿ U.S.ನ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಶನ್‌ AIDSನ್ನು ಮೊದಲು ಗುರುತಿಸಿದವು ಮತ್ತು ಅದಕ್ಕೆ ಕಾರಣವಾದ HIVಯನ್ನು 1980ರ ಆರಂಭದಲ್ಲೇ ಗುರುತಿಸಲಾಗಿತ್ತು.[೧೧]
AIDS ಮತ್ತು HIVಗಿರುವ ಚಿಕಿತ್ಸೆಗಳು, ರೋಗದ ವೇಗವನ್ನು ನಿಧಾನಿಸಬಹುದು, ಆದರೆ ಈ ರೋಗವನ್ನು ಗುಣಪಡಿಸುವ ಯಾವುದೇ ಲಸಿಕೆಗಳು ಅಥವಾ ಔಷಧಗಳಾಗಲಿ ಸದ್ಯಕ್ಕೆ ಇಲ್ಲ. HIV ಸೋಂಕಿನಿಂದಾಗಿ ಸಂಭವಿಸುವ ಸಾವುಗಳು ಮತ್ತು ರೋಗ ಹರಡಿಕೆಯನ್ನು ಆಂಟಿರೆಟ್ರೋವೈರಲ್ ಚಿಕಿತ್ಸೆಯು ಕಡಿಮೆಗೊಳಿಸಿದರೂ, ಈ ಔಷಧಗಳು ದುಬಾರಿಯಾಗಿವೆ ಮತ್ತು ಎಲ್ಲ ದೇಶಗಳಲ್ಲಿ ಆಂಟಿರೆಟ್ರೋವೈರಲ್ ಔಷಧ ನಿತ್ಯ ಲಭ್ಯವಿಲ್ಲ. [೧೨]
HIV ಸೋಂಕಿಗೆ ಚಿಕಿತ್ಸೆ ನೀಡುವುದು ಕಷ್ಟಕರವಾಗಿರುವುದರಿಂದ, ಸೋಂಕು ತಗುಲದಂತೆ ಮುನ್ನೆಚ್ಚರಿಕೆವಹಿಸುವುದೇ AIDS ನಿಯಂತ್ರಣದ ಪ್ರಮುಖ ಗುರಿ, ಅಲ್ಲದೆ ವೈರಸ್ ಹರಡುವುದನ್ನು ನಿಧಾನಿಸುವ ಪ್ರಯತ್ನವಾಗಿ ಆರೋಗ್ಯ ಸಂಸ್ಥೆಗಳು ಸುರಕ್ಷಿತ ಲೈಂಗಿಕತೆ ಮತ್ತು ಸೂಜಿ-ವಿನಿಮಯ ಕಾರ್ಯಕ್ರಮಗಳನ್ನು ಪ್ರೋತ್ಸಾಹಿಸುತ್ತಿವೆ.
ರೋಗ-ಲಕ್ಷಣಗಳು
ಆರೋಗ್ಯಕರ ನಿರೋಧಕ ವ್ಯವಸ್ಥೆಗಳನ್ನು ಹೊಂದಿರುವ ವ್ಯಕ್ತಿಗಳಲ್ಲಿ ಸಾಮಾನ್ಯವಾಗಿ ಕಂಡುಬರದ ಪರಿಸ್ಥಿತಿಗಳಿಂದಾಗಿ AIDSನ ರೋಗ-ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ಈ ಪೈಕಿ ಹೆಚ್ಚಿನ ಪರಿಸ್ಥಿತಿಗಳು ಬ್ಯಾಕ್ಟೀರಿಯಾ, ವೈರಸ್‌ಗಳು, ಶಿಲೀಂಧ್ರ ಮತ್ತು ಪರಾವಲಂಬಿಗಳ ಸೋಂಕಿನಿಂದ ಉಂಟಾಗುತ್ತವೆ, ಇಲ್ಲದೆ ಇವು ಸಾಮಾನ್ಯವಾಗಿ HIV ಸೋಂಕಿಗೊಳಗಾದ ನಿರೋಧಕ ವ್ಯವಸ್ಥೆಯ ಭಾಗಗಳನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಳ್ಳುತ್ತವೆ. AIDS ಸೋಂಕಿತ ವ್ಯಕ್ತಿಗಳಲ್ಲಿ ಅವಕಾಶವಾದಿ ಸೋಂಕುಗಳು ಸಾಮಾನ್ಯ.[೧೩]
ಶಾರೀರಿಕ ವ್ಯವಸ್ಥೆಯ ಪ್ರತಿಯೊಂದು ಭಾಗದ ಮೇಲೂ HIV ಪರಿಣಾಮ ಬೀರುತ್ತದೆ. AIDS ರೋಗಿಗಳಲ್ಲಿ ಹಲವು ಬಗೆಯ ಕ್ಯಾನ್ಸರ್ಗಳು ಕಾಣಿಸಿಕೊಳ್ಳುವ ಅಪಾಯಗಳು ಹೆಚ್ಚು, ಅವುಗಳೆಂದರೆ ಕಾಪೊಸಿಯ ಸಾರ್ಕೋಮಾ, ಗರ್ಭಕಂಠದ ಕ್ಯಾನ್ಸರ್ ಮತ್ತು ನಿರೋಧಕ ವ್ಯವಸ್ಥೆಯಲ್ಲಿ ಉದ್ಭವಿಸುವ ಕ್ಯಾನ್ಸರ್ ಲಿಂಫೋಮಾಗಳು. ಅದಲ್ಲದೆ, AIDS ಪೀಡಿತ ರೋಗಿಗಳಲ್ಲಿ ಆಗಾಗ ಜ್ವರ, ಬೆವರು (ನಿರ್ದಿಷ್ಟವಾಗಿ ರಾತ್ರಿ ಹೊತ್ತು), ಊದಿಕೊಂಡ ಗ್ರಂಥಿಗಳು, ಶೀತ, ನಿಶ್ಯಕ್ತಿ, ಮತ್ತು ತೂಕ ನಷ್ಟ ಕಂಡು ಬರುವುದು ಸಾಮಾನ್ಯ.[೧೪][೧೫]
AIDS ಪೀಡಿತರು ವಾಸಿಸುತ್ತಿರುವ ಭೌಗೋಳಿಕ ಪ್ರದೇಶದಲ್ಲಿ ಅವಕಾಶವಾದಿ ಸೋಂಕುಗಳು ವ್ಯಾಪಕವಾಗಿ ಹರಡಿದ್ದರೆ ಅವು ಬಹುಬೇಗನೆ ಏಡ್ಸ್ ರೋಗಿಗಳಲ್ಲೂ ಕಾಣಿಸಿಕೊಳ್ಳುತ್ತದೆ.
ಶ್ವಾಸಕೋಶದ ಸೋಂಕುಗಳು
ಆರೋಗ್ಯಕರ ಮತ್ತು ರೋಗ ನಿರೋಧಕ ಸಾಮಾರ್ಥ್ಯ ಇರುವ ವ್ಯಕ್ತಿಗಳಲ್ಲಿ ನ್ಯುಮೊಸಿಸ್ಟಿಸ್ ನ್ಯುಮೋನಿಯಾ(ಮೂಲತಃ ನ್ಯುಮೋಸಿಸ್ಟಿಸ್ ಕಾರಿನೀ ನ್ಯುಮೋನಿಯಾ, ಮತ್ತು ಈಗಲೂ PCP ಎಂದೇ ಸಂಕ್ಷೇಪಿಸಲಾಗುತ್ತಿದೆ, ಅಂದರೆ ನ್ಯುಮೊಸಿಸ್ಟಿಸ್' ' ನ್ಯುಮೋನಿಯಾ )ಕಂಡು ಬರದು, ಆದರೆ HIV-ಸೋಂಕಿತರಲ್ಲಿ ಇದು ಸಾಮಾನ್ಯ. ನ್ಯುಮೊಸಿಸ್ಟಿಸ್ ಜಿರೊವಿಸೀ ಇದಕ್ಕೆ ಕಾರಣ.
ಪರಿಣಾಮಕಾರಿ ಪರೀಕ್ಷೆ, ಚಿಕಿತ್ಸೆ, ಮತ್ತು ನಿತ್ಯ ರೋಗ ನಿರೋಧಕ ಚಿಕಿತ್ಸೆಗಳು ಬರುವ ಮೊದಲು, ಪಾಶ್ಚಿಮಾತ್ಯ ದೇಶಗಳಲ್ಲಿ ತಕ್ಷಣದ ಸಾವಿಗೆ ಇದುವೇ ಕಾರಣವಾಗಿತ್ತು. ರಕ್ತದ ಪ್ರತಿ µLಗೆ CD4 ಎಣಿಕೆಗಳು 200 ಜೀವಕೋಶಗಳಿಗಿಂತ ಕಡಿಮೆಯಿದ್ದಲ್ಲಿ ಮಾತ್ರ ರೋಗ ಸೂಚನೆ ಸಿಗುತ್ತದೆ, ಆದಾಗ್ಯೂ ಅಭಿವೃದ್ಧಿಶೀಲ ದೇಶಗಳಲ್ಲಿ ಆರೋಗ್ಯ ತಪಾಸಣೆಗೊಳಪಡದ ವ್ಯಕ್ತಿಗಳಲ್ಲಿ AIDS ರೋಗದ ಮೊದಲ ಸೂಚನೆಯೇ ನ್ಯುಮೋನಿಯಾ. [೧೬]
HIV ಜೊತೆ ಗುರುತಿಸಿಕೊಂಡಿರುವ ಸೋಂಕುಗಳಲ್ಲಿ ಕ್ಷಯ (TB) ಪ್ರಮುಖವಾದ್ದು, ಏಕೆಂದರೆ ಇದು ರೋಗ ನಿರೋಧಕ ಸಾಮಾರ್ಥ್ಯ ಹೊಂದಿರುವ ವ್ಯಕ್ತಿಗಳಿಗೂ ಉಸಿರಾಟದ ಮೂಲಕ ವರ್ಗಾವಣೆಯಾಗಬಲ್ಲುದು, ಮತ್ತು ಪತ್ತೆಯಾದಲ್ಲಿ ಇದಕ್ಕೆ ಸುಲಭವಾಗಿ ಚಿಕಿತ್ಸೆ ನೀಡಬಹುದು, ಅಲ್ಲದೆ HIV ರೋಗದ ಆರಂಭದಲ್ಲಿ ಮಾತ್ರ ಕ್ಷಯ ಕಾಣಿಸಿಕೊಳ್ಳುತ್ತದೆ, ಮತ್ತು ಸೂಕ್ತ ಔಷಧೋಪಚಾರದಿಂದ ಇದು ಬರದಂತೆ ಕೂಡ ತಡೆಯಬಹುದು. ಆದಾಗ್ಯೂ, ಬಹುಔಷಧಗಳು ನಿರೋಧಕಶಕ್ತಿಗೆ ವಿರುದ್ಧವಾಗಿ ಕೆಲಸ ಮಾಡಿದಲ್ಲಿ ಗಂಭೀರ ಸಮಸ್ಯೆಗೆ ಎಡೆ ಮಾಡಿಕೊಡುವ ಸಾಧ್ಯತೆಗಳಿವೆ. ಆದರೂ ಇದರಿಂದಾಗಿಯೇ ಏಡ್ಸ್ ಸೋಂಕು ತಗುಲುವ ಸಾಧ್ಯತೆಗಳನ್ನು ತಳ್ಳಿ ಹಾಕಲಾಗಿದೆ, ಏಕೆಂದರೆ ಪಾಶ್ಚಿಮಾತ್ಯ ದೇಶಗಳಲ್ಲಿ ಏಚ್ಚರಿಕೆಯ ನೇರ ಔಷಧೋಪಚಾರ ಮತ್ತು ಇತರೆ ಸುಧಾರಿತ ಪದ್ಧತಿಗಳೂ ಬಳಕೆಯಲ್ಲಿವೆ, ಆದರೆ HIV ವ್ಯಾಪಕವಾಗಿರುವ ಅಭಿವೃದ್ಧಿಶೀಲ ದೇಶಗಳಲ್ಲಿ ಇದೇ ಸ್ಥಿತಿ ಇಲ್ಲ.
HIV ಸೋಂಕಿನ ಆರಂಭಿಕ-ಹಂತದಲ್ಲಿ (ಪ್ರತಿ µLಗೆ CD4 ಎಣಿಕೆ >300 ಜೀವಕೋಶಗಳು, TBಯಿಂದಾಗಿ ಶ್ವಾಸಕೋಶದ ಕಾಯಿಲೆ ಬರಬಹುದು. HIV ಸೋಂಕು ಇನ್ನಷ್ಟು ಮುಂದೆ ಹೋಗಿದ್ದಲ್ಲಿ, ಸಾಮಾನ್ಯ ರೋಗ ಲಕ್ಷಣದಂತೆಯೇ ಇದ್ದು ಇಡೀ ಶ್ವಾಸಕೋಶವನ್ನು ಆವರಿಸಿಕೊಂಡು(ಇಡೀ ದೇಹದ)ವಿಲಕ್ಷಣ ರೀತಿಯಲ್ಲಿ TB ಕಾಣಿಸಿಕೊಳ್ಳುತ್ತದೆ. ಸಾಮಾನ್ಯವಾಗಿ ಏಡ್ಸ್‌ನ ರೋಗ-ಲಕ್ಷಣಗಳು ದೈಹಿಕ ಪ್ರಕೃತಿಯನ್ನು ಅವಲಂಬಿಸಿದೆ ಮತ್ತು ಅವು ನಿರ್ದಿಷ್ಟ ಅಂಗಕ್ಕೆ ಸೀಮಿತವೆಂದು ಹೇಳಲಾಗದು, ಅಸ್ಥಿ ಮಜ್ಜೆ, ಎಲುಬು, ಮೂತ್ರದ ಮತ್ತು ಜೀರ್ಣಾಂಗ ವ್ಯೂಹ, ಪಿತ್ತಜನಕಾಂಗ, ಪ್ರಾದೇಶಿಕ ದುಗ್ಧ ಗ್ರಂಥಿಗಳು, ಮತ್ತು ಕೇಂದ್ರ ನರವ್ಯೂಹ ವ್ಯವಸ್ಥೆ ವೇಲೆ ಆಗಿಂದಾಗ್ಗೆ ಪರಿಣಾಮವನ್ನುಂಟು ಮಾಡುತ್ತವೆ.
ಜೀರ್ಣಾಂಗ ವ್ಯೂಹದ ಸೋಂಕುಗಳು
ಅನ್ನನಾಳ(ಹೊಟ್ಟೆಯತ್ತ ಸಾಗುವ ಆಹಾರನಾಳ ಅಥವಾ ಗಂಟಲು)ದ ಕೆಳ ತುದಿಯ ಒಳಪದರದಲ್ಲಿ ಕಾಣಿಸಿಕೊಳ್ಳುವ ಉರಿಯಿಂದಾಗಿ ಅನ್ನನಾಳದ ಉರಿಯೂತ ಉಂಟಾಗುತ್ತದೆ. HIV ಸೋಂಕಿತ ವ್ಯಕ್ತಿಗಳಲ್ಲಿ, ಇದು ಸಾಮಾನ್ಯವಾಗಿ ಶಿಲೀಂಧ್ರ (ಕ್ಯಾಂಡಿಡಿಯಾಸಿಸ್) ಅಥವಾ ವೈರಲ್ (ಹರ್ಪಿಸ್ ಸಿಂಪ್ಲೆಕ್ಸ್-1 ಅಥವಾ ಸೈಟೊಮೆಗಾಲೊವೈರಸ್) ಸೋಂಕುಗಳಿಂದ ಉಂಟಾಗುತ್ತದೆ. ಮೈಕೊಬ್ಯಾಕ್ಟೀರಿಯಾಗಳಿಂದಾಗಿ ಈ ಸೋಂಕು ತಗುಲಿದ ಉದಾಹರಣೆಗಳು ಅಪರೂಪ.[೧೮]
HIV ಸೋಂಕಿತರಲ್ಲಿ ಆಗಿಂದಾಗ್ಗೆ ಕಾಣಿಸಿಕೊಳ್ಳುವ ಅತಿಸಾರ ಭೇದಿಗೆ ಸಾಮಾನ್ಯ ಬ್ಯಾಕ್ಟೀರಿಯಾದ (ಸ್ಯಾಲ್ಮನೆಲ , ಷಿಗೆಲ , ಲಿಸ್ಟೀರಿಯಾ ಅಥವಾ ಕ್ಯಾಂಪಿಲೊಬ್ಯಾಕ್ಟರ್ ) ಮತ್ತು ಪರಾವಲಂಬಿ ಸೋಂಕುಗಳು; ಮತ್ತು ಅಪರೂಪಕ್ಕೆ ಕಾಣಿಸಿಕೊಳ್ಳುವ ಅವಕಾಶವಾದಿ ಸೋಂಕುಗಳಂತಹ ಕ್ರಿಪ್ಟೋಸ್ಪೊರಿಡಿಯೋಸಿಸ್, ಮೈಕ್ರೊಸ್ಪೊರಿಡಿಯೋಸಿಸ್, ಮೈಕೋಬ್ಯಾಕ್ಟೀರಿಯಂ ಏವಿಯಂ ಸಂಕೀರ್ಣ (MAC) ಮತ್ತು ವೈರಸ್‌ಗಳು[೧೯] ಆಸ್ಟ್ರೋವೈರಸ್, ಅದೊನೊವೈರಸ್, ರೊಟಾವೈರಸ್ ಮತ್ತು ಸೈಟೊಮೆಗಾಲೊವೈರಸ್, (ಕೊನೆಯದ್ದು ಮೈಕೋಬ್ಯಾಕ್ಟೀರಿಯಂ ಏವಿಯಂ ದೊಡ್ಡ ಕರುಳಿನ ಸೋಂಕಿನಿಂದಾಗಿ ಬರುವಂತದ್ದು)ಸೇರಿದಂತೆ ಹಲವು ಸಾಧ್ಯತೆಗಳು ಕಾರಣಗಳಾಗಬಹುದು.
ಕೆಲವು ಪ್ರಕರಣಗಳಲ್ಲಿ, HIV ಚಿಕಿತ್ಸೆಗೆ ಬಳಸಿದ ಹಲವು ಔಷಧಗಳಿಂದಾಗಿಯೂ ಅತಿಸಾರ ಭೇದಿ ಉಂಟಾಗುತ್ತದೆ, ಅಥವಾ ಇದು ಕೆಲವೊಮ್ಮೆ ಅಂದರೆ ನಿರ್ದಿಷ್ಟವಾಗಿ HIV ಸೋಂಕು ಆರಂಭಿಕ ಹಂತದಲ್ಲಿದ್ದಾಗ ಅತಿಸಾರ ಭೇದಿ HIV ಜೊತೆ ಸೇರಿಕೊಳ್ಳಬಹುದು. ಅತಿಸಾರ ಭೇದಿಗೆ ಕಾರಣವಾಗುವ ಬ್ಯಾಕ್ಟೀರಿಯಾಕ್ಕೆ ಚಿಕಿತ್ಸೆ ನೀಡುವಾಗ ಬಳಸುವ ಪ್ರತಿಜೀವಕಗಳಿಂದಾಗಿಯೂ ಇದು ಬರಬಹುದು(ಕ್ಲೊಸ್ಟ್ರಿಡಿಯಂ ಜಗ್ಗದಾಗ ). HIV ಸೋಂಕಿನ ಕೊನೆಯ ಹಂತಗಳಲ್ಲಿ, ಅತಿಸಾರ ಭೇದಿಯು ಪೌಷ್ಟಿಕ ಪದಾರ್ಥಗಳನ್ನು ಕರುಳಿನ ವ್ಯೂಹ ಜೀರ್ಣಿಸಿಕೊಳ್ಳಲು ಅಶಕ್ತವಾಗಿರುವುದನ್ನು ಪ್ರತಿಬಿಂಬಿಸುತ್ತದೆ, ಮತ್ತು HIVಗೆ-ಸಂಬಂಧಿಸಿದಂತೆ ಕ್ಷೀಣಿಸುವುದರ ಪ್ರಮುಖ ಒಂದು ಅಂಶವಾಗಿರುವ ಸಾಧ್ಯತೆಗಳೂ ಇವೆ.[೨೦]
ನರಶಾಸ್ತ್ರೀಯ ಮತ್ತು ಮನೋವೈದ್ಯಕೀಯ ಸೇರ್ಪಡೆ
ನರವ್ಯೂಹ ವ್ಯವಸ್ಥೆಗೆ ಸೋಂಕು ತಗುಲಿಸಲು ಇತರೆ ಜೀವಿಗಳಿಗೆ HIV ಸೋಂಕು ಎಡೆ ಮಾಡಿಕೊಡುವುದರಿಂದ ಅಥವಾ ಅನಾರೋಗ್ಯದ ನೇರ ಪರಿಣಾಮದಿಂದಾಗಿ ವಿವಿಧ ನರ ಮನೋವೈದ್ಯಕೀಯ ಅನುಗತ ರೋಗ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ಟೊಕ್ಸೊಪ್ಸಾಸ್ಮೋಸಿಸ್‌ ಒಂದು ರೋಗವಾಗಿದ್ದು, ಏಕ-ಜೀವಕೋಶ ಹೊಂದಿರುವ ಟೊಕ್ಸಾಪ್ಲಾಸ್ಮಾ ಗೊಂಡೀ ಎಂಬ ಪರಾವಲಂಬಿಯಿಂದ ಬರುತ್ತದೆ; ಇದು ನೇರವಾಗಿ ಮಿದುಳಿಗೆ ಸೋಂಕು ತಗುಲಿಸಿ ಟೊಕ್ಸಾಪ್ಲಾಸ್ಮಾ ಎನ್ಸೆಪಲೈಟಿಸ್‌ಗೆ ಕಾರಣವಾಗುತ್ತದೆ, ಇದು ಕಣ್ಣುಗಳು ಮತ್ತು ಶ್ವಾಸಕೋಶಗಳಿಗೂ ಸೋಂಕುಂಟು ಮಾಡಿ ರೋಗಕ್ಕೆ ಕಾರಣವಾಗಬಹುದು.[೨೧]
ಕ್ರಿಪ್ಟೋಕೊಕ್ಕಾಲ್ ಮಿನಿಂಜಿಟಿಸ್ ಒಂದು ಮಿದುಳ್ಪೊರೆ(ಮಿದುಳು ಮತ್ತು ಬೆನ್ನುಹುರಿಯನ್ನು ಆವರಿಸಿರುವ ಒಳಪೊರೆ)ಗೆ ಬರುವ ಒಂದು ಸೋಂಕು, ಕ್ರಿಪ್ಟೋಕಾಕಸ್ ನಿಯೋಫಾರ್ಮನ್ಸ್ ಎಂಬ ಶಿಲೀಂಧ್ರದಿಂದ ಬರುತ್ತದೆ. ಇದರಿಂದಾಗಿ ಜ್ವರ, ತಲೆನೋವು, ನಿಶ್ಯಕ್ತಿ, ಹೊಟ್ಟೆ ತೊಳಸುವಿಕೆ, ಮತ್ತು ವಾಕರಿಕೆ ಉಂಟಾಗುತ್ತದೆ. ರೋಗಿಗಳಲ್ಲಿ ಮೂರ್ಛೆ ರೋಗ(ಫಿಟ್ಸ್) ಮತ್ತು ಗೊಂದಲಗಳಿಗೂ ಇದು ಕಾರಣವಾಗಬಹುದು; ಕೂಡಲೇ ಸರಿಯಾದ ಚಿಕಿತ್ಸೆಯಾಗದಿದ್ದಲ್ಲಿ ಅಪಾಯ ತಪ್ಪಿದ್ದಲ್ಲ.
ಪ್ರೋಗ್ರೆಸಿವ್ ಮಲ್ಟಿಫೋಕಲ್ ಲ್ಯೂಕೊಎನ್ಸೆಫಲೋಪತಿಯು (PML) ನರಪೊರೆಯನ್ನು ನಾಶಗೊಳಿಸುವ ರೋಗವಾಗಿದ್ದು, ಇದರಿಂದಾಗಿ ನರ ಜೀವಕೋಶಗಳ ನರತಂತುಗಳನ್ನು ಆವರಿಸಿಕೊಂಡಿರುವ ನರಪೊರೆಯ ಕೋಶಗಳು ಕ್ರಮೇಣವಾಗಿ ನಾಶಗೊಂಡು ನರಗಳ ಪ್ರಚೋದನೆಯ ಸಂವಹನ ದುರ್ಬಲವಾಗುತ್ತದೆ. JC ವೈರಸ್ ಎಂಬ ವೈರಸ್‌ನಿದ ಬರುವ ಇದು 70% ಜನರಲ್ಲಿ ಸುಪ್ತವಾಗಿ ಕಾಣಿಸಿಕೊಳ್ಳುತ್ತದೆ, AIDS ರೋಗಿಗಳ ಪ್ರಕರಣದಲ್ಲಾಗುವಂತೆ ನಿರೋಧಕ ವ್ಯವಸ್ಥೆಯು ತೀರಾ ದುರ್ಬಲವಾದಾಗ ಮಾತ್ರ ಈ ರೋಗ ಕಾಣಿಸಿಕೊಳ್ಳುತ್ತದೆ. ಆದರೆ ಈ ರೋಗ ಕ್ಷಿಪ್ರಗತಿಯಲ್ಲಿ ಮುಂದುವರಿದು, ರೋಗ ಪತ್ತೆಯಾದ ಕೆಲವೇ ತಿಂಗಳುಗಳಲ್ಲಿ ಸಾವಿಗೆ ಕಾರಣವಾಗಬಹುದು.[೨೨] AIDS ಡಿಮೆನ್ಶಿಯಾ ಕಾಂಪ್ಲೆಕ್ಸ್(ADC)ವು HIV ಸೋಂಕಿನಿಂದ ಪ್ರೇರಿತ ಚಯಾಪಚಯ ಎನ್ಸೆಫಲೋಪತಿಯಾಗಿದೆ, ಅಲ್ಲದೆ HIV ಸೋಂಕಿತ ಮಿದುಳಿನ ಮ್ಯಾಕ್ರೋಫೇಜಸ್(ದೊಡ್ಡ ಗಾತ್ರದ ಬಿಳಿಯ ರಕ್ತಕಣಗಳು) ಮತ್ತು ಮೈಕ್ರೊಗ್ಲಿಯಾದಲ್ಲಿ ನಿರೋಧಕ ವ್ಯವಸ್ಥೆಯನ್ನು ತೀವ್ರಗೊಳಿಸುವುದರಿಂದ ಇದಕ್ಕೆ ಉತ್ತೇಜನ ಸಿಗುತ್ತದೆ.
ಈ ಜೀವಕೋಶಗಳು HIVನಿಂದ ಫಲದಾಯಕವಾಗಿ ಸೋಂಕಿತಗೊಳ್ಳುತ್ತವೆ ಮತ್ತು ಇವು ಎರಡೂ ಅತಿಥೇಯ ಮತ್ತು ವೈರಲ್ ಮೂಲಗಳ ರಹಸ್ಯ ನ್ಯುರೊಟಾಕ್ಸಿನ್‌ಗಳಾಗಿವೆ.[೨೩]
HIV ಸೋಂಕು ತಗುಲಿ ಹಲವು ವರ್ಷಗಳ ನಂತರ ಅರಿವು, ನಡವಳಿಕೆ ಮತ್ತು ಸ್ನಾಯುಗಳಲ್ಲಿನ ವೈಪರೀತ್ಯಗಳಿಂದಾಗಿ ನಿರ್ದಿಷ್ಟ ನರಶಾಸ್ತ್ರೀಯ ದೌರ್ಬಲ್ಯಗಳು ಕಾಣಿಸಿಕೊಳ್ಳುತ್ತದೆ ಮತ್ತು ಅವು ಕಡಿಮೆ ಪ್ರಮಾಣದ CD4+ T ಜೀವಕೋಶದ ಹಂತಗಳು ಮತ್ತು ಅತಿ ಪ್ಲಾಸ್ಮಾ ವೈರಲ್‌ಗಳ ಲೋಡ್‌ಗಳ ಜೊತೆ ಸೇರಿಕೊಂಡಿವೆ. ಪಾಶ್ಚಿಮಾತ್ಯ ದೇಶಗಳಲ್ಲಿ[೨೪] ಏಡ್ಸ್ ವ್ಯಾಪಕತೆ 10–20% ಇದ್ದರೆ, ಭಾರತದಲ್ಲಿ 1–2%ರಷ್ಟು ಮಾತ್ರ HIV ಸೋಂಕಿತರಿದ್ದಾರೆ.[೨೫][೨೬]
ಭಾರತದಲ್ಲಿ HIVಯ ಉಪ ಬಗೆಗಳಿರುವುದು ಈ ವ್ಯತ್ಯಾಸಕ್ಕೆ ಕಾರಣವಾಗಿರಬಹುದು. HIV ಸೋಂಕಿನಿದ ಬಳಲುತ್ತಿರುವ ರೋಗಿಗಳಲ್ಲಿ AIDS ಸಂಬಂಧಿತ ಬುದ್ಧಿವಿಕಲ್ಪವನ್ನು ಕೆಲವೊಮ್ಮೆ ಕಾಣಬಹುದು; ರೋಗಿಗಳು ಮುಂಗೋಪಿಗಳಾಗುತ್ತಾರೆ, ಅಲ್ಲದೆ ಈ ಸೋಂಕು ಅವರ ಅರಿವಿನ ಶಕ್ತಿಯನ್ನು ದುರ್ಬಲಗೊಳಿಸುತ್ತದೆ ಮತ್ತು ನೈಜ ದ್ವಿಧ್ರುವಿ ಅವ್ಯವಸ್ಥೆ ಜೊತೆ ಗುರುತಿಸಿಕೊಂಡಿರುವ ಉನ್ಮಾದದ ಪ್ರಸಂಗಗಳ ಬದಲಾಗಿ ಸುಖದ ಭ್ರಮೆ ಮಾತ್ರ ಕಾಣುವುದಕ್ಕೆ ಸಾಧ್ಯ. ಇದು ಏಡ್ಸ್‌ನ ಕೊನೆಯ ಹಂತಕ್ಕೆ ಹೊರತಾಗಿದ್ದರೂ, ಆಗಿಂದಾಗ್ಗೆ ಕಾಣಿಸಿಕೊಳ್ಳುತ್ತಿರಬಹುದು. ಬಹು-ಔಷಧೀಯ ಉಪಚಾರ ಬಂದಾಗಿನಿಂದ ಈ ರೋಗದ ಚಿಹ್ನೆಗಳು ಕಾಣ ಸಿಗುವುದು ಈಗ ಬಹಳ ವಿರಳ.
ಗಡ್ಡೆಗಳು ಮತ್ತು ತೀವ್ರತೆಗಳು
HIV ಸೋಂಕಿತ ರೋಗಿಗಳು ಹಲವು ಬಗೆಯ ಕ್ಯಾನ್ಸರ್‌ಗಳ ಪ್ರಮಾಣವನ್ನು ಮೂಲಭೂತವಾಗಿ ಹೆಚ್ಚಿಸಿದ್ದಾರೆ. ಇದು ಪ್ರಾಥಮಿಕವಾಗಿ ಗ್ರಂಥಿ ಜನಕ DNA ವೈರಸ್, ಪ್ರಮುಖವಾಗಿ ಇಪ್‌ಸ್ಟೈನ್-ಬಾರ್ ವೈರಸ್ (EBV), ಕಾಪೊಸಿಯ ಸಾರ್ಕೋಮಾ-ಹರ್ಪಿಸ್ ವೈರಸ್‌ನೊಂದಿಗೆ ಗುರುತಿಸಿಕೊಂಡಿರುವುದರಿಂದ (KSHV) (ಹ್ಯೂಮನ್ ಹರ್ಪಿಸ್‌ವೈರಸ್-8[HHV-8] ಎಂದೂ ಕರೆಯಲಾಗುತ್ತದೆ), ಮತ್ತು ಮಾನವ ಪ್ಯಾಪಿಲೋಮಾವೈರಸ್‌ (HPV)ಗಳು ಏಡ್ಸ್ ವೈರಸ್ ಜೊತೆ ಸೇರಿಕೊಳ್ಳುವುದರಿಂದ ಕ್ಯಾನ್ಸರ್ ಉಂಟಾಗುತ್ತದೆ.[೨೭][೨೮]
ಕಾಪೊಸಿಯ ಸಾರ್ಕೋಮಾ (KS),HIV- ಸೋಂಕಿತ ರೋಗಿಗಳಲ್ಲಿ ಕಾಣಬಹುದಾದ ಅತ್ಯಂತ ಸಾಮಾನ್ಯ ಗಡ್ಡೆ. 1981ರಲ್ಲಿ ಯುವ ಸಲಿಂಗಕಾಮಿಗಳಲ್ಲಿ ಈ ಗಡ್ಡೆ ಕಾಣಿಸಿಕೊಂಡಾಗ AIDS ಸಾಂಕ್ರಾಮಿಕ ರೋಗವಾಗಿ ಪರಿವರ್ತನೆಗೊಳ್ಳುವ ಸೂಚನೆಗಳು ದೊರೆತವು. ಕಾಪೊಸಿಯ ಸಾರ್ಕೋಮಾ-ಹರ್ಪಿಸ್ ವೈರಸ್ ಜೊತೆ ಗುರುತಿಸಿಕೊಂಡಿರುವ (KSHV) ಎಂದು ಕರೆಯಲ್ಪಡುವ ಗಮಾಹರ್ಪಿಸ್‌ ವೈರಸ್ ಈ ಕ್ಯಾನ್ಸರ್ ಗಡ್ಡೆಗೆ ಕಾರಣವಾಗಿದ್ದು ಗಂಟುಗಳ ಚರ್ಮದಲ್ಲಿ ತುಸು ನೇರಳೆ ಬಣ್ಣದಲ್ಲಿ ಆಗಾಗ ಕಾಣಿಸಿಕೊಳ್ಳುತ್ತದೆ, ಅಲ್ಲದೆ ಇವು ಕ್ರಮೇಣವಾಗಿ ದೇಹದ ಇತರ ಭಾಗಗಳಿಗೆ ಪ್ರಮುಖವಾಗಿ ಬಾಯಿ, ಜೀರ್ಣಾಂಗ ವ್ಯೂಹ, ಮತ್ತು ಶ್ವಾಸಕೋಶಗಳಿಗೂ ಹರಡುತ್ತದೆ. HIV-ಸೋಂಕಿತ ರೋಗಿಗಳಲ್ಲಿ ಉನ್ನತ-ದರ್ಜೆಯ B ಜೀವಕೋಶ ಲಿಂಫೋಮಾಗಳಾದ ಬರ್ಕಿಟ್ಸ್ ಲಿಂಫೋಮಾ, ಬರ್ಕಿಟ್ಸ್-ತೆರನಾದ ಲಿಂಫೋಮಾ, ಡಿಫ್ಯೂಸ್ ಲಾರ್ಜ್ B-ಶೆಲ್ ಲಿಂಫೋಮಾ (DLBCL), ಮತ್ತು ಪ್ರೈಮರಿ ಸೆಂಟ್ರಲ್ ನರ್ವ್ಸ್ ಸಿಸ್ಟಂ ಲಿಂಫೋಮಾಗಳು ಆಗಿಂದಾಗ್ಗೆ ಕಾಣಿಸಿಕೊಳ್ಳುತ್ತವೆ. ಈ ನಿರ್ದಿಷ್ಟ ಕ್ಯಾನ್ಸರ್ಗಳು ಮಸುಕಾದ ಭವಿಷ್ಯದ ಕುರಿತು ಆಗಿಂದಾಗ್ಗೆ ಮುನ್ಸೂಚನೆ ನೀಡುತ್ತವೆ. ಈ ಪೈಕಿ ಹೆಚ್ಚಿನ ಲಿಂಫೋಮಾಗಳಿಗೆ ಇಪ್‌ಸ್ಟೈನ್-ಬಾರ್ ವೈರಸ್ (EBV) ಅಥವಾ KSHV ಕಾರಣವಾಗಿದೆ. HIV-ಸೋಂಕಿತ ರೋಗಿಗಳಲ್ಲಿ, ಜೀರ್ಣಾಂಗ ವ್ಯೂಹದಂತಹ ವಿಶೇಷ ಸಂಧಿಸ್ಥಾನಗಳಲ್ಲಿ ಲಿಂಫೋಮಾ ಆಗಿಂದಾಗ್ಗೆ ಕಾಣಿಸಿಕೊಳ್ಳುತ್ತದೆ. [೨೯]HIV-ಸೋಂಕಿತ ರೋಗಿಗಳಲ್ಲಿ ಇದು ಕಾಣಿಸಿಕೊಂಡಾಗ, KS ಮತ್ತು ಉತ್ಸಾಹಿ B ಜೀವಕೋಶ ಲಿಂಫೋಮಾಗಳು ಆತನಿಗೆ AIDS ಇರುವುದನ್ನು ದೃಢಪಡಿಸುತ್ತವೆ.
HIV-ಸೋಂಕಿತ ಮಹಿಳೆಯು ತೀವ್ರ ಸ್ವರೂಪದ ಗರ್ಭಕಂಠದ ಕ್ಯಾನ್ಸರ್‌‌‌ನಿಂದ ನರಳುತ್ತಿದ್ದಲ್ಲಿ ಆಕೆ AIDSನ-ಆರಂಭಿಕ ಹಂತದಲ್ಲಿದ್ದಾಳೆ ಎಂದರ್ಥ. ಇದಕ್ಕೆ ಹ್ಯೂಮನ್ ಪ್ಯಾಪಿಲೋಮಾ ವೈರಸ್ (HPV) ಕಾರಣ.[೩೦]
ಮೇಲಿನ ಪಟ್ಟಿಯಲ್ಲಿರುವ AIDSಗೆ ಕಾರಣವಾಗುವ ಗಡ್ಡೆಗಳಲ್ಲದೆ, HIV-ಸೋಂಕಿತ ರೋಗಿಗಳಿಗೆ ಇತರ ಕೆಲವು ನಿರ್ದಿಷ್ಟ ಗಡ್ಡೆಗಳು ಸಹ ಅಪಾಯಕಾರಿಯಾಗಬಲ್ಲವು; ಅವುಗಳೆಂದರೆ ಹಾಡ್‌ಗ್ಕಿನ್ಸ್‌ ಡಿಸೀಸ್, ಗುದ ಮತ್ತು ಗುದನಾಳದ ಕಾರ್ಸಿನೋಮಗಳು, ಹೆಪಟೊಸೆಲ್ಯುಲರ್ ಕಾರ್ಸಿನೋಮಗಳು, ತಲೆ ಮತ್ತು ಕೊರಳಿನ ಕ್ಯಾನ್ಸರ್ಗಳು, ಮತ್ತು ಶ್ವಾಸಕೋಶದ ಕ್ಯಾನ್ಸರ್.
ಈ ಪೈಕಿ ಕೆಲವು ಅಂದರೆ ಹಾಡ್‌ಗ್ಕಿನ್ಸ್‌ ಡಿಸೀಸ್(EBV), ಗುದ/ಗುದನಾಳದ ಕ್ಯಾನ್ಸರ್ಗಳು(HPV), ತಲೆ ಮತ್ತು ಕೊರಳಿನ ಕ್ಯಾನ್ಸರ್ಗಳು(HPV), ಮತ್ತು ಹೆಪಟೊಸೆಲ್ಯುಲರ್ ಕಾರ್ಸಿನೋಮಗಳು(ಹೆಪಟೈಟಿಸ್ B ಅಥವಾ C)ವೈರಸ್‌ಗಳಿಂದಾಗಿ ಬರುತ್ತವೆ. ಕ್ಯಾನ್ಸರ್ ಜನಕಗಳು(ಶ್ವಾಸಕೋಶದ ಕ್ಯಾನ್ಸರ್‌ಗೆ ಧೂಮಪಾನ) ಅಥವಾ ದೇಹದ ನಿರೋಧಕ ವ್ಯವಸ್ಥೆಗಳಲ್ಲಿ ಲೋಪದೋಷಗಳನ್ನಿಟ್ಟುಕೊಂಡು ಸೂಕ್ತ ಚಿಕಿತ್ಸೆ ಪಡೆಯದೆ ಹಲವು ವರ್ಷಗಳ ಕಾಲ ಬಾಳುವುದು ವೈರಸ್‌ಗಳ ಪ್ರವೇಶಕ್ಕೆ ಎಡೆಮಾಡಿಕೊಡಬಹುದು. ಆಸಕ್ತಿಯ ವಿಷಯವೇನೆಂದರೆ, HIV-ಸೋಂಕಿತ ರೋಗಿಗಳಲ್ಲಿ ಸಾಮಾನ್ಯ ಕ್ಯಾನ್ಸರ್‌ಗಳಾದ ಸ್ತನದ ಕ್ಯಾನ್ಸರ್ ಅಥವಾ ದೊಡ್ಡ ಕರುಳಿನ ಕ್ಯಾನ್ಸರ್ ಪ್ರಮಾಣ ಹೆಚ್ಚಿದ ಉದಾಹರಣೆಗಳಿಲ್ಲ. AIDS ಚಿಕಿತ್ಸೆಗಾಗಿ HAART ಬೃಹತ್ ಪ್ರಮಾಣದಲ್ಲಿ ಬಳಕೆಯಾದ ಪ್ರದೇಶಗಳಲ್ಲಿ, AIDS-ಸಂಬಂಧಿತ ತೀವ್ರತೆಗಳು ಗಮನಾರ್ಹವಾಗಿ ಇಳಿದಿವೆ, ಆದರೆ HIV-ಸೋಂಕಿತ ರೋಗಿಗಳ ಮರಣಕ್ಕೆ ತೀವ್ರ ಸ್ವರೂಪದ ಕ್ಯಾನ್ಸರ್ ಅತ್ಯಂತ ಪ್ರಮುಖ ಕಾರಣವೆಂಬುದನ್ನು ಅಲ್ಲಗಳೆಯಲಾಗದು. [೩೧] ಇತ್ತೀಚಿನ ವರ್ಷಗಳಲ್ಲಿ, AIDS ನಿರ್ಧಾರಕ ಕ್ಯಾನ್ಸರ್‌ಗಳ ಹೊರತಾದ ಕಾರಣಗಳಿಗೆ ಸಾವನ್ನಪ್ಪುತ್ತಿರುವವರ ಪ್ರಮಾಣವೂ ಹೆಚ್ಚಿದೆ.
ಇತರ ಸೋಂಕುಗಳು
AIDS ರೋಗಿಗಳು ಆಗಿಂದಾಗ್ಗೆ ಅವಕಾಶವಾದಿ ಸೋಂಕುಗಳಿಗೆ ತುತ್ತಾಗುವುದರಿಂದ, ಅವರಲ್ಲಿ ಕಡಿಮೆ-ಪ್ರಮಾಣದ ಜ್ವರ ಮತ್ತು ತೂಕ ನಷ್ಟದಂತಹ ನಿರ್ದಿಷ್ಟವಲ್ಲದ ರೋಗ-ಲಕ್ಷಣಗಳು ಕಾಣಿಸಿಕೊಳ್ಳುತ್ತದೆ. ಇವು ಮೈಕೋಬ್ಯಾಕ್ಟೀರಿಯಂ ಏವಿಯಂ-ಅಂತರ ಜೀವಕೋಶಗಳು ಮತ್ತು ಸೈಟೊಮೆಗಾಲೊವೈರಸ್(CMV) ಜೊತೆ ಸೇರಿಕೊಂಡು ಅವಕಾಶವಾದಿ ಸೋಂಕುಗಳನ್ನು ಉಂಟು ಮಾಡುತ್ತವೆ. ಮೇಲೆ ವಿವರಿಸಿದಂತೆ ಕಲೈಟಿಸ್‌ಗೆ(ದೊಡ್ಡ ಕರುಳಿನ ಉರಿಯೂತ)CMV ಕಾರಣವಾಗಬಹುದು, ಮತ್ತು CMV ರೆಟಿನೈಟಿಸ್‌(ಅಕ್ಷಿಪಟದ ಉರಿಯೂತ)ನಿಂದಾಗಿ ಕಣ್ಣು ಕುರುಡಾಗಬಹುದು.
ಮೂರನೇ ಅತ್ಯಂತ ಅವಕಾಶವಾದಿ ಸೋಂಕಾದ ಪೆನಿಸಿಲಿಯಂ ಮಾರ್ನ್‌ಫೆ ಯಿಂದ ಬರುವ ಪೆನಿಸಿಲಿಯೋಸಿಸ್‌(ಇಡೀ ಶ್ವಾಸಕೋಶವನ್ನು ಆವರಿಸಿಕೊಳ್ಳುವ ಕ್ಷಯ ಮತ್ತು ಕ್ರಿಪ್ಟೋಕಾಕಸಿಸ್‌ನ ನಂತರ), ಆಗ್ನೇಯ ಏಷ್ಯಾದ ಸ್ಥಳೀಯ ಪ್ರದೇಶದೊಳಗಿರುವ HIV-ಪಾಸಿಟಿವ್ ವ್ಯಕ್ತಿಗಳಲ್ಲಿ ಹೆಚ್ಚಾಗಿ ಕಂಡು ಬರುತ್ತದೆ. AIDS ರೋಗಿಗಳಲ್ಲಿರುವ ಪಾರ್ವೋ ವೈರಸ್ B19 ಸೋಂಕು ಆಗಿಂದಾಗ್ಗೆ ಪರೀಕ್ಷೆ ವೇಳೆ ಸಿಗದೆ ತಪ್ಪಿಸಿಕೊಳ್ಳುತ್ತದೆ. ಇದರಿಂದಾಗಿ ಅನಿಮಿಯಾ ಬರುತ್ತದೆ, AIDS ಚಿಕಿತ್ಸೆಗೆ ಬಳಸುವ ಆಂಟಿರೆಟ್ರೋವೈರಲ್ ಔಷಧಗಳ ಪರಿಣಾಮಗಳ ಮಧ್ಯೆ ಅನಿಮಿಯಾವನ್ನು ಪ್ರತ್ಯೇಕಿಸುವುದು ಕಷ್ಟಸಾಧ್ಯವಾಗಬಹುದು
ಕಾರಣ
HIV ಸೋಂಕು ತೀವ್ರ ಸ್ವರೂಪಕ್ಕೆ ತಲುಪುವ ಹಂತವನ್ನು AIDS ಎನ್ನುತ್ತಾರೆ. HIVಯು ರೆಟ್ರೊವೈರಸ್ ಆಗಿದ್ದು, ಅದು ಆರಂಭದಲ್ಲಿ ಮಾನವನ ರೋಗ ನಿರೋಧಕ ವ್ಯವಸ್ಥೆಯ ಪ್ರಮುಖ ಅಂಗಾಂಶಗಳಾದ CD4+ T ಜೀವಕೋಶಗಳು (T ಜೀವಕೋಶಗಳ ಉಪ-ವರ್ಗ), ಮ್ಯಾಕ್ರೋಫೇಜ್‌ಗಳು (ದೊಡ್ಡ ಗಾತ್ರದ ಬಿಳಿಯ ರಕ್ತಕಣ) ಮತ್ತು ವೃಕ್ಷೀಯ ಜೀವಕೋಶಗಳಿಗೆ ಸೋಂಕುಂಟು ಮಾಡುತ್ತದೆ. ಈ ಸೋಂಕು ಪ್ರತ್ಯಕ್ಷ ಅಥವಾ ಪರೋಕ್ಷವಾಗಿ CD4+ T ಜೀವಕೋಶಗಳನ್ನು ನಾಶಪಡಿಸುತ್ತದೆ.[೩೩]
ರಕ್ತದ ಪ್ರತಿ ಮೈಕ್ರೋಲೀಟರ್ (µL)ನಲ್ಲಿ 200ಕ್ಕೂ ಕಡಿಮೆ ಸಂಖ್ಯೆಯಲ್ಲಿರುವ CD4+ T ಜೀವಕೋಶಗಳ ಪೈಕಿ ಹೆಚ್ಚಿನವುಗಳನ್ನು HIV ಸಾಯಿಸುವುದರಿಂದ ಜೀವಕೋಶಗಳು ನಿರೋಧಕ ಸಾಮಾರ್ಥ್ಯವನ್ನು ಕಳೆದುಕೊಳ್ಳುತ್ತವೆ. ತೀವ್ರ ಸ್ವರೂಪದ HIV ಸೋಂಕು ಕ್ರಮೇಣವಾಗಿ ಮುಂದುವರಿದು ವೈದ್ಯಕೀಯ ಪರೀಕ್ಷೆಗೆ ಸಿಗದಿರುವ ಸುಪ್ತ HIV ಸೋಂಕಾಗಿ ಬದಲಾಗುತ್ತದೆ, ನಂತರದ ಹಂತದಲ್ಲಿ HIV ಸೋಂಕಿನ ಆರಂಭಿಕ ರೋಗ-ಲಕ್ಷಣಗಳು ಗೋಚರಿಸಲಾರಂಭಿಸುತ್ತವೆ ಹಾಗೂ ಕೊನೆಗೆ AIDSಗೆ ಪರಿವರ್ತನೆಯಾಗುತ್ತದೆ. ರಕ್ತದಲ್ಲಿ ಉಳಿದಿರುವ CD4+ T ಜೀವಕೋಶಗಳು ಮತ್ತು/ಅಥವಾ ಮೇಲೆ ಹೇಳಿದ ಕೆಲವು ನಿರ್ದಿಷ್ಟ ಸೋಂಕುಗಳ ಆಧಾರದ ಮೇಲೆ ಏಡ್ಸ್ ಅನ್ನು ಗುರುತಿಸಬಹುದು.[೩೪]
ಆಂಟಿರೆಟ್ರೋವೈರಲ್ ತೆರಪಿಯ ಅನುಪಸ್ಥಿತಿಯಲ್ಲಿ, HIV ಸೋಂಕು ಮುಂದುವರಿದು AIDSಗೆ ಪರಿವರ್ತನೆಯಾಗುವ ನಡುವಣ ಅವಧಿ ಒಂಭತ್ತರಿಂದ ಹತ್ತು ವರ್ಷಗಳಿರುತ್ತದೆ, ಮತ್ತು AIDS ಬಂದ ನಂತರ ಸೋಂಕಿತ ವ್ಯಕ್ತಿ ಹೆಚ್ಚೆಂದರೆ 9.2 ತಿಂಗಳುಗಳ ಕಾಲ ಬದುಕಬಹುದು.[೩೫] ಆದಾಗ್ಯೂ, ರೋಗದ ಪ್ರಗತಿಯಲ್ಲಿ ವ್ಯಕ್ತಿಯಿಂದ ವ್ಯಕ್ತಿಗೆ ವ್ಯಾಪಕವಾದ ವ್ಯತ್ಯಾಸಗಳಾಗಬಹುದು, ಎರಡು ವಾರಗಳಿಂದ 20 ವರ್ಷಗಳು ತಗುಲಬಹುದು ಎಂಬುದು ವೈದ್ಯಕೀಯ ಪ್ರಮಾಣಿತ.
ಎಚ್ಐವಿ ಸೋಂಕಿನ ಪ್ರಗತಿಗೆ ಅನೇಕ ಅಂಶಗಳು ಕಾರಣವಾಗಿವೆ. ಸೋಂಕಿತ ವ್ಯಕ್ತಿಗಳಲ್ಲಿ ಕೂಡ ಸಾಮಾನ್ಯವಾಗಿರುವ ರೋಗ ನಿರೋಧಕ ಕ್ರಿಯೆಗೆ, HIVಗೆ ವಿರುದ್ಧವಾಗಿ ಕಾರ್ಯನಿರ್ವಹಿಸುವ ದೈಹಿಕ ಸಾಮಾರ್ಥ್ಯವಿದ್ದರೂ, ಅದರ ಮೇಲೆ ಈ ಅಂಶಗಳು ಪ್ರಭಾವ ಬೀರುತ್ತವೆ. [೩೬][೩೭]
ವಯಸ್ಸಾದವರಲ್ಲಿ ಬಲಹೀನ ನಿರೋಧಕ ವ್ಯವಸ್ಥೆಗಳಿರುತ್ತವೆ ಮತ್ತು ಇದರಿಂದಾಗಿ ಸೋಂಕು ಕ್ಷಿಪ್ರ ಗತಿಯಲ್ಲಿ ದೇಹವನ್ನು ಆವರಿಸಿಕೊಳ್ಳುವ ಅಪಾಯಗಳು ಹೆಚ್ಚು, ಆದರೆ ಯುವ ಜನರಲ್ಲಿ ಈ ಸಾಧ್ಯತೆಗಳು ಕಡಿಮೆ. ಆರೋಗ್ಯ ಪಾಲನೆಗೆ ಬೇಕಾದ ಸೌಲಭ್ಯಗಳ ಕೊರತೆ ಮತ್ತು ಕ್ಷಯದಂತಹ ಸೋಂಕುಗಳ ಸಹ-ಅಸ್ತಿತ್ವ ಇತ್ಯಾದಿ ಅಂಶಗಳು ರೋಗ ವರ್ಧನೆಗೆ ಕಾರಣವಾಗಬಹುದು. [೩೫][೩೮][೩೯]
ಸೋಂಕಿತ ವ್ಯಕ್ತಿಯ ಜೀನುಗಳ ಅನುವಂಶಿಕತೆ ಈ ನಿಟ್ಟಿನಲ್ಲಿ ಪ್ರಮುಖ ವಾತ್ರ ವಹಿಸುತ್ತದೆ ಮತ್ತು ಕೆಲವು ಮಂದಿ HIVಯ ನಿರ್ದಿಷ್ಟ ಎಳೆಗಳನ್ನು ವಿರೋಧಿಸುವ(ನಿರೋಧಕ) ಸಾಮಾರ್ಥ್ಯ ಹೊಂದಿರುತ್ತಾರೆ. ಇದಕ್ಕೆ ಒಂದು ಉದಾಹರಣೆಯೆಂದರೆ ಹೊಮೊಜೈಗಸ್ CCR5-Δ32 ಮಾರ್ಪಾಡುಗಳನ್ನು ಹೊಂದಿರುವ ಜನರು HIVಯ ನಿರ್ದಿಷ್ಟ ಎಳೆಗಳನ್ನು ಮೆಟ್ಟಿ ನಿಲ್ಲುವ ಸಾಮಾರ್ಥ್ಯ ಹೊಂದಿರುತ್ತಾರೆ. [೪೦]
HIVಯು ಜೀನುಗಳ ಆಧಾರದ ಮೇಲೆ ಮಾರ್ಪಾಡಾಗಬಹುದಾಗಿದ್ದು, ಮತ್ತು ವಿವಿಧ ಎಳೆಗಳಾಗಿ ಅದು ಅಸ್ತಿತ್ವದಲ್ಲಿರುತ್ತವೆ, ಇದರಿಂದಾಗಿ ರೋಗದ ಪ್ರಗತಿ ಕುರಿತ ವೈದ್ಯಕೀಯ ಪ್ರಮಾಣಗಳಲ್ಲಿ ವ್ಯತ್ಯಾಸಗಳಾಗಬಹುದು
ಲೈಂಗಿಕ ಹರಡುವಿಕೆ
ಒಬ್ಬ ವ್ಯಕ್ತಿಯು ಲೈಂಗಿಕವಾಗಿ ಇನ್ನೊರ್ವ ಸೋಂಕಿತ ವ್ಯಕ್ತಿಯ ಲೈಂಗಿಕ ಸ್ರಾವ ಅಂಗಗಳಾದ ಗುದನಾಳ, ಜನನಾಂಗ ಅಥವಾ ಮುಖದ ಲೋಳೆಯ ಪೊರೆಗಳ ಸಂಪರ್ಕಕ್ಕೆ ಬಂದಾಗ ಸೋಂಕು ಹರಡಬಹುದು. ಸುರಕ್ಷಿತವಲ್ಲದ ಕ್ಷಿಪ್ರಗ್ರಾಹಿ ಲೈಂಗಿಕ ಕ್ರಿಯೆಗಳು, ಸುರಕ್ಷಿತವಲ್ಲದ ಸಂಭೋಗ ಕ್ರಿಯೆಗಳಿಗಿಂತ ಅಪಾಯಕಾರಿ. ಯೋನಿ ಸಂಭೋಗ ಅಥವಾ ಮುಖ ಮೈಥುನಕ್ಕೆ ಹೋಲಿಸಿದಲ್ಲಿ ಗುದ ಸಂಭೋಗದಲ್ಲಿ HIV ಸೋಂಕು ಹರಡುವ ಅಪಾಯಗಳು ಹೆಚ್ಚು. ಆದಾಗ್ಯೂ, ಮುಖ ಮೈಥುನ ಸಂಪೂರ್ಣ ಸುರಕ್ಷಿತವಲ್ಲ, ಒಳಸೇರಿಸುವಿಕೆ ಮತ್ತು ಕ್ಷಿಪ್ರಗ್ರಾಹಿ ಮುಖ ಮೈಥುನದ ಮೂಲಕವೂ HIV ಹರಡಬಹುದು. [೪೪][೪೫] ಕಾಂಡೊಮ್‌ಗಳ ಬಳಕೆ ಅಪರೂಪವಾಗಿರುವುದರಿಂದ ಲೈಂಗಿಕ ಅತ್ಯಾಚಾರದ ವೇಳೆ HIV ಹರಡುವ ಅಪಾಯದ ಸಾಧ್ಯತೆಗಳು ಹೆಚ್ಚಿದೆ ಮತ್ತು ಯೋನಿಗೆ ಅಥವಾ ಗುದ ನಾಳಕ್ಕಾಗುವ ನಿರಂತರ ಹಾನಿ HIV ಹರಡುವಿಕೆಯನ್ನು ಸುಲಭ ಮಾಡುತ್ತದೆ. [೪೬]
ಇತರೆ ಲೈಂಗಿಕವಾಗಿ ಹರಡುವ ಸೋಂಕುಗಳು HIV ಹರಡುವಿಕೆ ಮತ್ತು ಸೋಂಕಿನ ಅಪಾಯವನ್ನು ಹೆಚ್ಚಿಸುತ್ತವೆ, ಏಕೆಂದರೆ ಇದರಿಂದ ಜನನಾಂಗದಲ್ಲಿ ಹುಣ್ಣಾಗಿ ಮತ್ತು/ಅಥವಾ ಸಣ್ಣ ಹುಣ್ಣಾಗಿ ಸಾಮಾನ್ಯ ಎಪಿತೀಲಿಯಲ್ ಕ್ರಿಯೆಗೆ ಅಡ್ಡಿಯಾಗುತ್ತದೆ; ಮತ್ತು ವೀರ್ಯ ಮತ್ತು ಯೋನಿ ಸ್ರಾವದಲ್ಲಿ HIV-ಗೆ ಎಡೆಮಾಡಿಕೊಡುವ ಅಥವಾ HIV-ಸೋಂಕಿತ ಜೀವಕೋಶಗಳು(ಲಿಂಫೋಸೈಟ್ಸ್ ಮತ್ತು ಮ್ಯಾಕ್ರೋಫೇಜಸ್)ಪ್ರವಾಹೋಪಾದಿಯಲ್ಲಿ ಶೇಖರಣೆಯಾಗುವುದರಿಂದ ಸೋಂಕಿನ ಅಪಾಯ ಹೆಚ್ಚುತ್ತದೆ.ಮೇಹರೋಗ ಮತ್ತು/ಅಥವಾಮೇಹವ್ರಣದಿಂದ ಉಂಟಾಗುವ ಜನನಾಂಗದ ಹುಣ್ಣುಗಳು HIV ಸೋಂಕಿಗೊಳಗಾಗುವ ಅಪಾಯವನ್ನು ನಾಲ್ಕುಪಟ್ಟಿನಷ್ಟು ಹೆಚ್ಚಿಸುತ್ತದೆ ಎಂದು ಆಫ್ರಿಕಾದ ಉಪ-ಸಹರಾ, ಯುರೋಪ್ ಮತ್ತು ಉತ್ತರ ಅಮೆರಿಕಾದಲ್ಲಿ ನಡೆಸಿದ ಸಾಂಕ್ರಾಮಿಕ ಶಾಸ್ತ್ರ ಅಧ್ಯಯನಗಳು ತಿಳಿಸಿವೆ. ಇದಲ್ಲದೆ ಮಹತ್ವದ್ದಾಗಿದ್ದರೂ, ಸ್ಥಳೀಯವಾಗಿ ಲಿಂಫೋಸೈಟ್ಸ್ ಮತ್ತು ಮ್ಯಾಕ್ರೋಫೇಜ್ ಶೇಖರಣೆಗೆ ಕಾರಣವಾಗುವ STI ಗಳಾದ ಗೊನೊರಿಯಾ(ಶುಕ್ಲಮೇಹ ರೋಗ), ಕ್ಲಾಮಿಡಿಯಾ ಮತ್ತು ಟ್ರೈಕೊಮೊನಿಯಾಸಿಸ್‌ಗಳಿಂದ ಹೆಚ್ಚಿನ ಅಪಾಯವಿಲ್ಲ.[೪೭]
ಮೂಲ ಪ್ರಕರಣದ ಸೋಂಕು ಹರಡುವ ಸ್ವಭಾವ ಮತ್ತು ಸೋಂಕಿತಗೊಳ್ಳದ ಜತೆಗಾರನ ಮನಸ್ಸನ್ನು HIV ಹರಡುವಿಕೆ ಅವಲಂಬಿಸಿದೆ. ಅನಾರೋಗ್ಯದ ಸಮಯದಲ್ಲಿ ರೋಗ ಹರಡುವ ಗುಣ ಸ್ವಭಾವದಲ್ಲಿ ವ್ಯತ್ಯಾಸಗಳಾಗಬಹುದು ಮತ್ತು ವ್ಯಕ್ತಿಗಳ ಮಧ್ಯೆ ಅದು ಸ್ಥಿರವಲ್ಲ. ವೈರಸ್‌ಗಳಿಂದ ಭರ್ತಿಯಾದ ಪ್ಲಾಸ್ಮಾ ವೈದ್ಯಕೀಯ ತಪಾಸಣೆ ವೇಳೆ ಪತ್ತೆಯಾಗದಿದ್ದಲ್ಲಿ, ಅದು ವೀರ್ಯದ ದ್ರವ ಅಥವಾ ಜನನಾಂಗದ ಸ್ರಾವದಲ್ಲಿ ಕಡಿಮೆ ವೈರಸ್‌ಗಳಿರುವ ಸೂಚನೆಯಾಗಲೇಬೇಕೆಂದೇನಿಲ್ಲ. ಆದಾಗ್ಯೂ, ರಕ್ತದಲ್ಲಿ HIV ಮಟ್ಟ ಪ್ರತಿ 10-ಪಟ್ಟು ಏರಿಕೆಗೂ, HIV ಹರಡುವಿಕೆ ಪ್ರಮಾಣದಲ್ಲಿ 81% ಹೆಚ್ಚಳವಾಗುವುದಕ್ಕೂ ಒಂದಕ್ಕೊಂದು ಸಂಬಂಧವಿದೆ.[೪೭][೪೮]
ಹಾರ್ಮೋನಿನಲ್ಲಾಗುವ ಬದಲಾವಣೆಗಳು, ಯೋನಿಯ ಸೂಕ್ಷಜೀವಾಣು ಪರಿಸರ ವಿಜ್ಞಾನ ಮತ್ತು ಶರೀರ ವಿಜ್ಞಾನದಿಂದಾಗಿ ಮಹಿಳೆಯರು ಹೆಚ್ಚಾಗಿ HIV-1 ಸೋಂಕಿಗೆ ಒಳಗಾಗುತ್ತಾರೆ, ಮತ್ತು ಲೈಂಗಿಕವಾಗಿ ಹರಡುವ ರೋಗಗಳ ಪ್ರಮಾಣ ಮಹಿಳೆಯರಲ್ಲಿ ಹೆಚ್ಚಿರುತ್ತದೆ.[೪೯][೫೦]
HIVಯ ಒಂದು ಎಳೆಯ ಸೋಂಕಿಗೆ ತುತ್ತಾದ ಮಂದಿ ಮುಂದೆಯೂ, ಹೆಚ್ಚು ತೀವ್ರವಾದ ಎಳೆಗಳನ್ನು ಹೊಂದಿರುವ ಜೀವಿಗಳ ಸಂಪರ್ಕಕ್ಕೆ ಬರುವುದರಿಂದ HIV ಸೋಂಕಿಗೆ ಒಳಗಾಗಬಹುದು. ಕೇವಲ ಒಂದೇ ಘಟನೆಯಿಂದ ಸೋಂಕು ತಗುಲುವ ಸಾಧ್ಯತೆಗಳು ತೀರಾ ವಿರಳ. ದೀರ್ಘ-ಕಾಲದಿಂದ ಅತಿಕ್ರಮ ಲೈಂಗಿಕ ಸಂಬಂಧಗಳನ್ನು ಹೊಂದಿರುವವರಲ್ಲೇ ಸೋಂಕಿನ ಪ್ರಮಾಣಗಳು ಹೆಚ್ಚು. ಈ ತೆರನಾದ ಸಂಬಂಧಗಳು ಕ್ಷಿಪ್ರ ಗತಿಯಲ್ಲಿ ಬಹುಮಂದಿಗೆ ವೈರಸ್ ಹರಡಲು ಅನುವು ಮಾಡಿಕೊಡುತ್ತವೆ, ಅಲ್ಲದೆ ಜತೆಗಾರರಿಗೂ ಸೋಂಕು ಹರಡುತ್ತದೆ. ನಿಯತ ಏಕಪತ್ನೀತ್ವ ಯಾ ಏಕಪತೀತ್ವದ ಮಾದರಿ ಅಥವಾ ಅಪರೂಪದ ಸಾಂದರ್ಭಿಕ ಭೇಟಿಗಳು ಸೋಂಕಿನ ಪ್ರಮಾಣವನ್ನು ಕಡಿಮೆಗೊಳಿಸುತ್ತವೆ.[೫೧]
ಆಫ್ರಿಕಾದಲ್ಲಿ HIV ಭಿನ್ನಲಿಂಗಕಾಮಿಗಳ ಸಂಭೋಗದ ಮೂಲಕ ಅನಾಯಾಸವಾಗಿ ಹರಡುತ್ತಿದೆ, ಆದರೆ ಇತರ ದೇಶಗಳಲ್ಲಿ ಇಲ್ಲ. ಸಂಶೋಧನೆಗಳಲ್ಲಿ ತಿಳಿದು ಬಂದ ಒಂದು ಸಾಧ್ಯತೆಯೆಂದರೆ, ಆಫ್ರಿಕಾದ ಕೆಲವು ಭಾಗಗಳ ಶೇಕಡ 50ರಷ್ಟು ಮಹಿಳೆಯರಿಗೆ ತಗುಲಿರುವ ಸಿಸ್ಟೊಸೋಮಿಯಾಸಿಸ್ ಸೋಂಕು ಯೋನಿಯ ಒಳಪದರಕ್ಕೆ ಹಾನಿ ಮಾಡಿದೆ
ರಕ್ತದ ಮೂಲಕ ಹರಡುವ ರೋಗಜನಕಗಳು
ಮಾದಕ ದ್ರವ್ಯಗಳ ಬಳಕೆ, ಹೆಮೊಫಿಲಿಯಾಕ್ಸ್‌, ರಕ್ತದಾನ ಮತ್ತು ಅದರ ಉತ್ಪನ್ನಗಳನ್ನು ಸ್ವೀಕರಿಸುವ ಮಂದಿಗೆ ಸೋಂಕು ಹರಡುವಿಕೆಯ ಈ ಮಾರ್ಗಗಳು ನಿರ್ದಿಷ್ಟವಾಗಿ ಪ್ರಸ್ತುತವಾಗಿರುತ್ತದೆ. HIV-ಸೋಂಕಿತ ರಕ್ತದ ಕಲೆಗಳನ್ನು ಹೊಂದಿರುವ ಪಿಚಕಾರಿ(ಸಿರಿಂಜ್)ಗಳ ಹಂಚಿಕೆ ಮತ್ತು ಪುನರ್ ಬಳಕೆಯಿಂದ HIV ಸೋಂಕು ಅಂಟಿಕೊಳ್ಳುವ ಅಪಾಯಗಳಿವೆ. ಉತ್ತರ ಅಮೆರಿಕಾ, ಚೀನಾ ಮತ್ತು ಪೂರ್ವ ಯುರೋಪ್‌ನಲ್ಲಿ ಹೊಸದಾಗಿ ಪತ್ತೆಯಾದ ಮೂರನೇ ಒಂದು ಭಾಗದಷ್ಟು HIV-ಸೋಂಕುಗಳಿಗೆ ಸೂಜಿ ಹಂಚಿಕೆಯೇ ಪ್ರಮುಖ ಕಾರಣವೆಂದು ತಿಳಿದು ಬಂದಿದೆ.
HIV-ಸೋಂಕಿತ ವ್ಯಕ್ತಿಗೆ ಬಳಸಿದ ಸೂಜಿಯನ್ನು ಇನ್ನೊರ್ವನಿಗೆ ಒಮ್ಮೆ ಚುಚ್ಚುವುದರಿಂದ HIV ಸೋಂಕು ತಗುಲುವ ಅಪಾಯ 150 ಜನರಲ್ಲಿ 1 ಇರಬಹುದು ಎಂದು ಅಂದಾಜಿಸಲಾಗಿದೆ (ಮೇಲಿನ ಟೇಬಲ್ ನೋಡಿ). ಸೋಂಕಿಗೊಳಗಾದ ನಂತರ ರೋಗ ನಿರೋಧಕ ಚಿಕಿತ್ಸೆಗಾಗಿ HIV-ನಿರೋಧಕ ಔಷಧಗಳನ್ನು ಸೇವಿಸುವುದರಿಂದ ಅಪಾಯದ ಸಾಧ್ಯತೆಗಳನ್ನು ಕಡಿಮೆಗೊಳಿಸಬಹುದು. [೫೪]
ಟಟೂಗಳು(ಹಚ್ಚೆ) ಮತ್ತು ಚುಚ್ಚುವಿಕೆಗಳನ್ನು ಕೊಡುವ ಮತ್ತು ಸ್ವೀಕರಿಸುವ ಜನರಲ್ಲೂ ಸೋಂಕು ಹರಡಲು ಮೇಲಿನ ಮಾರ್ಗಗಳು ಕಾರಣವಾಗಬಹುದು. ಸೋಂಕು ತಗುಲದಂತೆ ಮುನ್ನೆಚ್ಚರಿಕೆ ವಹಿಸಲು ಅವಶ್ಯವಾದ ವಸ್ತುಗಳ ಪೂರೈಕೆ ಮತ್ತು ಅಸಮರ್ಪಕ ತರಬೇತಿಯ ಕೊರತೆಯಿಂದಾಗಿ ಆಫ್ರಿಕಾದ ಉಪ-ಸಹರಾ ಮತ್ತು ಏಷ್ಯಾದ ಹೆಚ್ಚಿನೆಡೆಗಳಲ್ಲಿ ಸಾರ್ವತ್ರಿಕ ಮುನ್ನೆಚ್ಚರಿಕೆ ಕ್ರಮಗಳನ್ನು ಸಾಧಾರಣವಾಗಿ ಯಾರೂ ಅನುಸರಿಸುತ್ತಿಲ್ಲ.
ಆಫ್ರಿಕಾದ ಉಪ-ಸಹರಾದಲ್ಲಿ ಸುಮಾರು 2.5%ರಷ್ಟು HIV ಸೋಂಕು ಹರಡುವಿಕೆಗೆ ಸುರಕ್ಷಿತವಲ್ಲದ ಇಂಜೆಕ್ಷನ್(ಚುಚ್ಚುಮದ್ದು)ಗಳು ಕಾರಣವೆಂದು WHO ಅಂದಾಜಿಸಲಾಗಿದೆ.[೫೫]
ಇದೇ ಕಾರಣಕ್ಕಾಗಿ, ಆರೋಗ್ಯ ಕಾರ್ಯಕರ್ತರಿಂದ HIV ಹರಡದಂತೆ ಮುನ್ನೆಚ್ಚರಿಕೆ ಕ್ರಮಗಳನ್ನು ಅನುಷ್ಠಾನಕ್ಕೆ ತರಲು ಜಗತ್ತಿನ ಎಲ್ಲ ದೇಶಗಳಲ್ಲಿ ವಿಶ್ವ ಸಂಸ್ಥೆಯ ಸಾಮಾನ್ಯ ಸಭೆಯು ಕೋರಿದೆ.[೫೬] ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ರಕ್ತದಾನ ಸ್ವೀಕರಿಸುವವರಿಗೆ HIV ಹರಡುವ ಅಪಾಯಗಳು ತೀರಾ ಕಡಿಮೆ, ಏಕೆಂದರೆ ಅಲ್ಲಿ ರಕ್ತದಾನಿಗಳ ಆಯ್ಕೆಯಲ್ಲಿ ಸುಧಾರಣೆಯಾಗಿದೆ ಮತ್ತು HIV ಪರೀಕ್ಷೆಯನ್ನೂ ನಡೆಸಲಾಗುತ್ತಿದೆ. ಆದಾಗ್ಯೂ, WHO ಪ್ರಕಾರ, ಜಗತ್ತಿನ ಅತಿ ಹೆಚ್ಚು ಜನರಿಗೆ ಸುರಕ್ಷಿತ ರಕ್ತ ದೊರಕುತ್ತಿಲ್ಲ, ಅಲ್ಲದೆ ಜಗತ್ತಿನ 5% ರಿಂದ 10% ನಡುವಣ HIV ಸೋಂಕುಗಳಿಗೆ ಸೋಂಕಿತ ರಕ್ತ ಮತ್ತು ಅದರ ಉತ್ಪನ್ನಗಳ ವರ್ಗಾವಣೆಯೇ ಕಾರಣ
ಪ್ರಸವೋತ್ತರ ಕಾಲದ ಹರಡುವಿಕೆ
ಗರ್ಭಾವಸ್ಥೆಯ ಕೊನೆಯ ವಾರಗಳು ಮತ್ತು ಶಿಶು ಜನನದ ವೇಳೆ ಗರ್ಭಕೋಶ ದಲ್ಲಿ ತಾಯಿಯಿಂದ ಮಗುವಿಗೆ ವೈರಸ್ ಹರಡಬಹುದು. ಕೂಡಲೇ ಸರಿಯೂದ ಚಿಕಿತ್ಸೆ ಲಭ್ಯವಾಗದೇ ಹೋದಲ್ಲಿ, ತಾಯಿ ಮತ್ತು ಆಕೆಯ ಮಗುವಿನ ನಡುವೆ ಗರ್ಭಾವಸ್ಥೆ, ಜನ್ಮಸ್ಥಾನ ಮತ್ತು ಹೆರಿಗೆಯ ವೇಳೆ ಹರಡುವಿಕೆ ಪ್ರಮಾಣ 25% ಇರುತ್ತದೆ. ಆದಾಗ್ಯೂ, ತಾಯಿ ಆಂಟಿರೆಟ್ರೋವೈರಲ್ ತೆರಪಿ ಚಿಕಿತ್ಸೆ ಪಡೆಯುತ್ತಿದ್ದಲ್ಲಿ ಮತ್ತು ಶಸ್ತ್ರ ಚಿಕಿತ್ಸೆ ಮೂಲಕ ಹೆರಿಗೆಯಾದಲ್ಲಿ ವೈರಸ್ ಹರಡುವಿಕೆ ಪ್ರಮಾಣ ಕೇವಲ 1%.[೫೮] ಮಗು ಜನನದ ವೇಳೆ ತಾಯಿಯಲ್ಲಿ ವೈರಸ್‌ಗಳು ತುಂಬಿದ್ದರೆ, ಅವು ಮಗುವಿನ ಮೇಲೂ ಪ್ರಭಾವ ಬೀರುತ್ತವೆ, ತಾಯಿಯಲ್ಲಿ ಹೆಚ್ಚು ವೈರಸ್‌ಗಳಿದ್ದಲ್ಲಿ ಮಗುವಿಗೆ ಸೋಂಕು ತಗುಲುವ ಅಪಾಯಗಳೂ ಹೆಚ್ಚು. ಸ್ತನ್ಯಪಾನ ಕೂಡ ಸೋಂಕು ಹರಡುವಿಕೆಯ ಅಪಾಯಗಳನ್ನು 4%ರಷ್ಟು ಹೆಚ್ಚಿಸುತ್ತದೆ
ತಪ್ಪು ತಿಳಿವಳಿಕೆಗಳು
HIV/AIDS ಸುತ್ತ ಅನೇಕ ತಪ್ಪು ತಿಳಿವಳಿಕೆಗಳು ಹುಟ್ಟಿಕೊಂಡಿವೆ. AIDS ರೋಗಿಯ ಭೇಟಿ ಮಾತ್ರಕ್ಕೇ AIDS ಸೋಂಕು, ಕನ್ಯೆಯ ಸಂಭೋಗದಿಂದ ಏಡ್ಸ್ನಿಂದ ಮುಕ್ತ ಮತ್ತು ಸಲಿಂಗಕಾಮಿ ಪುರುಷರು ಹಾಗೂ ಮಾದಕ ವ್ಯಸನಿಗಳಿಗೆ ಮಾತ್ರ HIV ಅಂಟಿಕೊಳ್ಳುತ್ತದೆ ಎಂಬ ನಂಬಿಕೆಗಳು ಈ ಪೈಕಿ ಮೂರು ಸಾಮಾನ್ಯ ತಪ್ಪು ತಿಳಿವಳಿಕೆಗಳಾಗಿವೆ. ಸಲಿಂಗಕಾಮಿಯೊಂದಿಗೆ ಗುದ ಸಂಭೋಗದಿಂದ AIDS ಸೋಂಕು ಮತ್ತು ಶಾಲೆಗಳಲ್ಲಿ ಸಲಿಂಗಕಾಮ ಮತ್ತು HIV ಬಗ್ಗೆ ಮುಕ್ತ ಚರ್ಚೆ ನಡೆಸಿದರೆ ಸಲಿಂಗಕಾಮ ಮತ್ತು AIDS ಪ್ರಮಾಣ ಹೆಚ್ಚಬಹುದು ಎಂಬ ಭಾವನೆಗಳು ಇನ್ನಿತರ ತಪ್ಪು ತಿಳಿವಳಿಕೆಗಳಾಗಿವೆ
ರೋಗ-ಶರೀರ ವಿಜ್ಞಾನ
ಅಂತಿಮವಾಗಿ, HIVಯು CD4+ T ಸಹಾಯಕ ಲಿಂಫೋಸೈಟ್ಸ್‌ಗಳನ್ನು ಹೊರದೂಡಿ AIDSಗೆ ಕಾರಣವಾಗುತ್ತದೆ. ಇದು ನಿರೋಧಕ ವ್ಯವಸ್ಥೆಯನ್ನು ಬಲಹೀನಗೊಳಿಸಿ, ಅವಕಾಶವಾದಿ ಸೋಂಕುಗಳು ಅಂಟಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ನಿರೋಧಕ ವ್ಯವಸ್ಥೆಯ ಕಾರ್ಯನಿರ್ವಹಣೆಗೆ T ಲಿಂಫೋಸೈಟ್ಸ್ ಅವಶ್ಯ ಮತ್ತು ಅವುಗಳಿಲ್ಲದೆ ದೇಹಕ್ಕೆ ಸೋಂಕುಗಳೊಂದಿಗೆ ಹೋರಾಡಲು ಸಾಧ್ಯವಿಲ್ಲ ಅಥವಾ ಕ್ಯಾನ್ಸರ್ ಜನಕ ಜೀವಕೋಶಗಳನ್ನು ಕೊಲ್ಲಲೂ ಸಾಧ್ಯವಾಗದು. ರೋಗದ ತೀವ್ರತೆ ಮತ್ತು ದೀರ್ಘಕಾಲದಲ್ಲಿ ಮರುಕಳಿಕೆ ಈ ಎರಡು ಹಂತಗಳಲ್ಲೂ CD4+ T ಜೀವಕೋಶಗಳನ್ನು ಹೊರದೂಡುವ ಪ್ರಕ್ರಿಯೆಯಲ್ಲಿ ವ್ಯತ್ಯಾಸಗಳಾಗುತ್ತವೆ. [೬೨]
ತೀವ್ರ ಹಂತಕ್ಕೆ ತಲುಪಿದ ಸಂದರ್ಭದಲ್ಲಿ, HIV-ಪ್ರೇರಿತ ಜೀವಕೋಶ ವಿಭಜನೆಯಾಗುತ್ತದೆ(ಲೈಸಿಸ್) ಮತ್ತು CD4+ T ಜೀವಕೋಶಗಳ ನಿರ್ನಾಮಕ್ಕೆ ಕಾರಣವಾದ ಸೈಟೊಟಾಕ್ಸಿಕ್ T ಜೀವಕೋಶಗಳು ಸೋಂಕಿತ ಜೀವಕೋಶಗಳನ್ನು ಸಾಯಿಸುತ್ತವೆ. ಈ ಪ್ರಕ್ರಿಯೆಯಲ್ಲಿ ಅಪೊಪ್ಟೋಸಿಸ್ ಕೂಡ ಒಂದು ಅಂಶವಾಗಿರುವ ಸಾಧ್ಯತೆಗಳಿವೆ. ರೋಗ ಮರುಕಳಿಸುವ ಹಂತದಲ್ಲಿ, ನಿರೋಧಕ ವ್ಯವಸ್ಥೆಯ ವ್ಯಾಪ್ತಿ ಹೆಚ್ಚುವುದರಿಂದ ಸಕ್ರಿಯತೆ ಕಡಿಮೆಯಾಗಿ ಒಟ್ಟು ನಿರೋಧಕ ವ್ಯವಸ್ಥೆಯು ಕ್ರಮೇಣವಾಗಿ ಸಾಮಾರ್ಥ್ಯ ಕಳೆದುಕೊಳ್ಳುವುದು, ಅಲ್ಲದೆ ಹೊಸ T ಜೀವಕೋಶಗಳನ್ನು ಸೃಷ್ಟಿಸಲು ಅದು ಅಶಕ್ತವಾಗುವುದು. ಇದರಿಂದಾಗಿ CD4+ T ಜೀವಕೋಶಗಳ ಸಂಖ್ಯೆಯೂ ನಿಧಾನವಾಗಿ ಇಳಿಮುಖಗೊಳ್ಳುತ್ತದೆ. AIDSನ ಪ್ರಮುಖ ಲಕ್ಷಣವಾದ ರೋಗ ನಿರೋಧಕ ಶಕ್ತಿ ಹೀನತೆಯ ಲಕ್ಷಣಗಳು ಹಲವು ವರ್ಷಗಳ ಕಾಲ ಗೋಚರಿಸದೇ ಇದ್ದರೂ, ವ್ಯಕ್ತಿ ಸೋಂಕಿಗೆ ಒಳಗಾದ ನಂತರದ ಒಂದೇ ವಾರದಲ್ಲಿ ಬೃಹತ್ ಪ್ರಮಾಣದಲ್ಲಿ CD4+ T ಜೀವಕೋಶಗಳ ನಷ್ಟವಾಗುತ್ತದೆ. ಇದು ಪ್ರಮುಖವಾಗಿ ದೇಹದಲ್ಲಿನ ಹೆಚ್ಚಿನ ಲಿಂಫೋಸೈಟ್ಸ್‌ಗಳಿಗೆ ಆಶ್ರಯ ನೀಡಿರುವ ಕರುಳಿನ ಲೋಳೆ ಪೊರೆಯಲ್ಲಿ ಸಂಭವಿಸುತ್ತದೆ.[೬೩]
ಲೋಳೆ ಪೊರೆಯ CD4+ T ಜೀವಕೋಶಗಳ ಆದ್ಯತಾ ನಷ್ಟಕ್ಕೆ ಕಾರಣವೆನೇಂದರೆ ಹೆಚ್ಚಿನ ಲೋಳೆ ಪೊರೆಯ CD4+ T ಜೀವಕೋಶಗಳು CCR5 ಸಹಗ್ರಾಹಿಯನ್ನು ಸ್ರವಿಸುವುದು, ಇದಕ್ಕೆ ವಿರುದ್ಧವಾಗಿ ರಕ್ತಪ್ರವಾಹದಲ್ಲಿರುವ CD4+ T ಜೀವಕೋಶಗಳ ಒಂದು ಭಾಗ ಕೂಡ ಇದೇ ಕೆಲಸ ಮಾಡುತ್ತದೆ.[೬೪]
ರೋಗ ತೀವ್ರಗೊಂಡ ಸಂದರ್ಭದಲ್ಲಿ HIVಯು ಮುಂದೆ ಸಾಗಿ CD4+ ಜೀವಕೋಶಗಳನ್ನು ಸ್ರವಿಸಿ CCR5 ಅನ್ನು ನಾಶಪಡಿಸುತ್ತದೆ. ಕ್ರಮೇಣವಾಗಿ ನಿರೋಧಕ ವ್ಯವಸ್ಥೆಯ ಕ್ರಿಯಾಶೀಲ ಪ್ರತಿಕ್ರಿಯೆಯು ಸೋಂಕಿನ ಮೇಲೆ ಹಿಡಿತ ಸಾಧಿಸಿ, ಸೋಂಕನ್ನು ಸುಪ್ತ ಸ್ಥಿತಿಯತ್ತ ಒಯ್ಯುವುದು, ಈ ಸ್ಥಿತಿಯಲ್ಲಿ ಸೋಂಕು ಗಂಭೀರ ರೂಪದಲ್ಲಿ ಪ್ರಕಟಗೊಳ್ಳುವುದಿಲ್ಲ. ಆದಾಗ್ಯೂ, ಲೋಳೆ ಪೊರೆಯ ಅಂಗಾಶಗಳಲ್ಲಿರುವ CD4+ T ಜೀವಕೋಶಗಳು ಸೋಂಕಿನುದ್ದಕ್ಕೂ ಖಾಲಿಯಾಗುತ್ತಾ ಹೋಗುತ್ತವೆ, ಹೀಗಿದ್ದೂ ಮಾರಣಾಂತಿಕ ಸೋಂಕುಗಳೊಂದಿಗೆ ಹೋರಾಡುವುದಕ್ಕಾಗಿ ಸಾಕಷ್ಟು ಜೀವಕೋಶಗಳು ಅಲ್ಲೇ ಉಳಿದುಕೊಳ್ಳುತ್ತವೆ. ರೋಗದ ದೀರ್ಘಾವಧಿಯಲ್ಲಿ ನಿರೋಧಕ ವ್ಯವಸ್ಥೆಯು ಕ್ರಿಯಾಶೀಲವಾಗಿರದೆ ಸಾಮಾನ್ಯ ಸ್ಥಿತಿಯಲ್ಲಿದ್ದರೆ HIV ಸೋಂಕಿನ ನಕಲುಗಳು ನಿರಂತರವಾಗಿ ಹುಟ್ಟಿಕೊಳ್ಳುತ್ತಿರುತ್ತವೆ.[೬೫] ನಿರೋಧಕ ಜೀವಕೋಶಗಳು ಹೆಚ್ಚು ಸಕ್ರಿಯಗೊಂಡು, ಹಲವು HIV ಜೀನು ಉತ್ಪನ್ನಗಳ ಚಟುವಟಿಕೆ ಮತ್ತು ಪ್ರಗತಿಯಲ್ಲಿರುವ HIV ನಕಲುಗಳಿಗೆ ನಿರೋಧಕ ವ್ಯವಸ್ಥೆಯ ಪ್ರತಿಕ್ರಿಯೆಯಿಂದಾಗಿ ಪ್ರಚೋದಕ ಸೈಟೋಕಿನ್ಸ್‌‌ಗಳು ಬಿಡುಗಡೆಯಾಗುವುದರಿಂದ ಒಟ್ಟು ನಿರೋಧಕ ವ್ಯವಸ್ಥೆ ಚುರುಕಾಗುತ್ತದೆ.
ರೋಗ ತೀವ್ರ ಸ್ವರೂಪಕ್ಕೆ ತಿರುಗಿದಾಗ ಲೋಳೆ ಪೊರೆಯಲ್ಲಿ CD4+ T ಜೀವಕೋಶಗಳು ಬರಿದಾಗುವುದಕ್ಕೆ ಲೋಳೆ ಪೊರೆಯಲ್ಲಿನ ತಡೆಯ ನಿರೋಧಕ ಕಣ್ಗಾವಲು ವ್ಯವಸ್ಥೆಯ ವೈಫಲ್ಯ ಇನ್ನೊಂದು ಕಾರಣ.[೬೬]
ಪರಿಣಾಮವಾಗಿ ಕರುಳಿನ ಸಾಮಾನ್ಯ ಪರಿಸರದಲ್ಲಿರುವ ಸೂಕ್ಷ್ಮಜೀವಿಗಳಿಗೆ ದೇಹದ ನಿರೋಧಕ ವ್ಯವಸ್ಥೆಯನ್ನು ಇಡೀಯಾಗಿ ಒಡ್ಡಿದಂತಾಗುತ್ತದೆ. ಆದರೆ ಆರೋಗ್ಯಕರ ವ್ಯಕ್ತಿಯಲ್ಲಿ ಇದರ ಮೇಲೆ ಲೋಳೆ ಪೊರೆಯ ನಿರೋಧಕ ವ್ಯವಸ್ಥೆ ನಿಗಾ ಇಟ್ಟಿರುತ್ತದೆ. ನಿರೋಧಕ ಸಾಮಾರ್ಥ್ಯದ ಸಕ್ರಿಯಕರಣವು HIV ಸೋಂಕಿಗೆ ಹೊಸ ಸ್ಥಳಾವಕಾಶಗಳನ್ನು ಒದಗಿಸಿದಾಗ T ಜೀವಕೋಶಗಳು ಕ್ರಿಯಾಶೀಲವಾಗುತ್ತವೆ ಮತ್ತು ಅವುಗಳ ಸಂತಾನೋತ್ಪತ್ತಿಯಾಗುತ್ತದೆ. ಆದಾಗ್ಯೂ, ಗಮನಾರ್ಹ ರೀತಿಯಲ್ಲಿ CD4+ T ಜೀವಕೋಶಗಳ ಬರಿದಾಗುವಿಕೆಗೆ, HIV ಮಾತ್ರ ಹೊಣೆಯಾಗಲಾರದು, ಏಕೆಂದರೆ ರಕ್ತದ CD4+ T ಜೀವಕೋಶಗಳಲ್ಲಿ 0.01–0.10%ರಷ್ಟು ಮಾತ್ರ ಸೋಂಕಿಗೊಳಗಾಗಿವೆ. ನಿರೋಧಕ ವ್ಯವಸ್ಥೆಯು ಕ್ರಿಯಾಶೀಲವಾಗಿದ್ದ ವೇಳೆಯೇ ಅಪೊಪ್ಟೋಸಿಸ್ ಪ್ರಭಾವಕ್ಕೆ CD4+ T ಜೀವಕೋಶಗಳ ಒಳಗಾಗುವ ಸಾಧ್ಯತೆಗಳು ಹೆಚ್ಚುವುದೇ ಅವುಗಳ (CD4+ T ಜೀವಕೋಶಗಳು) ನಷ್ಟಕ್ಕೆ ಪ್ರಮುಖ ಕಾರಣವೆಂದು ಮೇಲ್ನೋಟಕ್ಕೆ ಕಂಡು ಬಂದಿದೆ. ನಷ್ಟವಾದ T ಜೀವಕೋಶಗಳನ್ನು ತುಂಬುವ ನಿಟ್ಟಿನಲ್ಲಿ ತೈಮಸ್‌ ಗ್ರಂಥಿಯು ನಿರಂತರವಾಗಿ ಹೊಸ T ಜೀವಕೋಶಗಳನ್ನು ಉತ್ಪಾದಿಸುತ್ತಿದ್ದರೂ, ಅದರ ತೈಮೊಸೈಟ್ಸ್‌ಗಳಿಗೆ ನೇರವಾಗಿ HIV ಸೋಂಕುಂಟಾಗುವುದರಿಂದ ತೈಮಸ್‌ನ ಪುನರುತ್ಪಾದನಾ ಸಾಮಾರ್ಥ್ಯ ನಿಧಾನವಾಗಿ ಕ್ಷೀಣಿಸುತ್ತದೆ. ಕ್ರಮೇಣವಾಗಿ, ನಿರೋಧಕ ಸಾಮಾರ್ಥ್ಯವನ್ನು ಉಳಿಸಿಕೊಳ್ಳಲು ಅವಶ್ಯಕವಾಗಿರುವ ಕನಿಷ್ಠ ಸಂಖ್ಯೆಯ CD4+ T ಜೀವಕೋಶಗಳೂ ನಾಶವಾಗಿ AIDSಗೆ ಕಾರಣವಾಗುತ್ತದೆ.
ಪರಿಣಾಮಕ್ಕೊಳಗಾದ ಜೀವಕೋಶಗಳು
ವೈರಸ್ ಯಾವುದೇ ಮಾರ್ಗದಿಂದ ದೇಹವನ್ನು ಪ್ರವೇಶಿಸಿದರೂ, ಮೊದಲು ಈ ಕೆಳಗಿನ ಜೀವಕೋಶಗಳ ಮೇಲೆ ಪ್ರಭಾವ ಬೀರುತ್ತದೆ:[೬೭]
ಲಿಂಫೋರೆಟಿಕುಲರ್ ವ್ಯವಸ್ಥೆ:
CD4+ T-ಸಹಾಯಕ ಜೀವಕೋಶಗಳು
ಮ್ಯಾಕ್ರೋಫೇಜ್ (ದೊಡ್ಡ ಗಾತ್ರದ ಬಿಳಿಯ ರಕ್ತಕಣ)
ಮೊನೊಸೈಟ್‌ಗಳು
B-ಲಿಂಫೋಸೈಟ್ಸ್
ನಿರ್ಧಾರಿತ ಎಂಡೋಥೆಲಿಯಾಲ್ ಜೀವಕೋಶಗಳು
ಕೇಂದ್ರ ನರವ್ಯೂಹ ವ್ಯವಸ್ಥೆ:
ನರವ್ಯೂಹ ವ್ಯವಸ್ಥೆಯ ಮೈಕ್ರೊಗ್ಲಿಯಾ
ಆಸ್ಟ್ರೋಸೈಟ್ಸ್
ಒಲಿಗೊಡೆಂಡ್ರೋಸೈಟ್ಸ್
ನ್ಯೂರಾನ್ಸ್ – ಸೈಟೋಕಿನ್ಸ್‌‌ನಿಂದ ಪರೋಕ್ಷವಾಗಿ ಮತ್ತು gp-120
ಪರಿಣಾಮ
ವೈರಸ್ ಸೈಟೋಬಪಾತಿಕ್ ಪರಿಣಾಮಗಳನ್ನು ಹೊಂದಿವೆ, ಆದರೆ ಅದು ಹೇಗೆ ಎಂಬುದು ಇನ್ನೂ ಪೂರ್ಣ ಸ್ಪಷ್ಟವಾಗಿಲ್ಲ. ಮೇಲಿನ ಜೀವಕೋಶಗಳಲ್ಲಿ ವೈರಸ್ ದೀರ್ಘಾವಧಿಯವರೆಗೆ ನಿಷ್ಕ್ರಿಯವಾಗಿರಬಹುದು, ಆದರೂ CD4-gp120ರ ಪಾರಸ್ಪರಿಕ ಕ್ರಿಯೆಗಳಿಂದಾಗಿ ಇದರ ಪರಿಣಾಮವನ್ನು ಊಹನೆ ಮಾಡಿಕೊಳ್ಳಲಾಗಿದೆ.[೬೭]
HIV ವೈರಸ್ ಅತ್ಯಂತ ಪ್ರಮುಖ ಪರಿಣಾಮವೆಂದರೆ, ಅದರ T-ಸಹಾಯಕ ಜೀವಕೋಶದ ನಿಗ್ರಹ ಮತ್ತು ವಿಭಜನೆ
ಜೀವಕೋಶ ಸರಳವಾಗಿ ಕೊಲ್ಲಲ್ಪಡುತ್ತದೆ ಅಥವಾ ಕಾರ್ಯನಿರ್ವಹಿಸಲು ಸಾಧ್ಯವಾಗದ ರೀತಿಯಲ್ಲಿ ಅದನ್ನು ಅಸ್ತವ್ಯಸ್ತಗೊಳಿಸಲಾಗುತ್ತದೆ (ಪರದೇಶಿ ಪ್ರತಿಜನಕಗಳಿಗೆ ಅವು ಪ್ರತಿಕ್ರಿಯಿಸಲಾರವು). ಸೋಂಕಿತ B-ಜೀವಕೋಶಗಳು ಸಾಕಷ್ಟು ಪ್ರತಿವಿಷ ಅಥವಾ ಪ್ರತಿಕಾಯವನ್ನು(ಆಂಟಿಬಡೀಸ್) ಉತ್ಪಾದಿಸಲಾರವು. ಹೀಗೆ ನಿರೋಧಕ ವ್ಯವಸ್ಥೆ ಪತನಗೊಂಡು ಸೋಂಕುಗಳು ಮತ್ತು ಗಡ್ಡೆ (ವೈಡಿ ಸೂಪ್ರ) ಗಳಂತಹ ಸಾಮಾನ್ಯ AIDS ಜಟಿಲತೆಗಳು ಉಂಟಾಗುತ್ತದೆ.
CNS ಜೀವಕೋಶಗಳಿಗೆ ಸೋಂಕು ತಗುಲಿದಲ್ಲಿ ತೀವ್ರ ಸ್ವರೂಪದ ಎಸೆಪ್ಟಿಕ್ ಮೆನಿಂಜಿಟಿಸ್, ಸಾಧಾರಣ ತೀವ್ರತೆ ಹೊಂದಿರುವ ಎನ್ಸೆಪಲೈಟಿಸ್, ವಕ್ಯುಲರ್ ಮೈಲೋಪತಿ ಮತ್ತು ಫೆರಿಫೆರಲ್ ನ್ಯೂರೋಪತಿಗೆ ಕಾರಣವಾಗಬಹುದು. ನಂತರ ಇದು ಏಡ್ಸ್ ಡಿಮೆನ್ಶಿಯಾ ಸಂಕೀರ್ಣತೆಗೂ ಕಾರಣವಾಗಬಹುದು.
CD4-gp120 ಪಾರಸ್ಪರಿಕ ಕ್ರಿಯೆ (ಮೇಲೆ ಓದಿ)ಇತರ ವೈರಸ್‌ಗಳಾದ ಸೈಟೊಮೆಗಾಲೊವೈರಸ್, ಹೆಪಟೈಟಿಸ್ ವೈರಸ್, ಹರ್ಪಿಸ್ ಸಿಂಪ್ಲೆಕ್ಸ್ ವೈರಸ್, ಇತ್ಯಾದಿ ಪ್ರವೇಶಿಸಲು ಅವಕಾಶ ಮಾಡಿಕೊಡಬಹುದು. ಈ ವೈರಸ್‌ಗಳಿಂದಾಗಿ ಜೀವಕೋಶಗಳು ಇನ್ನಷ್ಟು ಹಾನಿಗೊಳಗಾಗುತ್ತವೆ. i.e. ಸೈಟೋಪತಿ.
ರೋಗನಿರ್ಣಯ
ಕೆಲವು ನಿರ್ಧಾರಿತ ಚಿಹ್ನೆಗಳು ಅಥವಾ ರೋಗ-ಲಕ್ಷಣಗಳ ಅಸ್ತಿತ್ವದ ಆಧಾರದ ಮೇಲೆ HIV ಸೋಂಕಿತ ವ್ಯಕ್ತಿಗೆ AIDS ಇದೆಯೇ ಎಂದು ಪರೀಕ್ಷಿಸಲಾಗುತ್ತದೆ. ಜೂನ್ 5, 1981ರಿಂದ, ಸಾಂಕ್ರಾಮಿಕ ರೋಗಗಳ ಬಗ್ಗೆ ಎಚ್ಚರದಿಂದಿರುವ ಬಗ್ಗೆ ಅನೇಕ ವ್ಯಾಖ್ಯಾನಗಳು ಬಂದಿವೆ, ಅಂತಹವುಗಳಲ್ಲಿ ಬಾಂಗುಯಿ ವ್ಯಾಖ್ಯಾನ ಮತ್ತು 1994ರಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ ನೀಡಿದ AIDS ಪ್ರಕರಣದ ವ್ಯಾಖ್ಯಾನದ ವಿಸ್ತರಣೆ ಪ್ರಮುಖವಾದ್ದು. ಆದಾಗ್ಯೂ, ರೋಗಿಗಳನ್ನು ವೈದ್ಯಕೀಯ ತಪಾಸಣೆಗೊಳಪಡಿಸಿ ರೋಗಿ ಯಾವ ಹಂತದಲ್ಲಿದ್ದಾನೆಂದು ನಿರ್ಧರಿಸುವುದು ಈ ವ್ಯವಸ್ಥೆಗಳ ಉದ್ದೇಶವಾಗಿರಲಿಲ್ಲ, ಏಕೆಂದರೆ ಈ ವ್ಯವಸ್ಥೆಗಳು ಅಷ್ಟು ಸೂಕ್ಷ್ಮದ್ದೂ ಆಗಿರಲಿಲ್ಲ, ನಿರ್ದಿಷ್ಟವಾಗಿರಲೂ ಇಲ್ಲ. ವಿಶ್ವ ಆರೋಗ್ಯ ಸಂಸ್ಥೆಯು ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ಬಳಸಿದ ವೈದ್ಯಕೀಯ ಮತ್ತು ಪ್ರಯೋಗಲಾಯದ ವಿವರಗಳನ್ನು ಬಳಸಿಕೊಂಡು ಅಭಿವೃದ್ಧಿಶೀಲ ದೇಶಗಳಿಗಾಗಿ HIV ಸೋಂಕು ಮತ್ತು ರೋಗ ಮಾಪನ ವ್ಯವಸ್ಥೆಯನ್ನು ರೂಪಿಸಿತು, ಅಂತೆಯೇ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್(CDC) ವಿಭಾಗ ವ್ಯವಸ್ಥೆಯನ್ನು ಬಳಸಲಾಯಿತು.
WHO ರೋಗ ಮಾಪನ ವ್ಯವಸ್ಥೆ
1990ರಲ್ಲಿ, ವಿಶ್ವ ಆರೋಗ್ಯ ಸಂಸ್ಥೆ (WHO)ಯು ಈ ಸೋಂಕುಗಳು ಮತ್ತು ಪರಿಸ್ಥಿತಿಗಳನ್ನು ಒಟ್ಟಿಗೆ ಸೇರಿಸಿ HIV-1 ಸೋಂಕಿತ ರೋಗಿಗಳಿಗಾಗಿ ಮಾಪನ ವ್ಯವಸ್ಥೆಯನ್ನು ಪರಿಚಯಿಸಿತು.[೬೮] ಸೆಪ್ಟೆಂಬರ್ 2005ರಲ್ಲಿ ಇದನ್ನು ನವೀಕರಿಸಲಾಯಿತು. ಈ ಪೈಕಿ ಹೆಚ್ಚಿನ ಪರಿಸ್ಥಿತಿಗಳು ಅವಕಾಶವಾದಿ ಸೋಂಕುಗಳಿಂದ ಬಂದವುಗಳಾಗಿದ್ದು, ಆರೋಗ್ಯಕರ ಜನರಿಗೆ ಸುಲಭವಾಗಿ ಚಿಕಿತ್ಸೆ ನೀಡಬಹುದಾಗಿತ್ತು.
ಹಂತ I: HIV ಸೋಂಕಿಗೆ ಯಾವುದೇ ರೋಗ-ಲಕ್ಷಣಗಳಿಲ್ಲ ಮತ್ತು AIDS ಎಂದು ವರ್ಗೀಕರಿಸಲಾಗಿಲ್ಲ.
ಹಂತ II: ಚರ್ಮದ ಲೋಳೆ ಪೊರೆಯಲ್ಲಿನ ಸಣ್ಣ ಚಿಹ್ನೆಗಳು ಮತ್ತು ಪುನರಾವರ್ತಿತ ಮೇಲ್ಭಾಗದ ಶ್ವಾಸೇಂದ್ರಿಯ ಪ್ರದೇಶದ ಸೋಂಕುಗಳು ಇದರಲ್ಲಿ ಸೇರಿವೆ.
ಹಂತ III: ವಿವರಿಸಿಲ್ಲದ ತಿಂಗಳಿಗೂ ಮೀರಿ ಆಗಿಂದಾಗ್ಗೆ ಕಾಣಿಸಿಕೊಳ್ಳುವ ಅತಿಸಾರ ಭೇದಿ, ತೀವ್ರ ಸ್ವರೂಪದ ಬ್ಯಾಕ್ಟೀರಿಯಾದ ಸೋಂಕುಗಳು ಮತ್ತು ಶ್ವಾಸಕೋಶದ ಕ್ಷಯ ಇದರಲ್ಲಿ ಸೇರಿದೆ.
ಹಂತ IV: ಮಿದುಳಿನ ಟೊಕ್ಸೊಪ್ಲಾಸ್ಮೋಸಿಸ್, ಅನ್ನನಾಳ ಕ್ಯಾಂಡಿಡಿಯಾಸಿಸ್, ಶ್ವಾಸನಾಳದ ಸೋಂಕು, ಶ್ವಾಸನಳಿಕೆಯ ಅಥವಾ ಶ್ವಾಸಕೋಶಗಳ ಸೋಂಕು ಮತ್ತು ಕಾಪೊಸಿಯ ಸಾರ್ಕೋಮಾ; ಈ ರೋಗಗಳು AIDS ಸೂಚನೆಗಳಾಗಿವೆ.
CDC ವರ್ಗೀಕರಣ ವ್ಯವಸ್ಥೆ
AIDSಗೆ ಎರಡು ಪ್ರಮುಖ ವ್ಯಾಖ್ಯಾನಗಳಿದ್ದು, ಅವೆರಡನ್ನೂ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಟ್ ಪ್ರಿವೆನ್ಶನ್‌ (CDC) ರೂಪಿಸಿದೆ. ಮೊದಲಿನದ್ದರಲ್ಲಿ, AIDS ಜೊತೆಗೆ ಬರುವ ರೋಗಗಳನ್ನೂ ಸೇರಿಸಿಕೊಂಡು ಏಡ್ಸ್ ಕುರಿತು ವ್ಯಾಖ್ಯಾನ ನೀಡಲಾಗಿದೆ, ಉದಾಹರಣೆಗೆ HIVಯನ್ನು ಪತ್ತೆ ಹಚ್ಚಿದ ಮಂದಿಯೇ ವೈರಸ್‌ಗೆ ಮೂಲತಃ ಲಿಂಫಡಿನೋಪತಿ ರೋಗ ಎಂಬ ಹೆಸರಿಟ್ಟಿದ್ದರು.[೬೯][೭೦] 1993ರಲ್ಲಿ, CDCಯು ರಕ್ತದ ಪ್ರತಿ µLಗೆ 200ಕ್ಕೂ ಕಡಿಮೆ CD4+ T ಜೀವಕೋಶಗಳ ಸಂಖ್ಯೆ ಅಥವಾ ಒಟ್ಟು 14%ರಷ್ಟು ಲಿಂಫೋಸೈಟ್ಸ್‌ಗಳಿರುವ ಎಲ್ಲಾ HIV ಪಾಸಿಟಿವ್ ಹೊಂದಿರುವ ಜನರನ್ನು AIDS ವ್ಯಾಪ್ತಿಗೆ ತಂದು AIDS ಕುರಿತ ತನ್ನ ವ್ಯಾಖ್ಯಾನವನ್ನು ವಿಸ್ತರಿಸಿತು.[೭೧]
ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ಹೆಚ್ಚಿನ ಹೊಸ AIDS ಪ್ರಕರಣಗಳನ್ನು ಈ ವ್ಯಾಖ್ಯಾನದ ಆಧಾರದಲ್ಲಿ ನಿರ್ಧರಿಸಲಾಗುತ್ತದೆ ಇಲ್ಲವೇ 1993-ಪೂರ್ವದ CDC ವ್ಯಾಖ್ಯಾನದ ಆಧಾರದಲ್ಲಿ ನಿರ್ಣಯಿಸಲಾಗುತ್ತದೆ. ಸೂಕ್ತ ಚಿಕಿತ್ಸೆಯ ಬಳಿಕ ರಕ್ತದ ಪ್ರತಿ µLಗೆ CD4+ T ಜೀವಕೋಶಗಳ ಸಂಖ್ಯೆಯು 200ಕ್ಕಿಂತ ಮೇಲೆ ಏರಿದಲ್ಲಿ ಅಥವಾ AIDSಗೆ ಕಾರಣವಾಗುವ ಇತರೆ ಅನಾರೋಗ್ಯಗಳಿಂದ ಗುಣಮುಖಗೊಂಡ ಬಳಿಕವೂ ಏಡ್ಸ್ ಪರೀಕ್ಷೆಯನ್ನು ಮಾಡಲಾಗುತ್ತದೆ.
HIV ಪರೀಕ್ಷೆ
ತಾವು HIV ಸೋಂಕಿತರೆಂಬುದು ಹೆಚ್ಚಿನ ಜನರಿಗೆ ಗೊತ್ತಿರುವುದಿಲ್ಲ.[೭೨] ಆಫ್ರಿಕಾದ ನಗರ ನಿವಾಸಿಗಳಲ್ಲಿ ಲೈಂಗಿಕವಾಗಿ 1% ಕ್ಕಿಂತಲೂ ಕಡಿಮೆ ಕ್ರಿಯಾಶೀಲವಾಗಿರುವ ಮಂದಿಯನ್ನ್ನು HIV ಪರೀಕ್ಷೆಗೊಳಪಡಿಸಲಾಗಿದ್ದರೆ, ಈ ಪ್ರಮಾಣ ಗ್ರಾಮೀಣ ಪ್ರದೇಶದಲ್ಲಿ ಇನ್ನೂ ಕಡಿಮೆಯಿದೆ. ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, 0.5% ಗರ್ಭಿಣಿ ಮಹಿಳೆಯರು ಮಾತ್ರ ನಗರದ ಆರೋಗ್ಯ ಕೇಂದ್ರಗಳಿಗೆ ಭೇಟಿ ನೀಡಿ ಆರೋಗ್ಯ ಸಲಹೆ, ಪರೀಕ್ಷೆಗಳನ್ನು ಪಡೆದುಕೊಂಡಿದ್ದಾರೆ ಮತ್ತು ಆ ಸಂಬಂಧ ಫಲಿತಾಂಶಗಳನ್ನೂ ಪಡೆದಿದ್ದಾರೆ. ಆದರೆ ಈ ಪ್ರಮಾಣ ಗ್ರಾಮೀಣ ಪ್ರದೇಶದಲ್ಲಿನ ಆರೋಗ್ಯ ಕೇಂದ್ರಗಳಲ್ಲಿ ಕಡಿಮೆಯಿದೆ.[೭೨] ಆದ್ದರಿಂದಲೇ, ಔಷಧಗಳು ಮತ್ತು ವೈದ್ಯಕೀಯ ಸಂಶೋಧನೆಯಲ್ಲಿ ಬಳಸಲಾಗುವ ದಾನಿಯ ರಕ್ತ ಮತ್ತು ರಕ್ತದ ಉತ್ಪನ್ನಗಳನ್ನು HIV ಪರೀಕ್ಷೆಗೊಳಪಡಿಸಲಾಗುತ್ತಿದೆ. ಸಾಮಾನ್ಯವಾಗಿ ಹೃದಯಕ್ಕೆ ರಕ್ತವನ್ನು ಹಿಂದಿರುಗಿಸುವ ರಕ್ತನಾಳದಲ್ಲಿನ ರಕ್ತವನ್ನು HIV ಪರೀಕ್ಷೆಗೊಳಪಡಿಸಲಾಗುತ್ತದೆ. ಅನೇಕ ಪ್ರಯೋಗಾಲಯಗಳು ಪ್ರತಿ-HIV ಪ್ರತಿಕಾಯ (IgG ಮತ್ತು IgM) ಮತ್ತು HIV p24 ಪ್ರತಿಜನಕಗಳನ್ನು ಪತ್ತೆ ಹಚ್ಚುವ ನಾಲ್ಕನೇ ತಲೆಮಾರಿನ ಪರೀಕ್ಷಾ ವಿಧಾನಗಳನ್ನು ಬಳಸುತ್ತಿವೆ. ರೋಗಿಗೆ ಸಂಬಂಧಿಸಿದ ಹಿಂದಿನ ಪರೀಕ್ಷಾ ವರದಿಯು ನಕರಾತ್ಮಕವಾಗಿದ್ದು, ಹೊಸದಾಗಿ ನಡೆಸಿದ ಪರೀಕ್ಷೆಯಲ್ಲಿ HIV ಪ್ರತಿಕಾಯ ಅಥವಾ ಪ್ರತಿಜನಕ ಪತ್ತೆಯಾದರೆ ಆತನಿಗೆ HIV ಸೋಂಕು ತಗುಲಿದೆ ಎಂದರ್ಥ. ವ್ಯಕ್ತಿಗಳಿಗೆ HIV ಸೋಂಕು ತಗುಲಿರುವುದಕ್ಕೆ ಆರಂಭಿಕ ನಿರ್ದಿಷ್ಟ ಸೂಚನೆಗಳು ದೊರೆತಲ್ಲಿ, ಅದನ್ನು ದೃಢಪಡಿಸಲು ಎರಡನೇ ಬಾರಿ ರಕ್ತದ ಮಾದರಿಗಳನ್ನು ಪಡೆದು ಸತತ ಪರೀಕ್ಷೆಗಳನ್ನು ನಡೆಸಲಾಗುತ್ತದೆ. ಬಳಿಕ ರಕ್ತ ಪರಿವರ್ತನೆ ನಡೆದು ಪಾಸಿಟಿವ್ ಎಂದು ಸಾಬೀತಾಗಲು 3ರಿಂದ 6 ತಿಂಗಳುಗಳು ಬೇಕಾಗುವುದರಿಂದ ಈ ನಿರ್ಣಾಯಕ ಅವಧಿಯಲ್ಲಿ ವ್ಯತ್ಯಾಸಗಳಾಗಬಹುದು. ಈ ನಿರ್ಣಾಯಕ ಅವಧಿಯಲ್ಲಿ ಪಾಲಿಮೆರೇಸ್ ಚೈನ್ ರಿಯಾಕ್ಷನ್(PCR) ವಿಧಾನವನ್ನು ಬಳಸಿಕೊಂಡು ವೈರಸ್‌ಅನ್ನು ಪತ್ತೆ ಹಚ್ಚುವುದು ಸಾಧ್ಯ, ಮತ್ತು ನಾಲ್ಕನೇ ತಲೆಮಾರಿನ EIA ಪರೀಕ್ಷಾ ವಿಧಾನವನ್ನು ಬಳಸುವುದಕ್ಕಿಂತಲೂ ಮೊದಲೇ ಸೋಂಕನ್ನು ಆಗಿಂದಾಗ್ಗೆ ಪತ್ತೆ ಹಚ್ಚಲು ಸಾಧ್ಯವಿರುವುದಾಗಿ ಸಾಕ್ಷ್ಯಗಳು ಹೇಳುತ್ತವೆ.
PCRನಿಂದ ಪಡೆದ ಧನಾತ್ಮಕ ಫಲಿತಾಂಶಗಳನ್ನು ಪ್ರತಿಜನಕ ಪರೀಕ್ಷೆಗಳು ದೃಢಪಡಿಸುತ್ತವೆ.[೭೩]
HIV-ಪಾಸಿಟಿವ್ ತಾಯಂದಿರಿಗೆ ಜನಿಸಿದ ನವಜಾತ ಶಿಶುಗಳು ಮತ್ತು ಹಸುಳೆಗಳ (ie ರೋಗಿಗಳು 2 ವರ್ಷಕ್ಕಿಂತಲೂ ಕಡಿಮೆ ವಯಸ್ಸಿನವರಾಗಿದ್ದಲ್ಲಿ)[೭೪] ವಿಚಾರದಲ್ಲಿ ಸೋಂಕು ಪತ್ತೆಗಾಗಿ ನಿತ್ಯ ಬಳಸುವ HIV ಪರೀಕ್ಷೆಗಳಿಗೆ ಯಾವುದೇ ಮೌಲ್ಯವಿಲ್ಲ, ಏಕೆಂದರೆ HIVಗೆ ವಿರುದ್ಧವಾಗಿ ಕೆಲಸ ಮಾಡುವ ಪ್ರತಿಜನಕಗಳು ತಾಯಿಯಿಂದ ಮಗುವಿನ ರಕ್ತಕ್ಕೆ ಬಂದು ಅಸ್ತಿತ್ವದಲ್ಲಿರುತ್ತವೆ. HIV ಸೋಂಕನ್ನು PCR ಪರೀಕ್ಷೆಯಿಂದ ಮಾತ್ರ ಪತ್ತೆ ಹಚ್ಚಲು ಸಾಧ್ಯ, ಮಾತ್ರವಲ್ಲದೆ ಮಕ್ಕಳ ಲಿಂಫೋಸೈಟ್ಸ್‌ಗಳಲ್ಲಿ HIV ವೈರಲ್-ಪರ DNAಗಳಿವೆಯೇ ಎಂದೂ ಪರೀಕ್ಷಿಸಬಹುದು.
ನಿಯಂತ್ರಣ
ಲೈಂಗಿಕ ಸಂಪರ್ಕ, ಸೋಂಕಿತ ದೇಹದ ದ್ರವಗಳಿಗೆ ಅಥವಾ ಜೀವಕೋಶಗಳಿಗೆ ಒಡ್ಡಿಕೊಳ್ಳುವುದು, ಮತ್ತು ತಾಯಿಯಿಂದ ಭ್ರೂಣಕ್ಕೆ ಅಥವಾ ಪ್ರಸವೋತ್ತರ ಕಾಲದಲ್ಲಿ ಮಗುವಿಗೆ ಹರಡುವುದು HIV ಹರಡುವಿಕೆಯ ಮೂರು ಪ್ರಮುಖ ಮಾರ್ಗಗಳು.
ಸೋಂಕಿತ ವ್ಯಕ್ತಿಗಳ ಲಾಲಾರಸ, ಕಣ್ಣೀರು, ಮತ್ತು ಮೂತ್ರಗಳಲ್ಲಿ HIVಯನ್ನು ಕಂಡು ಹಿಡಿಯಲು ಸಾಧ್ಯ, ಆದರೆ ಈ ದ್ರವಗಳಿಂದಾಗಿ ಸೋಂಕುಗಳು ತಗುಲಿದ ಬಗ್ಗೆ ಯಾವುದೇ ದಾಖಲಿತ ಪ್ರಕರಣಗಳಿಲ್ಲ. ಅಲ್ಲದೆ ಇದರಿಂದಾಗಿ ಸೋಂಕುಂಟಾಗುವ ಅಪಾಯ ತೀರಾ ಕಡಿಮೆ
ಲೈಂಗಿಕ ಸಂಪರ್ಕ
HIV ಹೊಂದಿರುವ ಜೊತೆಗಾರ/ಗಾರ್ತಿ ಜೊತೆ ಅಸುರಕ್ಷಿತ ಲೈಂಗಿಕ ಸಂಬಂಧಗಳನ್ನಿಟ್ಟುಕೊಳ್ಳುವುದರಿಂದ HIV ಸೋಂಕುಗಳು ಹೆಚ್ಚಾಗಿ ತಗುಲುತ್ತದೆ. ಜಗತ್ತಿನಾದ್ಯಂತ ವಿರುದ್ಧ ಲಿಂಗಿಗಳು ಲೈಂಗಿಕ ಸಂಪರ್ಕಗಳನ್ನು ಹೊಂದಿರುವುದೇ HIV ಸೋಂಕಿಗೆ ಮೊದಲ ಕಾರಣ.[೮೪][೮೫][೮೬]
ಲೈಂಗಿಕ ಕ್ರಿಯೆಯ ವೇಳೆ ಪುರುಷ ಅಥವಾ ಮಹಿಳೆ ಕಾಂಡೊಮ್‌ಗಳನ್ನು ಬಳಸುವುದರಿಂದ ಮಾತ್ರ HIV ಸೋಂಕು ತಗುಲುವ ಸಾಧ್ಯತೆಗಳು, ಮತ್ತು STDಗಳು ಮತ್ತು ಗರ್ಭಿಣಿಯಾಗುವ ಸಾಧ್ಯತೆಗಳನ್ನು ಕಡಿಮೆ ಮಾಡಬಹುದು. ಈವರೆಗಿನ ಅತ್ಯುತ್ತಮ ನಿದರ್ಶನ ಹೇಳುವುದೇನೆಂದರೆ, ದೀರ್ಘ-ಕಾಲದಲ್ಲಿ ವಿಶಿಷ್ಟವಾಗಿ ಕಾಂಡೊಮ್ ಬಳಸುವುದರಿಂದಾಗಿ ಭಿನ್ನಲಿಂಗರತಿ ಮೂಲಕ HIV ಹರಡುವಿಕೆಯನ್ನು ಸುಮಾರು 80%ರಷ್ಟು ಕಡಿಮೆಗೊಳಿಸಬಹುದು, ಕಾಂಡೊಮ್‌ಗಳನ್ನು ಪ್ರತಿ ಸಂದರ್ಭದಲ್ಲೂ ಸರಿಯಾಗಿ ಬಳಸಿದಲ್ಲಿ ಹೆಚ್ಚಿನ ಪ್ರಯೋಜನ ಪಡೆಯಬಹುದು.[೮೭]
ಪುರುಷರ ಲೇಟೆಕ್ಸ್ ಕಾಂಡೊಮ್ ಅನ್ನು ತೈಲ-ಆಧಾರಿತ ತೇವಾಂಶವುಳ್ಳ ವಸ್ತುಗಳನ್ನು ಬಳಸದೆ ಸರಿಯಾಗಿ ಬಳಸಿಕೊಳ್ಳುವುದು, ಲೈಂಗಿಕವಾಗಿ HIV ಹರಡುವಿಕೆ ಮತ್ತು ಲೈಂಗಿಕವಾಗಿ ಹರಡುವ ಇತರ ರೋಗಗಳನ್ನು ಕಡಿಮೆ ಮಾಡಲು ಲಭ್ಯವಿರುವ ಅತ್ಯಂತ ಪರಿಣಾಮಕಾರಿ ಏಕೈಕ ತಂತ್ರಜ್ಞಾನವಾಗಿದೆ. ಕಾಂಡೊಮ್ ತಯಾರಕರು ತೈಲ-ಆಧಾರಿತ ವಸ್ತುಗಳಾದ ಪೆಟ್ರೋಲಿಯಂ ಜೆಲ್ಲಿ, ಬೆಣ್ಣೆ, ಮತ್ತು ತುಪ್ಪ ಇತ್ಯಾದಿಗಳಿರುವ ಲೇಟೆಕ್ಸ್ ಕಾಂಡೊಮ್‌ಗಳನ್ನು ಬಳಸದಂತೆ ಶಿಫಾರಸು ಮಾಡಿದ್ದಾರೆ. ಏಕೆಂದರೆ ಅವು ಲೇಟೆಕ್ಸ್‌ಅನ್ನು ಕರಗಿಸಿ ಕಾಂಡೊಮ್‌ಗಳಲ್ಲಿ ರಂಧ್ರಗಳನ್ನುಂಟು ಮಾಡುತ್ತವೆ. ಅವಶ್ಯಕತೆಯಿದ್ದರೆ ಮಾತ್ರ ತಯಾರಕರು ನೀರು ಆಧಾರಿತ ತೇವಾಂಶವುಳ್ಳ ಕಾಂಡೊಮ್‌ಗಳ ಬಳಕೆಗೆ ಶಿಫಾರಸು ಮಾಡುತ್ತಾರೆ. ಆದಾಗ್ಯೂ, ಪಾಲಿಯುರೆಥೇನ್‌ ಕಾಂಡೊಮ್‌ಗಳಲ್ಲಿ ತೈಲ-ಆಧಾರಿತ ತೇವಾಂಶವುಳ್ಳ ವಸ್ತುಗಳನ್ನು ಬಳಸಬಹುದು.[೮೮]
ಪುರುಷರ ಕಾಂಡೊಮ್‌ಗೆ ಪರ್ಯಾಯವಾಗಿರುವ ಮಹಿಳೆಯರ ಕಾಂಡೊಮ್‌ಅನ್ನು ಪಾಲಿಯುರೆಥೇನ್‌ನಲ್ಲಿ ಮಾಡಲಾಗಿದ್ದು, ತೈಲ-ಆಧಾರಿತ ತೇವಾಂಶವುಳ್ಳ ವಸ್ತುಗಳನ್ನು ಬಳಸಲು ಇದು ಅನುವು ಮಾಡಿಕೊಡುತ್ತದೆ. ಇವು ಪುರುಷ ಕಾಂಡೊಮ್‌ಗಳಿಗಿಂತ ದೊಡ್ಡದಾಗಿವೆ. ಬಿಗಿಯಾಗಿದ್ದು ಉಂಗುರದ-ಆಕಾರದ ಪ್ರವೇಶವನ್ನು ಹೊಂದಿದೆ ಮತ್ತು ಯೋನಿಯೊಳಗೆ ಸೇರಿಸಲು ಅನುಕೂಲವಾಗುವಂತೆ ಇದರ ವಿನ್ಯಾಸ ಮಾಡಲಾಗಿದೆ. ಮಹಿಳೆಯರ ಕಾಂಡೊಮ್‌ನೊಳಗೆ ಒಂದು ಉಂಗುರವಿದ್ದು, ಯೋನಿಯೊಳಗೆ ಸರಿಯಾಗಿ ಕೂರಿಸಲು ಅದು ಸಹಾಯಕವಾಗುತ್ತದೆ- ಮಹಿಳೆಯ ಕಾಂಡೊಮ್‌‌ನ್ನು ಒಳಗೆ ಸೇರಿಸಬೇಕಾದರೆ ಅದರ ಉಂಗುರವನ್ನು ಹಿಸುಕಿ ಗಾತ್ರ ಕುಗ್ಗಿಸಬೇಕು. ಆದಾಗ್ಯೂ, ಪ್ರಸ್ತುತ ಮಹಿಳೆಯರ ಕಾಂಡೊಮ್‌ಗಳ ಲಭ್ಯತೆ ತೀರಾ ಕಡಿಮೆಯಿದೆ ಮತ್ತು ದುಬಾರಿಯಾಗಿರುವುದರಿಂದ ಅನೇಕ ಮಹಿಳೆಯರು ಅದರ ಸಮೀಪವೂ ಸುಳಿಯುವುದಿಲ್ಲ.
ಮಹಿಳೆಯರ ಕಾಂಡೊಮ್‌ಗಳು ಲಭ್ಯವಿರುವ ಸ್ಥಳಗಳಲ್ಲಿ, ಒಟ್ಟು ಅಸುರಕ್ಷಿತ ಲೈಂಗಿಕ ಕ್ರಿಯೆಗಳಿಗೆ ಹೋಲಿಸಿದಲ್ಲಿ ಸುರಕ್ಷಿತ ಲೈಂಗಿಕ ಕ್ರಿಯೆ ಹೆಚ್ಚಿದೆ ಎಂದು ಪೂರ್ವಭಾವಿ ಅಧ್ಯಯನಗಳು ತಿಳಿಸಿವೆ.[೮೯]
ದಂಪತಿಗಳ ಮೇಲೆ ಕೈಗೊಂಡ ಅಧ್ಯಯನದಲ್ಲಿ, ಸೋಂಕಿತ ವ್ಯಕ್ತಿಯು ಸ್ಥಿರವಾಗಿ ಕಾಂಡೊಮ್ ಬಳಸಿದಾಗ, ಸೋಂಕಿತಗೊಳ್ಳದ ಜೊತೆಗಾರನಿಗೆ HIV ಸೋಂಕು ತಗುಲಿದ ಪ್ರಮಾಣ ವರ್ಷಕ್ಕೆ 1%ಕ್ಕಿಂತಲೂ ಕಡಿಮೆ ಎಂದು ತಿಳಿದು ಬಂದಿದೆ.[೯೦] ಈ ಸಂಬಂಧ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿರುವ ಮುನ್ನೆಚ್ಚರಿಕೆ ಮತ್ತು ನಿಯಂತ್ರಣ ಕ್ರಮಗಳು ಎಲ್ಲರಿಗೂ ತಿಳಿದ ಸಂಗತಿ. ಆದರೆ HIV/AIDS ಬಗ್ಗೆ ಗೊತ್ತಿದ್ದೂ, ತಾವಾಗಿಯೇ HIV ಸೋಂಕನ್ನು ಆರ್ಜಿಸಿಕೊಳ್ಳುವುದರ ಅರಿವಿಲ್ಲದೆ ಕೆಲವು ಮಂದಿ ಯುವಕರು ಲೈಂಗಿಕ ಸಂಪರ್ಕಗಳಲ್ಲಿ ತೊಡಗಿದ್ದಾರೆಂದು ಯುರೋಪ್ ಮತ್ತು ಉತ್ತರ ಅಮೆರಿಕಾದಲ್ಲಿ ಕೈಗೊಂಡ ಸಾಂಕ್ರಾಮಿಕ ರೋಗಶಾಸ್ತ್ರ ಮತ್ತು ನಡವಳಿಕೆ ಅಧ್ಯಯನಗಳು ತಿಳಿಸಿವೆ. [೯೧][೯೨]
ಸಲಿಂಗಕಾಮಿ ಪುರುಷರಲ್ಲಿ HIV ಸೋಂಕು ತಗಲುವ ಅಪಾಯವನ್ನು ಪುರುಷ ಸುನತಿಯು 60%ರಷ್ಟು ಕಡಿಮೆ ಮಾಡಿರುವುದನ್ನು ಯಾದೃಚ್ಛಿಕ ನಿಯಂತ್ರಿತ ಪ್ರಯೋಗಗಳು ತೋರಿಸಿಕೊಟ್ಟಿವೆ.[೯೩]
ಹೀಗೆ ಮಾಡುವುದರಿಂದ ಹಲವು ಕಾರ್ಯತಃ, ಸಾಂಸ್ಕೃತಿಕ ಮತ್ತು ನಿರ್ದಿಷ್ಟ ಮನೋಭಾವನೆಗಳ ಸಮಸ್ಯೆಗಳು ಎದುರಾದರೂ, HIV ಸೋಂಕಿನಿಂದ ಜರ್ಜರಿತವಾಗಿರುವ ಅನೇಕ ದೇಶಗಳಲ್ಲಿ ಈ ವಿಧಾನವನ್ನು ಕ್ರಿಯಾಶೀಲವಾಗಿ ಪ್ರೋತ್ಸಾಹಿಸುವ ನಿರೀಕ್ಷೆಯಿದೆ. ಆದಾಗ್ಯೂ, ಬಡತನದಲ್ಲಿರುವ ಮಂದಿಗೆ ಉಚಿತವಾಗಿ ಕಾಂಡೊಮ್ ಹಂಚಿಕೆ ಸೇರಿದಂತೆ ಕಾಂಡೊಮ್ ಬಳಕೆಯನ್ನು ಪ್ರೋತ್ಸಾಹಿಸುವ ಯೋಜನೆಗಳಿವೆ. ಅಫ್ರಿಕಾದ ಉಪ-ಸಹರಾದಲ್ಲಿ HIV ಸೋಂಕಿನ ಪ್ರಮಾಣವನ್ನು ಇಳಿಸುವ ನಿಟ್ಟಿನಲ್ಲಿ ಸುನತಿಗೆ ಹೋಲಿಸಿದಲ್ಲಿ ಕಾಂಡೊಮ್ ಬಳಕೆ 95 ಪಟ್ಟಿನಷ್ಟು ಬೆಲೆ ಪರಿಣಾಮಕಾರಿಯೆಂದು ಅಂದಾಜು ಮಾಡಲಾಗಿದೆ. [೯೪]
ಈ ನಡುವೆ, ಸುನತಿ ಮಾಡಿಸಿಕೊಂಡ ಪುರುಷರ ನಡುವೆ ಪರಸ್ಪರ ಅರಿವಿನ ಕೊರತೆ ಹೆಚ್ಚು ಅಪಾಯಕಾರಿ-ನಡತೆಗೆ ಎಡೆ ಮಾಡಿಕೊಡಬಹುದು ಎಂದು ಕೆಲವು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ, ಹೀಗಾದಲ್ಲಿ ಏಡ್ಸ್ ನಿಯಂತ್ರಣಕ್ಕಾಗಿ ಕೈಗೊಂಡ ಕ್ರಮಗಳು ವ್ಯರ್ಥವಾಗಬಹುದು ಮತ್ತು ಅದರ ಪರಿಣಾಮಗಳು ಇಲ್ಲದಾಗಬಹುದು. [೯೫] ಆದಾಗ್ಯೂ, ಹೆಚ್ಚಾಗಿರುವ HIV ಅಪಾಯಕಾರಿ ನಡತೆಯೊಂದಿಗೆ ವಯಸ್ಕ ಪುರುಷ ಸುನತಿಯು ಸೇರಿಕೊಂಡಿಲ್ಲವೆಂದು ಒಂದು ಯಾದೃಚ್ಛಿಕ ನಿಯಂತ್ರಿತ ಪ್ರಯೋಗ ಹೇಳಿದೆ.
ಸೋಂಕಿತ ದೇಹದ ದ್ರವಗಳಿಗೆ ಒಡ್ಡುವಿಕೆ
ಕಲಬೆರಕೆ ರಕ್ತದ ಸಂಪರ್ಕಕ್ಕೆ ಬರದ ರೀತಿಯಲ್ಲಿ ಆರೋಗ್ಯ ಕಾರ್ಯಕರ್ತರು ಮುನ್ನಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳುವುದರ ಮೂಲಕ HIV ಸೋಂಕಿಗೆ ತುತ್ತಾಗುವುದನ್ನು ಕಡಿಮೆಗೊಳಿಸಲು ಸಾಧ್ಯ. ಕೈಗವಸುಗಳು, ಮುಖ ಮುಸುಕುಗಳು, ರಕ್ಷಣಾತ್ಮಕ ಕನ್ನಡಕ ಅಥವಾ ಫಲಕಗಳು, ಮತ್ತು ರಕ್ತಜನಕ ರೋಗಕಾರಕಗಳಿಂದ ಚರ್ಮ ಅಥವಾ ಲೋಳೆ ಪೊರೆಗಳನ್ನು ಕಾಪಾಡುವ ನಿಲುವಂಗಿಗಳು ಅಥವಾ ಮುಂಗವಚ ಇತ್ಯಾದಿ ತಡೆಗಳು ಮುನ್ನೆಚ್ಚರಿಕೆ ಕ್ರಮಗಳಲ್ಲಿ ಸೇರಿವೆ. ಕಲಬೆರಕೆ ರಕ್ತ ಅಥವಾ ದೇಹದ ಇತರೆ ದ್ರವಗಳ ಸಂಪರ್ಕಕ್ಕೆ ಒಳಗಾದ ತಕ್ಷಣ ಆಗಿಂದಾಗ್ಗೆ ಮತ್ತು ಸಂಪೂರ್ಣವಾಗಿ ಚರ್ಮವನ್ನು ಶುಚಿಗೊಳಿಸುವುದರಿಂದ ಸೋಂಕು ತಗುಲುವ ಸಾಧ್ಯತೆಗಳನ್ನು ಕಡಿಮೆ ಮಾಡಬಹುದು. ಅಂತಿಮವಾಗಿ, ಸೂಜಿ ಆಕಾರದ ಕಲಬೆರಕೆಗೊಂಡ ವಸ್ತುಗಳು ತಾಗಿ ಗಾಯಗೊಳ್ಳದಂತೆ ನೋಡಿಕೊಳ್ಳುವ ನಿಟ್ಟಿನಲ್ಲಿ ಸೂಜಿ, ಚಿಕ್ಕಚಾಕು ಮತ್ತು ಗಾಜಿನ ವಸ್ತುಗಳನ್ನು ಎಚ್ಚರಿಕೆಯಿಂದ ವಿಸರ್ಜಿಸಬೇಕು.[೯೭]
ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ HIV ಹರಡುವಿಕೆಗೆ ಔಷಧಗಳ ಸೇವನೆಯೇ(ಇಂಜೆಕ್ಷನ್ ಮೂಲಕ) ಪ್ರಮುಖ ಕಾರಣವಾಗಿರುವುದರಿಂದ, ಔಷಧಗಳ ದುರಪಯೋಗದಿಂದಾಗುವ ಸೋಂಕನ್ನು ಇಳಿಸುವ ಪ್ರಯತ್ನವಾಗಿ ಅಲ್ಲಿ ಸೂಜಿ-ವಿನಿಮಯ ಕಾರ್ಯಕ್ರಮಗಳಂತಹ ಹಾನಿ ಇಳಿಸುವ ಕಾರ್ಯವಿಧಾನಗಳನ್ನು ಬಳಸಿಕೊಳ್ಳಲಾಗಿದೆ
ತಾಯಿಯಿಂದ ಮಗುವಿಗೆ ಸೋಂಕು ಹರಡುವಿಕೆ (MTCT)
ಪರ್ಯಾಯ ಹಾಲುಣಿಸುವಿಕೆ ಒಪ್ಪತಕ್ಕದ್ದು, ಕಾರ್ಯಸಾಧ್ಯ, ಶಕ್ಯತೆ ಮತ್ತು ಸುರಕ್ಷಿತವೂ ಆಗಿರುವಾಗ HIV-ಸೋಂಕಿತ ತಾಯಂದಿರು ತಮ್ಮ ಶಿಶುವಿಗೆ ಸ್ತನ್ಯಪಾನ ಮಾಡುವುದನ್ನು ತಪ್ಪಿಸಬೇಕು ಎಂದು ಹಾಲಿ ಶಿಫಾರಸುಗಳು ಹೇಳುತ್ತವೆ. ಆದಾಗ್ಯೂ, ಒಂದು ವೇಳೆ ಬೇರೆಯೇ ಸಮಸ್ಯೆ ಆಗಿದ್ದಲ್ಲಿ, ಮಗು ಜನಿಸಿದ ಮೊದಲ ಒಂದು ತಿಂಗಳಲ್ಲಿ ಮಾತ್ರ ಆಕೆ ತನ್ನ ಮಗುವಿಕೆ ಸ್ತನ್ಯಪಾನ ಮಾಡಿಸಬಹುದು ಮತ್ತು ಸಾಧ್ಯವಾದಷ್ಟು ಬೇಗ ಅದನ್ನು ನಿಲ್ಲಿಸಬೇಕು ಎಂದೂ ಅವು ಹೇಳುತ್ತವೆ. ಇದಲ್ಲದೆ ಮಹಿಳೆಯರು ತಮ್ಮದಲ್ಲದ ಮಕ್ಕಳಿಗೂ ಸ್ತನ್ಯಪಾನ ಮಾಡಿಸುವ ಸಾಧ್ಯತೆಗಳಿರುವುದು ಇಲ್ಲಿ ಗಮನಾರ್ಹ;ವೆಟ್‌‌ನರ್ಸ್ ನೋಡಿ.
ಚಿಕಿತ್ಸೆ
HIVಗೆ ಅಥವಾ HIV ಅಥವಾ AIDSನಿಂದ ಗುಣಮುಖರಾಗಲು ಸಾರ್ವಜನಿಕವಾಗಿ ಸದ್ಯಕ್ಕೆ ಯಾವುದೇ ಲಸಿಕೆ ಲಭ್ಯವಿಲ್ಲ. ಎಲ್ಲರಿಗೂ ತಿಳಿದಿರುವ ವಿಧಾನಗಳೆಂದರೆ ವೈರಸ್‌ಗಳ ಸಂಪರ್ಕಕ್ಕೆ ಬರದಂತೆ ಮುನ್ನೆಚ್ಚರಿಕೆ ವಹಿಸುವುದು ಅಥವಾ ಇದರಲ್ಲಿ ವಿಫಲರಾದಲ್ಲಿ HIV ಸೋಂಕಿಗೊಳಗಾದ ತಕ್ಷಣವೇ ನೇರವಾಗಿ ಸೋಂಕಿಗೊಳಗಾದ ನಂತರದ ರೋಗನಿರೋಧಕ ಚಿಕಿತ್ಸೆ(PEP)ಯಾದ ಆಂಟಿರೆಟ್ರೋವೈರಲ್ ಚಿಕಿತ್ಸೆಯನ್ನು ಅನ್ನು ಪಡೆಯುವುದು.[೧೦೦]
PEP ಬಹಳಷ್ಟು ಬೇಡಿಕೆಯಿರುವ ನಾಲ್ಕು ವಾರಗಳ ಔಷಧಿ. ಈ ಔಷಧಿಯ ಸೇವನೆಯಿಂದಾಗಿ ಅಹಿತಕರವೆನಿಸುವ ಅತಿಸಾರ ಭೇದಿ, ಅಸ್ವಸ್ಥತೆ, ವಾಕರಿಕೆ ಮತ್ತು ನಿಶ್ಯಕ್ತಿ ಇತ್ಯಾದಿ ಕೆಟ್ಟ ಪರಿಣಾಮಗಳು ಕಾಣಿಸಿಕೊಳ್ಳಬಹುದು
ಆಂಟಿವೈರಲ್ ತೆರಪಿ
HIV ಸೋಂಕಿಗೆ ಈಗಿರುವ ಚಿಕಿತ್ಸೆಯು ಹೈಲಿ ಆಕ್ಟಿವ್ ಆಂಟಿರೆಟ್ರೋವೈರಲ್ ತೆರಪಿ, ಅಥವಾ HAARTಅನ್ನು ಒಳಗೊಂಡಿದೆ.[೧೦೨]
HIV-ಸೋಂಕಿತ ಅನೇಕ ವ್ಯಕ್ತಿಗಳಿಗೆ ಈ ಚಿಕಿತ್ಸೆಯಿಂದ ಬಹಳಷ್ಟು ಪ್ರಯೋಜನವಾಗಿದೆ, 1996ರಲ್ಲಿ ಪ್ರೊಟೀನ್ ನಿರೋಧಕಗಳು-ಆಧಾರಿತ HAART ಸಿಗಲು ಪ್ರಾರಂಭವಾದಾಗ ಈ ಚಿಕಿತ್ಸೆಯನ್ನು ಪರಿಚಯಿಸಲಾಯಿತು. [೧೨] ಈಗಿನ ಅತ್ಯುತ್ತಮ HAART ಆಯ್ಕೆಗಳು, ಆಂಟಿರೆಟ್ರೋವೈರಲ್ ಪ್ರತಿನಿಧಿಗಳ ಎರಡು ವಿಧಗಳು, ಅಥವಾ "ವರ್ಗ"ಗಳಿಗೆ ಸೇರಿದ ಕನಿಷ್ಟ ಪಕ್ಷ ಮೂರು ಔಷಧಗಳನ್ನು ಒಳಗೊಂಡ ಸಂಯೋಜನೆಗಳಿಂದ(ಅಥವಾ "ಕಾಕ್‌ಟೇಲುಗಳು") ರಚಿತವಾಗಿದೆ. ಈ ವಿಶಿಷ್ಟ ಕ್ರಮವು ಎರಡು ನ್ಯೂಕ್ಲಿಯೋಸೈಡ್ ಅನಲಾಗ್ ರಿವರ್ಸ್ ಟ್ರಾನ್ಸ್‌ಕ್ರಿಪ್ಟೇಸ್ ಇನ್‌ಹಿಬಟರ್‌ಗಳು ಮತ್ತು (NARTIs or NRTIs)ಪ್ರೊಟೀನ್ ನಿರೋಧಕ ಅಥವಾ ನಾನ್-ನ್ಯೂಕ್ಲಿಯೋಸೈಡ್ ಅನಲಾಗ್ ರಿವರ್ಸ್ ಟ್ರಾನ್ಸ್‌ಕ್ರಿಪ್ಟೇಸ್ ಇನ್‌ಹಿಬಟರ್‌ (NNRTI)ಗಳನ್ನು ಒಳಗೊಂಡಿದೆ. ಏಕೆಂದರೆ HIV ರೋಗದ ಪ್ರಗತಿ ವಯಸ್ಕರಿಗಿಂತ ಬೇಗನೆ ಮಕ್ಕಳಲ್ಲಿ ಆಗುತ್ತದೆ, ಅಲ್ಲದೆ ರೋಗದ ಉಲ್ಬಣದಿಂದಾಗುವ ಅಪಾಯವನ್ನು ಪ್ರಯೋಗಾಲಯದ ಮಾನದಂಡಗಳು ಮುಂಚಿತವಾಗಿಯೇ ಹೇಳುವಷ್ಟು ಪೂರ್ಣ ಸಮರ್ಥವಾಗಿಲ್ಲ. ವಯಸ್ಕರಿಗೆ ಹೋಲಿಸಿದಲ್ಲಿ ನಿರ್ದಿಷ್ಟವಾಗಿ ಶಿಶುಗಳಿಗೆ ಮತ್ತು ಮಕ್ಕಳಿಗೆ ಚಿಕಿತ್ಸಾ ಸಲಹೆಗಳು ಹೆಚ್ಚು ಆಕ್ರಮಣಶೀಲವಾಗಿರುತ್ತವೆ.[೧೦೩]
HAART ಲಭ್ಯವಿರುವ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ, ವೈದ್ಯರು ಚಿಕಿತ್ಸೆ ಆರಂಭಿಸಲು ನಿರ್ಧರಿಸುವ ಮೊದಲು ರೋಗಿಯಲ್ಲಿ ವೈರಸ್‌ಗಳ ತುಂಬುವಿಕೆ, CD4 ಇಳಿತ ಮತ್ತು ರೋಗಿಯ ಸಿದ್ಧತೆಯನ್ನು ಅಳೆಯುತ್ತಾರೆ.[೧೦೪]
ರೋಗಿಯ ಜೀವನ ಗುಣಮಟ್ಟ ಸುಧಾರಣೆ, ಸಮಸ್ಯೆಗಳ ಇಳಿಕೆ ಮತ್ತು HIV ವಿರೆಮಿಯಾದ ಮಿತಿಯನ್ನು ಪತ್ತೆಯಾದಾಗ ಇದ್ದಾಗಿನಿಂದ ಕೆಳಮಟ್ಟಕ್ಕೆ ತರುವುದು HAARTನ ಪ್ರಮುಖ ಗುರಿಗಳಲ್ಲಿ ಸೇರಿವೆ. ಆದರೆ ಇದು HIV ರೋಗಿಯನ್ನು ಸಂಪೂರ್ಣ ಗುಣಪಡಿಸುವುದಿಲ್ಲ, ಮಾತ್ರವಲ್ಲದೆ HIV ಮರಳದು ಎಂಬ ಖಾತ್ರಿಯನ್ನೂ ಇದು ನೀಡುವುದಿಲ್ಲ. HAART ಪ್ರತಿಭಟನಶೀಲವಾಗಿದ್ದಾಗ ರಕ್ತದಲ್ಲಿ ತುಂಬಿಕೊಂಡಿರುವ HIVಗೆ ಚಿಕಿತ್ಸೆ ನಿಲ್ಲುವ ಸಾಧ್ಯತೆಗಳೂ ಇವೆ.[೧೦೫][೧೦೬] ಅಲ್ಲದೆ, HAART ಚಿಕಿತ್ಸೆ ಬಳಸಿಕೊಂಡು HIV ಸೋಂಕಿನ ಸಂಪೂರ್ಣ ಹೊರಬರಬೇಕಾದರೆ ಒಬ್ಬ ವ್ಯಕ್ತಿಗೆ ಆತನ ಜೀವಿತಾವಧಿ ಸಾಕಾಗದು.[೧೦೭]
ಹೀಗಿದ್ದೂ, ಅನೇಕ HIV-ಸೋಂಕಿತ ವ್ಯಕ್ತಿಗಳು ತಮ್ಮ ಸಾಮಾನ್ಯ ಆರೋಗ್ಯ ಮತ್ತು ಜೀವನದ ಗುಣಮಟ್ಟದಲ್ಲಿ ಗಮನಾರ್ಹ ಸುಧಾರಣೆಗಳನ್ನು ಕಂಡಿದ್ದಾರೆ, ಇದರಿಂದಾಗಿ HIV-ಸಂಬಂಧಿತ ರೋಗ ಹರಡಿಕೆ ಮತ್ತು ಮರಣಗಳಲ್ಲಿ ಗಮನಾರ್ಹ ಇಳಿಕೆಯಾಗಿದೆ.[೧೦೮][೧೦೯][೧೧೦]
HAART ಚಿಕಿತ್ಸೆ ಪಡೆಯದೇ ಇದ್ದಲ್ಲಿ, HIV ಸೋಂಕು ಒಂಭತ್ತರಿಂದ ಹತ್ತು ವರ್ಷಗಳ ನಡುವಣ ಅವಧಿಯಲ್ಲಿ AIDSಗೆ ಪರಿವರ್ತನೆಯಾಗುತ್ತದೆ ಮತ್ತು ಆ ನಂತರ ಸಾಮಾನ್ಯ ಜೀವಿತಾವಧಿ 9.2 ತಿಂಗಳುಗಳು ಮಾತ್ರ.[೩೫] AIDS ರೋಗಿಗಳ ಜೀವಿತಾವಧಿಯನ್ನು 4ರಿಂದ 12ವರ್ಷದವರೆಗೆ ಹೆಚ್ಚಿಸುವ ನಿಟ್ಟಿನಲ್ಲಿ HAART ಚಿಂತನೆ ನಡೆಸಿದೆ.[೧೧೧][೧೧೨]
ಕೆಲವು ರೋಗಿಗಳಲ್ಲಿ, ಆ ಪೈಕಿ ಶೇಕಡ 50ಕ್ಕಿಂತಲೂ ಹೆಚ್ಚು ರೋಗಿಗಳಲ್ಲಿ HAARTನ ಸಾಧನೆ ಅತ್ಯುತ್ತಮವಾಗಿಲ್ಲ. ಔಷಧಗಳ ಅಸಹನೆ/ಕೆಟ್ಟ ಪರಿಣಾಮಗಳು, ಪೂರ್ವ ಪರಿಣಾಮಕಾರಿಯಲ್ಲದ ಆಂಟಿರೆಟ್ರೋವೈರಲ್ ತೆರಪಿ ಮತ್ತು ಸೋಂಕು ತಗುಲಿದ HIVಯ ಎಳೆಯು ಔಷಧಕ್ಕೆ ನಿರೋಧಕವಾಗಿ ಕಾರ್ಯನಿರ್ವಹಿಸಿದ್ದು ಇದಕ್ಕೆ ಕಾರಣಗಳಾಗಿವೆ. ಕೆಲವು ರೋಗಿಗಳಿಗೆ HAART ಚಿಕಿತ್ಸೆ ಏಕೆ ಪ್ರಯೋಜನವಾಗಿಲ್ಲವೆಂಬುದಕ್ಕೆ ರೋಗಿಗಳ ನಿಷ್ಠೆ ಮತ್ತು ದೃಢ ನಿರ್ಧಾರದ ಕೊರತೆಯೂ ಪ್ರಮುಖ ಕಾರಣ. [೧೧೩]
ನಿಷ್ಠೆ ಮತ್ತು ದೃಢ ನಿರ್ಧಾರದ ಕೊರತೆಗೆ ಬೇರೆ ಬೇರೆ ಕಾರಣಗಳಿವೆ.
ವೈದ್ಯಕೀಯ ಉಪಚಾರದ ಅಲಭ್ಯತೆ, ಸಾಮಾಜಿಕ ಬೆಂಬಲದ ಕೊರತೆ, ಮಾನಸಿಕ ಕಾಯಿಲೆ ಮತ್ತು ಮಾದಕ ವ್ಯಸನ ಮುಂತಾದ ಪ್ರಮುಖ ಮಾನಸಿಕ ಸಮಸ್ಯೆಗಳು ಕೂಡ ಇದರಲ್ಲಿ ಸೇರಿವೆ. HAARTನ ಕ್ರಮಗಳು ಸಂಕೀರ್ಣವಾಗಿದ್ದು, ಆಗಿಂದಾಗ್ಗೆ ಸಾಕಷ್ಟು ಸಂಖ್ಯೆಯಲ್ಲಿ ಮಾತ್ರೆಗಳನ್ನು ಸೇವಿಸಬೇಕಾಗಿರುವುದರಿಂದ ಅದನ್ನು ಅನುಸರಿಸಲು ಕಷ್ಟ ಸಾಧ್ಯ.[೧೧೪][೧೧೫][೧೧೬] ಇದಲ್ಲದೆ ಔಷಧಗಳ ಕೆಟ್ಟ ಪರಿಣಾಮಗಳು HAARTನಿಂದ ದೂರವಾಗಲು ಸೋಂಕಿತರನ್ನು ಪ್ರೇರೇಪಿಸಬಹುದು, ಅವುಗಳೆಂದರೆ ಲಿಪೊಡಿಸ್ಟ್ರೋಫಿ, ಡಿಸ್ಲಿಪಿಡೆಮಿಯಾ, ಅತಿಸಾರ ಭೇದಿ, ಇನ್‌ಸುಲಿನ್ ನಿರೋಧಕ ಶಕ್ತಿ, ಹೃದಯನಾಳೀಯ ಅಪಾಯಗಳಲ್ಲಿ ಹೆಚ್ಚಳ ಮತ್ತು ಜನನ ದೋಷಗಳು.[೧೧೭]
ಆಂಟಿ-ರೆಟ್ರೋವೈರಲ್ ಔಷಧಗಳು ದುಬಾರಿಯಾಗಿವೆ, ಮತ್ತು ಜಗತ್ತಿನಲ್ಲಿರುವ ಹೆಚ್ಚಿನ ಸೋಂಕಿತರಿಗೆ HIV ಮತ್ತು AIDS ಚಿಕಿತ್ಸೆಗಳು ಮತ್ತು ಔಷಧಗಳು ಸುಲಭವಾಗಿ ದೊರಕುತ್ತಿಲ್ಲ
ಪ್ರಾಯೋಗಿಕ ಮತ್ತು ಪ್ರಸ್ತಾಪಿತ ಚಿಕಿತ್ಸೆಗಳು
ಸರ್ವವ್ಯಾಪಿಯಾದ ಈ ರೋಗವನ್ನು ಲಸಿಕೆ ಮಾತ್ರ ತಡೆಯಬಲ್ಲದು ಎಂದು ತರ್ಕಿಸಲಾಗಿದೆ, ಏಕೆಂದರೆ ಲಸಿಕೆಯನ್ನು ಕಡಿಮೆ ವೆಚ್ಚದಲ್ಲಿ ತಯಾರಿಸಬಹುದು, ಅಭಿವೃದ್ಧಿಶೀಲ ದೇಶಗಳಿಗೆ ಇದು ದೊಡ್ಡ ಹೊರೆಯಾಗದು ಮತ್ತು ನಿತ್ಯ ಚಿಕಿತ್ಸೆಗಳ ಅವಶ್ಯಕತೆಯೂ ಇಲ್ಲ. ಆದಾಗ್ಯೂ, 30 ವರ್ಷಗಳ ಸಂಶೋಧನೆಗಳ ನಂತರವೂ HIV-1ಗೆ ಲಸಿಕೆ ಕಂಡು ಹಿಡಿಯಲು ಸಾಧ್ಯವಾಗಿಲ್ಲ.[೧೧೮]
ಪ್ರಸ್ತುತ ಬಳಕೆಯಲ್ಲಿರುವ ಔಷಧಗಳ ಕೆಟ್ಟ ಪರಿಣಾಮಗಳ ಇಳಿಕೆ, ರೋಗಿಗಳು ನಿಷ್ಠರಾಗಿರುವ ನಿಟ್ಟಿನಲ್ಲಿ ಔಷಧಗಳ ಬಳಕೆ ಕ್ರಮಗಳ ಸರಳೀಕರಣ, ಮತ್ತು ಔಷಧಗಳ ನಿರೋಧಕ ಶಕ್ತಿಯನ್ನು ನಿರ್ವಹಿಸಲು ಅತ್ಯುತ್ತಮ ಕ್ರಮಾನುಗತಿಯ ನಿರ್ಣಯ ಇತ್ಯಾದಿಗಳ ಸುಧಾರಣೆಗಾಗಿ ಸಂಶೋಧನೆಗಳು ನಡೆಯುತ್ತಿವೆ.
HIV ಸೋಂಕಿತರಿಗೆ ಅಥವಾ AIDS ರೋಗಿಗಳಿಗೆ ಚಿಕಿತ್ಸೆ ನೀಡುವಾಗ ಅವಕಾಶವಾದಿ ಸೋಂಕುಗಳು ಅಂಟಿಕೊಳ್ಳದಂತೆ ನಿಗಾವಹಿಸುವುದೇ ಹೆಚ್ಚು ಪ್ರಯೋಜನಕಾರಿ ಎಂಬುದನ್ನು ಅನೇಕ ಅಧ್ಯಯನಗಳು ಸಾಬೀತುಪಡಿಸಿವೆ. ಈ ವೈರಸ್‌ಗಳಿಂದ ಸೋಂಕಿತರಲ್ಲದ ರೋಗಿಗಳಿಗೆ ಮತ್ತು ಸೋಂಕಿಗೊಳಗಾಗುವ ಅಪಾಯದಲ್ಲಿರುವವರಿಗೆ ಹೆಪಟೈಟಿಸ್ A ಮತ್ತು ಬ ಚುಚ್ಚುಮದ್ದು ತೆಗೆದುಕೊಳ್ಳಲು ಸಲಹೆ ನೀಡಲಾಗಿದೆ. [೧೧೯]
ವಾಸ್ತವಿಕವಾಗಿ ನಿರೋಧಕ ಶಕ್ತಿಯನ್ನು ಕಳೆದುಕೊಂಡ ರೋಗಿಗಳು ನ್ಯುಮೊಸಿಸ್ಟಿಸ್ ಜಿರೊವೆಕಿ ನ್ಯುಮೋನಿಯಾ (PCP)ಕ್ಕಾಗಿ ರೋಗ ನಿರೋಧಕ ತೆರಪಿ ಪಡೆಯಲು ಕೂಡ ಸಲಹೆಯಿದೆ, ಮತ್ತು ಟೊಕ್ಷೊಪ್ಲಸ್ಮೊಸಿಸ್ ಮತ್ತು ಕ್ರಿಪ್ಟೋಕಾಕಸ್ ಮೆನಿಂಜಿಟಿಸ್ ಹೊಂದಿರುವ ರೋಗಿಗಳಿಗೂ ರೋಗ ನಿರೋಧಕ ತೆರಪಿ ಪ್ರಯೋಜನವಾಗಬಹುದು. [೧೦೧]
ಸಂಶೋಧಕರು ಎಬ್‌ಜೈಮ್‌ ಅನ್ನು ಕಂಡು ಹಿಡಿದಿದ್ದು, ಅದು ಪ್ರೊಟೀನ್ gp120 CD4 ಸಂಧಿಸುವ ಸ್ಥಳಗಳನ್ನು ನಾಶಪಡಿಸುವ ಸಾಮಾರ್ಥ್ಯವನ್ನು ಹೊಂದಿದೆ. ಈ ಪ್ರೊಟೀನ್ ಎಲ್ಲ HIV ಭೇದಗಳಿಗೂ ಸಾಮಾನ್ಯವಾಗಿದ್ದು, B ಲಿಂಫೋಸೈಟ್ಸ್‌ಗಳು ಕೂಡಿಕೊಳ್ಳುವ ಬಿಂದುವಾಗಿದೆ ಮತ್ತು ಆ ನಂತರ ನಿರೋಧಕ ವ್ಯವಸ್ಥೆಯನ್ನು ಹೊಂದಾಣಿಸುತ್ತದೆ.[೧೨೦]
ಜರ್ಮನಿಯ ಬರ್ಲಿನ್‌ನಲ್ಲಿ HIV ಸೋಂಕಿತ 42-ವರ್ಷ ವಯಸ್ಸಿನ ಲುಕೆಮಿಯಾ ರೋಗಿಯೊಬ್ಬರಿಗೆ ಪ್ರಾಯೋಗಿಕವಾಗಿ CCR5 ಜೀವಕೋಶದ-ಮೇಲ್ಮೈ ಗ್ರಾಹಿಯ ಸಾಮಾನ್ಯವಲ್ಲದ ಸ್ವಾಭಾವಿಕ ಪ್ರಭೇದ ಜೀವಕೋಶಗಳಿರುವ ಅಸ್ಥಿ ಮಜ್ಜೆಯ ಕಸಿ ಮಾಡಲಾಯಿತು.
ಈ CCR5-Δ32 ಪ್ರಭೇದದ ಜೀವಕೋಶಗಳೊಂದಿಗೆ ಜನಿಸಿದ ಜನರಲ್ಲಿ ಕೆಲವು ಜೀವಕೋಶಗಳು ಇರುತ್ತವೆ, ಈ ಜೀವಕೋಶಗಳು HIV ಎಳೆಗೆ ನಿರೋಧಕ ಶಕ್ತಿಯಾಗಿ ಕಾರ್ಯ ನಿರ್ವಹಿಸುತ್ತವೆ. ಕಸಿ ಮಾಡಿದ ಸುಮಾರು ಎರಡು ವರ್ಷಗಳ ನಂತರ, ಮತ್ತು ಆಂಟಿರೆಟ್ರೋವೈರಲ್ ಔಷಧಗಳ ಸೇವನೆಯನ್ನೂ ನಿಲ್ಲಿಸಿದ ಬಳಿಕವೂ, ರೋಗಿಯ ರಕ್ತದಲ್ಲಿ HIV ಪತ್ತೆಯಾಗಲಿಲ್ಲ
ಪರ್ಯಾಯ ಔಷಧ
ಏಡ್ಸ್‌ನ ರೋಗ-ಲಕ್ಷಣಗಳನ್ನು ಗುಣಪಡಿಸಲು ಅಥವಾ ರೋಗದ ಓಟಕ್ಕೆ ಕಡಿವಾಣ ಹಾಕಲು ಪರ್ಯಾಯ ಔಷಧದ ವಿವಿಧ ಪ್ರಕಾರಗಳನ್ನು ಬಳಸಲಾಗುತ್ತಿದೆ. [೧೨೨]
ರೋಗದ ಹರಡುವಿಕೆ ಅಥವಾ ಸಾವಿನ ಪ್ರಮಾಣದ ಮೇಲೆ ಪರ್ಯಾಯ ಔಷಧ ತೆರಪಿಗಳು ವಿಶೇಷ ಪರಿಣಾಮ ಬೀರಿಲ್ಲವೆಂಬುದನ್ನು ಅಧ್ಯಯನಗಳು ಸೂಚಿಸುತ್ತವೆ, ಆದರೆ AIDS ಸೋಂಕಿತರ ಜೀವನದ ಗುಣಮಟ್ಟದಲ್ಲಿ ಈ ತೆರಪಿಗಳು ಸುಧಾರಣೆ ತರಬಹುದು. ಈ ತೆರಪಿಗಳಿಂದ ಪ್ರಮುಖವಾಗಿ ಮಾನಸಿಕ ಪ್ರಯೋಜನಗಳೇ ಹೆಚ್ಚು ಎಂದು ತಿಳಿದು ಬಂದಿದೆ.[೧೨೨]
ಕೆಲವು ರೋಗ-ಲಕ್ಷಣಗಳನ್ನು ತಗ್ಗಿಸುವ ನಿಟ್ಟಿನಲ್ಲಿ ಸೂಜಿ ಜಿಕಿತ್ಸೆ ನೀಡಲಾಗಿದೆಯಾದರೂ, ಅದು ಯಶಸ್ಸು ಕಂಡಿಲ್ಲ, ಮತ್ತು HIV ಸೋಂಕಿನಿಂದ ಗುಣಮುಖಗೊಳಿಸಲು ಅದಕ್ಕೆ ಸಾಧ್ಯವಾಗಿಲ್ಲ. [೧೨೩] ಮೂಲಿಕೆ (ಹರ್ಬಲ್) ಔಷಧಗಳ ಪರಿಣಾಮವನ್ನು ಪರೀಕ್ಷಿಸುವ ಸಲುವಾಗಿ ಹಲವು ಯಾದೃಚ್ಛಿಕ ವೈದ್ಯಕೀಯ ಪ್ರಯೋಗಗಳನ್ನು ಕೈಗೊಂಡಾಗ ಈ ಮೂಲಿಕೆಗಳು ರೋಗದ ಪ್ರಗತಿ ಮೇಲೆ ವಿಶೇಷ ಪರಿಣಾಮ ಬೀರಿದ್ದಕ್ಕೆ ಯಾವುದೇ ನಿದರ್ಶನಗಳಿಲ್ಲ, ಬದಲಾಗಿ ಕೆಟ್ಟ-ಪರಿಣಾಮಗಳನ್ನೇ ಹೆಚ್ಚಿಸಿವೆ ಎನ್ನಬಹುದು.[೧೨೪]
ಸಾಕಷ್ಟು ಪೌಷ್ಟಿಕ ಆಹಾರಗಳನ್ನು ತೆಗೆದುಕೊಳ್ಳುವ HIV- ಸೋಂಕಿತ ವಯಸ್ಕರಿಗೆ ಬಹು ವಿಟಮಿನ್‌ಗಳನ್ನು ನೀಡಿದರೂ ರೋಗದ ಹರಡುವಿಕೆ ಮತ್ತು ಸಾವಿನ ಪ್ರಮಾಣದಲ್ಲಿ ಯಾವುದೇ ವಿಶೇಷ ಬದಲಾವಣೆಗಳಾಗಿಲ್ಲ. ನಿರೋಧಕ ಶಕ್ತಿ ಮತ್ತು ಪೌಷ್ಟಿಕವಾಗಿರುವ ಗರ್ಭಿಣಿ ಮತ್ತು ಹಾಲೂಡಿಸುವ ಮಹಿಳೆ ಮೇಲೆ ನಡೆಸಿದ ದೊಡ್ಡ ಪ್ರಮಾಣದ ತಂಜಾನಿಯನ್ ಪ್ರಯೋಗವು, ತಾಯಿ ಮತ್ತು ಮಕ್ಕಳಿಗೆ ಇಬ್ಬರಿಗೂ ದಿನನಿತ್ಯ ಬಹು ವಿಟಮಿನ್ ಕೊಡುವುದರಿಂದ ಅನೇಕ ಪ್ರಯೋಜನಗಳಿವೆ ಎಂಬುದನ್ನು ತೋರಿಸಿದೆ. [೧೨೫]
HIV-ಸೋಂಕಿತರು RDA ಹಂತಗಳಲ್ಲಿ ಸಣ್ಣ ಪ್ರಮಾಣದಲ್ಲಿ ಪೌಷ್ಟಿಕಾಂಶಗಳಿರುವ ಆಹಾರಗಳನ್ನು ತೆಗೆದುಕೊಳ್ಳಲು ವಿಶ್ವ ಆರೋಗ್ಯ ಸಂಸ್ಥೆಯು ಶಿಫಾರಸು ಮಾಡಿದೆ.[೧೨೬]
ವಿಟಮಿನ್ A ನೀಡುವುದರಿಂದಾಗಿ ಮಕ್ಕಳಲ್ಲಿ ಸಾವಿನ ಪ್ರಮಾಣ ಕಡಿಮೆಯಾಗಿ, ಸುಧಾರಿಸಿರುವುದಕ್ಕೆ ಕೆಲವು ನಿದರ್ಶನಗಳಿವೆ.[೧೨೫] ಸೆಲೆನಿಯಮ್‌ಅನ್ನು ನಿತ್ಯ ಸೇವಿಸುವುದರಿಂದ HIV ವೈರಸ್‌ಗಳನ್ನು ತಗ್ಗಿಸಬಹುದು, ಅಲ್ಲದೆ ಜೊತೆಗೆ CD4 ಸಂಖ್ಯೆಗಳಲ್ಲೂ ಸುಧಾರಣೆಯಾಗುತ್ತದೆ.
ಪ್ರಮಾಣಿತ ಆಂಟಿವೈರಲ್ ಚಿಕಿತ್ಸೆಯ ಜೊತೆಗೆ ಸಹಾಯಕ ತೆರಪಿಯಾಗಿ ಸೆಲೆನಿಯಮ್‌ಅನ್ನು ಸೇವಿಸಬಹುದು
ಮುನ್ನರಿವು
HIV ಸೋಂಕುಗೊಂಡ ನಂತರ ಚಿಕಿತ್ಸೆಯಿಲ್ಲದೆ ಕನಿಷ್ಟ ಬದುಕುವ ನಡುವಣ ಅವಧಿಯು 9ರಿಂದ 11 ವರ್ಷಗಳಿರಬಹುದು ಎಂದು ಅಂದಾಜು ಮಾಡಲಾಗಿದೆ, ಇದು HIVಯ ಉಪ ವಿಧ,[೭] ಮತ್ತು ಸೋಂಕು ಪ್ರಕರಣವನ್ನು ಅವಲಂಬಿಸಿ 6 ಮತ್ತು 19 ತಿಂಗಳ ಚಿಕಿತ್ಸೆ ಲಭ್ಯವಿಲ್ಲದಿರುವೆಡೆಗಳಲ್ಲಿ AIDS ಪತ್ತೆಯಾದ ಬಳಿಕ ಸೋಂಕಿತ ವ್ಯಕ್ತಿ ಬದುಕುವ ನಡುವಣ ಪ್ರಮಾಣವನ್ನು ಅವಲಂಬಿಸಿದೆ. [೧೨೮]
ಚಿಕಿತ್ಸೆ ಲಭ್ಯವಿರುವ ಎಲ್ಲ ಪ್ರದೇಶಗಳಲ್ಲಿ HIV ಸೋಂಕಿಗೆ ಮತ್ತು AIDSಗೆ HAART ತೆರಪಿಯೇ ಪರಿಣಾಮಕಾರಿ ಚಿಕಿತ್ಸೆಯಾಗಿದ್ದು, ಇದು ಈ ರೋಗದಿಂದ ಬರುವ ಸಾವಿನ ಪ್ರಮಾಣವನ್ನು 80%ರಷ್ಟು ತಗ್ಗಿಸಿದೆ, ಮತ್ತು ಹೊಸತಾಗಿ ಪತ್ತೆಯಾದ HIV-ಸೋಂಕಿತ ವ್ಯಕ್ತಿಯ ಜೀವಿತಾವಧಿ ನಿರೀಕ್ಷೆಯನ್ನು ಸುಮಾರು 20 ವರ್ಷಗಳಷ್ಟು ಹೆಚ್ಚಿಸಿದೆ. [೧೨೯]
ಒಂದೆಡೆ ಹೊಸ ಚಿಕಿತ್ಸೆಗಳ ಅಭಿವೃದ್ಧಿ ಮುಂದುವರಿದಿದ್ದರೆ, ಇನ್ನೊಂದೆಡೆ ಈ ಚಿಕಿತ್ಸೆಗಳಿಗೆ HIVಯು ನಿರೋಧಕ ಶಕ್ತಿಯಾಗಿ ವಿಕಸಿಸುವುದೂ ಮುಂದುವರಿದಿದೆ. ಆಂಟಿರೆಟ್ರೋವೈರಲ್ ತೆರಪಿ ಚಿಕಿತ್ಸೆ ಪಡೆಯದಿದ್ದರೆ ಒಂದು ವರ್ಷದೊಳಗೆ ಸಾವು ಸಂಭವಿಸುತ್ತದೆ.[೩೫] ನಿರೋಧಕ ವ್ಯವಸ್ಥೆಯ ವೈಫಲ್ಯದಿಂದಾಗಿ ಕಾಣಿಸಿಕೊಳ್ಳುವ ಗಡ್ಡೆಗಳು(ಕ್ಯಾನ್ಸರ್) ಅಥವಾ ಅವಕಾಶವಾದಿ ಸೋಂಕುಗಳಿಂದಾಗಿ ಹೆಚ್ಚಿನ ರೋಗಿಗಳು ಸಾವನ್ನಪ್ಪುತ್ತಾರೆ. [೧೩೦]
ರೋಗದ ಪ್ರಗತಿ ಕುರಿತಾದ ವೈದ್ಯಕೀಯ ಪ್ರಮಾಣದಲ್ಲಿ ವ್ಯಕ್ತಿಯಿಂದ ವ್ಯಕ್ತಿಗೆ ಸಾಕಷ್ಟು ವ್ಯತ್ಯಾಸಗಳಾಗಬಹುದು, ಏಕೆಂದರೆ ಸೋಂಕಿತನ ಮೇಲೆ ರೋಗದ ಪ್ರಭಾವ, ನಿರೋಧಕ ಕ್ರಿಯೆ[೩೬][೩೭][೪೦] ಆರೋಗ್ಯಪಾಲನೆ, ಸಹ-ಸೋಂಕುಗಳು[೩೫][೧೩೦] ಮತ್ತು ರೋಗದಲ್ಲಿ ವೈರಸ್‌ನ ನಿರ್ದಿಷ್ಟ ಎಳೆಯ ಪಾಲು ಇತ್ಯಾದಿಗಳು ರೋಗದ ಪ್ರಗತಿ ಮೇಲೆ ಪರಿಣಾಮ ಬೀರುತ್ತವೆ
ಸಾಂಕ್ರಾಮಿಕ ರೋಗಶಾಸ್ತ್ರ
ಸರ್ವವ್ಯಾಪಿಯಾಗಿರುವ AIDSನ್ನು ಹಲವು ಸಾಂಕ್ರಾಮಿಕ ರೋಗಗಳ ಪ್ರತ್ಯೇಕ ಉಪ ವಿಧಗಳಲ್ಲೂ ಕಾಣಲು ಸಾಧ್ಯ; ಏಡ್ಸ್ ಹರಡುವಿಕೆಗೆ ಲೈಂಗಿಕ ಹರಡುವಿಕೆ ಮತ್ತು ಮಗು ಜನನ ಹಾಗೂ ಸ್ತನ್ಯಪಾನದ ವೇಳೆ ತಾಯಿಯಿಂದ ಮಗುವಿಕೆ ಹರಡುವಿಕೆಯು ಪ್ರಮುಖ ಕಾರಣಗಳಾಗಿವೆ.[೬] ಇತ್ತೀಚೆಗೆ ಜಗತ್ತಿನ ಹಲವು ಪ್ರದೇಶಗಳಲ್ಲಿ ಆಂಟಿರೆಟ್ರೋವೈರಲ್ ಚಿಕಿತ್ಸೆ ಮತ್ತು ಪಾಲನೆ ಸುಧಾರಿಸಿದ್ದಾಗ್ಯೂ, AIDS ರೋಗ 2007ರಲ್ಲಿ 2.1 ದಶಲಕ್ಷ (1.9–2.4 ದಶಲಕ್ಷದ ನಡುವೆ) ಜನರನ್ನು ಬಲಿತೆಗೆದುಕೊಂಡಿದೆ, ಈ ಪೈಕಿ 330,000 ಮಂದಿ 15 ವರ್ಷಕ್ಕಿಂತ ಕೆಳಗಿನ ಮಕ್ಕಳಿದ್ದಾರೆ.[೭]
ಜಾಗತಿಕವಾಗಿ, 2007ರ ಹೊತ್ತಿಗೆ 2.5 ದಶಲಕ್ಷ ಮಕ್ಕಳು ಸೇರಿದಂತೆ 33.2 ದಶಲಕ್ಷ ಮಂದಿ HIV ಸೋಂಕಿಗೆ ಒಳಗಾಗಿದ್ದರು.
2007ರ ವೇಳೆಗೆ 420,000 ಮಕ್ಕಳು ಸೇರಿದಂತೆ 2.5 ದಶಲಕ್ಷ (1.8–4.1 ದಶಲಕ್ಷದ ನಡುವೆ) ಮಂದಿಗೆ ಹೊಸತಾಗಿ ಸೊಂಕು ತಗುಲಿರುವುದೆಂದು ಅಂದಾಜು ಮಾಡಲಾಗಿದೆ. [೭]
ಆಫ್ರಿಕಾದ ಉಪ-ಸಹರಾ ಅತ್ಯಂತ ಹೆಚ್ಚು ಸಂಖ್ಯೆಯ ಏಡ್ಸ್ ರೋಗಿಗಳನ್ನು ಹೊಂದಿರುವ ಪ್ರದೇಶ. 2007ರ ಹೊತ್ತಿಗೆ, ಇಲ್ಲಿನ ಜನಸಂಖ್ಯೆಯ 68% ಮಂದಿಗೆ AIDS ರೋಗವಿರುವುದು ಮತ್ತು 76% ಮಂದಿ AIDSನಿಂದಾಗಿ ಸಾವನ್ನಪ್ಪಿರುವ ಬಗ್ಗೆ ಒಂದು ಅಂದಾಜು ಮಾಡಲಾಗಿತ್ತು. ಇದಲ್ಲದೆ ಈ ಪ್ರದೇಶದಲ್ಲಿ 1.7 ದಶಲಕ್ಷ ಮಂದಿ ಹೊಸತಾಗಿ ಏಡ್ಸ್ ಅಂಟಿಸಿಕೊಂಡಿರುವುದರಿಂದ HIV ಸೋಂಕಿತ ಪ್ರಕರಣಗಳು 22.5 ದಶಲಕ್ಷಕ್ಕೆ ಏರಿದೆ, ಮತ್ತು ಜೊತೆಗೆ 11.4 ದಶಲಕ್ಷ ಅನಾಥ AIDS ರೋಗಿಗಳು ಈ ಪ್ರದೇಶದಲ್ಲಿ ವಾಸಿಸುತ್ತಿದ್ದಾರೆ.
ಇತರ ಪ್ರದೇಶಗಳಿಗಿಂತ ಭಿನ್ನವಾಗಿ, 2007ರ ಹೊತ್ತಿಗೆ ಅಫ್ರಿಕಾದ ಉಪ-ಸಹರಾದಲ್ಲಿ ವಾಸಿಸುತ್ತಿರುವ HIV ಸೋಂಕಿತರ ಪೈಕಿ ಹೆಚ್ಚಿನವರು (61%) ಮಹಿಳೆಯರು. 2007ರ ವೇಳೆಗೆ ವಯಸ್ಕರಲ್ಲಿ ಹರಡುವಿಕೆಯ ಪ್ರಮಾಣ 5.0% ಎಂದು ಅಂದಾಜು ಮಾಡಲಾಗಿತ್ತು, ಮತ್ತು ಈ ಪ್ರದೇಶದಲ್ಲಿ ಸಂಭವಿಸುವ ಮರಣಗಳಿಗೆ AIDS ಪ್ರಮುಖ ಕಾರಣವಾಗಿರುವುದು ಹಾಗೆಯೇ ಮುಂದುವರಿದಿದೆ. [೭] ಜಗತ್ತಿನಲ್ಲೇ ಅತಿ ಹೆಚ್ಚು HIV ರೋಗಿಗಳು ದಕ್ಷಿಣ ಆಫ್ರಿಕಾದಲ್ಲಿದ್ದಾರೆ, ನೈಜೀರಿಯಾ ಮತ್ತು ಭಾರತ ನಂತರದ ಸ್ಥಾನಗಳಲ್ಲಿವೆ.[೧೩೩] ಏಡ್ಸ್ ಪೀಡಿತ ಭೂಭಾಗದಲ್ಲಿ ದಕ್ಷಿಣ & ಆಗ್ನೇಯ ಏಷ್ಯಾ ಎರಡನೆ ಸ್ಥಾನದಲ್ಲಿದೆ; ಇಲ್ಲಿನ ನಿವಾಸಿಗಳ ಪೈಕಿ 18% ಏಡ್ಸ್ ಪೀಡಿತರೆಂದು 2007ರಲ್ಲಿ ಅಂದಾಜು ಮಾಡಲಾಗಿತ್ತು, ಮತ್ತು AIDSನಿಂದಾಗಿ ಈ ಭೂಭಾಗದಲ್ಲಿ ಸುಮಾರು 300,000 ಸಾವುಗಳು ಸಂಭವಿಸಿವೆ.[೭]
ಭಾರತದಲ್ಲಿ ಸುಮಾರು 2.5 ದಶಲಕ್ಷ ಸೋಂಕಿತರಿದ್ದಾರೆ ಮತ್ತು ಒಂದು ಅಂದಾಜು ಪ್ರಕಾರ ವಯಸ್ಕರಲ್ಲಿ 0.36% ರೋಗ ಹರಡಿಕೆಯಿದೆ.[೭] ಏಡ್ಸ್ನಿಂದ ಘಾಸಿಗೊಂಡ ದೇಶಗಳಲ್ಲಿ ಜೀವಿತಾವಧಿ ನಿರೀಕ್ಷೆಯು ನಾಟಕೀಯವಾಗಿ ಇಳಿದಿದೆ; ಉದಾಹರಣೆಗೆ, 2006ರಲ್ಲಿ ಬೊಟ್ಸಾವಾನದಲ್ಲಿ ಇದು 65ರಿಂದ 35 ವರ್ಷಗಳಿಗೆ ಇಳಿದಿದೆ ಎಂದು ಅಂದಾಜಿಸಲಾಗಿದೆ.[೬]
ಅಮೆರಿಕ ಸಂಯುಕ್ತ ಸ್ಥಾನದಲ್ಲಿ, ಆಫ್ರಿಕನ್-ಅಮೆರಿಕನ್ ತರುಣಿಯರಿಗೆ HIV ಸೋಂಕು ತಗುಲುವ ಅಪಾಯ ಹೆಚ್ಚಿರುತ್ತದೆ.
ಏಡ್ಸ್ ಬಗ್ಗೆ ಮಾಹಿತಿಯ ಕೊರತೆ ಮತ್ತು ತಮ್ಮನ್ನು ಬಾಧಿಸದು ಎಂಬ ಭ್ರಮೆ ಇದಕ್ಕೆ ಕಾರಣ, ಅಲ್ಲದೆ ಆರೋಗ್ಯ-ಪಾಲನೆ ಸಂಪನ್ಮೂಲಗಳ ಅಲಭ್ಯತೆ ಮತ್ತು ಪುರುಷ ಲೈಂಗಿಕ ಜೊತೆಗಾರನೊಂದಿಗೆ ಲೈಂಗಿಕ ಸಂಪರ್ಕ ಹೊಂದುವುದರಿಂದಾಗುವ ಅಪಾಯದ ಸಾಧ್ಯತೆಗಳು ಹೆಚ್ಚು.[೧೩೪]
ಅಮೆರಿಕ ಸಂಯುಕ್ತ ಸಂಸ್ಥಾನದಲ್ಲಿ AIDS ಹರಡಿಕೆಯಲ್ಲಿ ಭೌಗೋಳಿಕ ವ್ಯತ್ಯಾಸಗಳಿವೆ, ಗ್ರಾಮೀಣ ಪ್ರದೇಶಗಳಲ್ಲಿ ಮತ್ತು ದಕ್ಷಿಣದ ರಾಜ್ಯಗಳಲ್ಲಿ ನಿರ್ದಿಷ್ಟವಾಗಿ ಅಪಲಾಚಿಯನ್ ಮತ್ತು ಮಿಸಿಸಿಪಿ ಪ್ರಸ್ಥ ಭೂಮಿ ಪ್ರದೇಶಗಳಲ್ಲಿ ಮತ್ತು ಮೆಕ್ಸಿಕೊ ಗಡಿಭಾಗದಲ್ಲಿ ಇದು ತೀರಾ ಸಾಮಾನ್ಯ
ಇತಿಹಾಸ
ಮೊಟ್ಟ ಮೊದಲ AIDS ಪ್ರಕರಣ ಜೂನ್ 5, 1981ರಂದು ವರದಿಯಾಯಿತು, U.S.ನ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್(CDC) ಸಂಸ್ಥೆಯು ಲಾಸ್ ಎಂಜಲೀಸ್‌ನ ಐವರು ಸಲಿಂಗಕಾಮಿಗಳಲ್ಲಿ ಏಡ್ಸ್‌ಗೆ ಕಾರಣವಾದ ನ್ಯುಮೊಸಿಸ್ಟಿಸ್ ಕಾರಿನೀ ನ್ಯುಮೋನಿಯಾದ (ಈಗಲೂ PCP ಎಂದೇ ವರ್ಗೀಕರಿಸಲಾಗಿದೆ, ಆದರೆ ನ್ಯುಮೊಸಿಸ್ಟಿಸ್ ಜಿರೊವೆಸೀ ಇದಕ್ಕೆ ಕಾರಣ ಎನ್ನಲಾಗಿದೆ)ಗುಂಪು ಇರುವುದನ್ನು ದಾಖಲಿಸಿತು.[೧೩೬] ಆರಂಭದಲ್ಲಿ, CDC ಈ ರೋಗಕ್ಕೆ ಯಾವುದೇ ಅಧಿಕೃತವಾದ ಹೆಸರನ್ನು ಹೊಂದಿರಲಿಲ್ಲ, ಅದರ ಜೊತೆಗಿರುವ ರೋಗಗಳ ಆಧಾರದಲ್ಲಿ ಈ ಕುರಿತು ಆಗಿಂದಾಗ್ಗೆ ಹೇಳಲಾಗುತ್ತಿತ್ತು, ಉದಾಹರಣೆಗೆ HIV ವೈರಸ್‌ನ್ನೇ ಆರಂಭದಲ್ಲಿ ಸಂಶೋಧಕರು ಲಿಂಫಡಿನೋಪತಿ ರೋಗ ಎಂದು ಕರೆಯುತ್ತಿದ್ದರು.[೬೯][೭೦]
ಈ ವೈರಸ್‌ಗಳಿಂದಾಗಿ ಕಾಪೊಸಿಯ ಸಾರ್ಕೋಮಾ ಮತ್ತು ಅವಕಾಶವಾದಿ ಸೋಂಕುಗಳಿಗೂ ಎಡೆ ಸಿಕ್ಕಿತು, ಬಳಿಕ 1981ರಲ್ಲಿ ಇದೇ ಹೆಸರಿನಲ್ಲಿ ಕಾರ್ಯಪಡೆಯನ್ನೂ ರಚಿಸಲಾಯಿತು.[೧೩೭] ಸಾಮಾನ್ಯ ಪತ್ರಿಕೆಗಳಲ್ಲಿ, ಸಲಿಂಗಕಾಮಿ-ಸಂಬಂಧಿತ ರೋಗ ನಿರೋಧಕ ಶಕ್ತಿ ಹೀನತೆ ಅರ್ಥ ನೀಡುವ GRID ಪದ ಹುಟ್ಟಿಕೊಂಡಿತು.[೧೩೮] ಈ ನಡುವೆ ಸೂಕ್ತ ಹೆಸರಿಗಾಗಿ ಹುಡುಕಾಟ ನಡೆಸಿದ CDCಯು, ಸೋಂಕಿತ ಸಮುದಾಯಗಳನ್ನು ನೋಡಿ “ದಿ 4H ರೋಗ,” ಎಂದು ಹೆಸರಿಟ್ಟಿತು, ಇದು ಹೈಟಿಯನ್ನರು, ಸಲಿಂಗಕಾಮಿಗಳು, ಹೆಮೊಫಿಲಿಯಾಕ್ಸ್‌, ಮತ್ತು ಹೆರಾಯಿನ್ ಬಳಕೆದಾರರಿಗೆ ಸೀಮಿತವಾಗಿತ್ತು.[೧೩೯]
ಆದಾಗ್ಯೂ, AIDS ಕೇವಲ ಸಲಿಂಗಕಾಮಿ ಸಮುದಾಯಕ್ಕೆ[೧೩೭] ಮಾತ್ರ ಸೀಮಿತವಲ್ಲ, GRID ಪದ ತಪ್ಪುದಾರಿಗೆ ಎಳೆದಿದೆ ಎಂದು ತೀರ್ಮಾನಿಸಲಾಯಿತು, ಮತ್ತು 1982ರ ಜುಲೈ ತಿಂಗಳಲ್ಲಿ ನಡೆದ ಸಭೆಯೊಂದರಲ್ಲಿ ಏಡ್ಸ್ ಪದವನ್ನು ಪರಿಚಯಿಸಲಾಯಿತು. [೧೪೦]
ಸೆಪ್ಟೆಂಬರ್ 1982ರಲ್ಲಿ CDCಯು AIDS ಪದ ಬಳಕೆ ಆರಂಭಿಸಿತು ಮತ್ತು ಈ ರೋಗದ ಕುರಿತು ಸರಿಯಾದ ವ್ಯಾಖ್ಯಾನ ನೀಡಿತು.[೧೪೧]
ಈ ನಡುವೆ, ಭಾರಿ ಚರ್ಚಿತವಾಗಿದ್ದ ವಿವಾದಾಸ್ಪದ OPV AIDS ಕಲ್ಪನೆ ಸಿದ್ಧಾಂತದ ಪ್ರಕಾರ, 1950ರ ಅಂತ್ಯದಲ್ಲಿ ಹಿಲರಿ ಕೊಪ್ರೊವಿಸ್ಕಿ ಅವರು ಬೆಲ್ಜಿಯಂ ಕಾಂಗೊದಲ್ಲಿ ಪೋಲಿಯೋಮೈಲಿಟಿಸ್ ಲಸಿಕೆ ಕುರಿತು ಸಂಶೋಧನೆ ನಡೆಸುತ್ತಿದ್ದಾಗಲೇ ಏಡ್ಸ್ ಸಾಂಕ್ರಾಮಿಕ ರೋಗ ಶುರುವಾಗಿತ್ತು, ಆದರೆ ಯಾರ ಗಮನಕ್ಕೂ ಬಂದಿರಲಿಲ್ಲ. [೧೪೨][೧೪೩]
ಆದರೆ ಈ ಸಿದ್ಧಾಂತವನ್ನು ಲಭ್ಯವಿರುವ ಯಾವುದೇ ನಿದರ್ಶನಗಳು ಪುಷ್ಟೀಕರಿಸುವುದಿಲ್ಲ ಎಂಬುದು ವಿಜ್ಞಾನಿಗಳ ಒಮ್ಮತದ ಅಭಿಪ್ರಾಯ.[೧೪೪][೧೪೫][೧೪೬]
HIV ಪ್ರಾಯಶಃ ಆಫ್ರಿಕಾದಿಂದ ಹೈಟಿಗೆ ಮತ್ತು ಆ ನಂತರ 1969ರ ಸುಮಾರಿಗೆ ಅಮೆರಿಕ ಸಂಯುಕ್ತ ಸಂಸ್ಥಾನವನ್ನು ಪ್ರವೇಶಿಸಿತು ಎಂದು ಇತ್ತೀಚಿನ ಅಧ್ಯಯನಗಳು ಹೇಳುತ್ತವೆ
ಸಮಾಜ ಮತ್ತು ಸಂಸ್ಕೃತಿ
AIDS ಅಪವಾದವು ಜಗತ್ತಿನಲ್ಲಿ ವಿವಿಧ ಬಗೆಗಳಲ್ಲಿ ಅಸ್ತಿತ್ವದಲಿದ್ದು, ಬಹಿಷ್ಕಾರ, ತಿರಸ್ಕಾರ, ಪಕ್ಷಪಾತ ಮತ್ತು HIV ಸೋಂಕಿತ ಜನರಿಂದ ದೂರವಿರುವುದು; ಪೂರ್ವ ಅನುಮತಿಯಿಲ್ಲದೆ ಕಡ್ಡಾಯ HIV ಪರೀಕ್ಷೆ ಅಥವಾ ಗೋಪ್ಯತೆಯ ರಕ್ಷಣೆ; HIV ಸೋಂಕಿತ ವ್ಯಕ್ತಿಗಳ ಮೇಲೆ ಹಿಂಸೆ ಅಥವಾ HIV ಸೋಂಕಿತರಾಗಿದ್ದಾರೆಂದು ಭಾವಿಸುವುದು; HIV ಸೋಂಕಿತ ವ್ಯಕ್ತಿಗಳೊಂದಿಗೆ ಸಂಪರ್ಕ ನಿಷೇಧ ಸೇರಿದಂತೆ ಇತ್ಯಾದಿ ವಿವಿಧ ಬಗೆಗಳಲ್ಲಿ ಅಸ್ತಿತ್ವದಲ್ಲಿದೆ. [೧೪೮]
ಅಪವಾದ-ಸಂಬಂಧಿತ ಹಿಂಸೆ ಅಥವಾ ಆತಂಕದಿಂದ ಅನೇಕರು HIV ಪರೀಕ್ಷೆ, ಅದರ ಫಲಿತಾಂಶಗಳಿಂದಾಗುವ ಪರಿಣಾಮ ಅಥವಾ ಚಿಕಿತ್ಸೆ ಪಡೆಯುವುದರಿಂದ ದೂರವಿರುತ್ತಾರೆ, ಇದರಿಂದಾಗಿ ನಿಭಾಯಿಸಬಹುದಾಗಿದ್ದ ಆಗಿಂದಾಗ್ಗೆ ಬರುವ ಅನಾರೋಗ್ಯ ಮಾರಣಾಂತಿಕವಾಗಿ ಪರಿವರ್ತನೆಗೊಳ್ಳುವ ಸಾಧ್ಯತೆಗಳುಂಟು ಮತ್ತು HIV ಹರಡುವಿಕೆಯೂ ಶಾಶ್ವತವಾಗಬಹುದು.[೧೪೯]
AIDS ಅಪವಾದವನ್ನು ಇನ್ನೂ ಮೂರು ವಿಭಾಗಗಳಾಗಿ ಈ ಕೆಳಗೆ ವರ್ಗೀಕರಿಸಲಾಗಿದೆ:
ನಿಮಿತ್ತ AIDS ಅಪವಾದ — ಹರಡಿಕೆಯಿರುವ ಮತ್ತು ಮಾರಣಾಂತಿಕವಾದ ಯಾವುದೇ ರೋಗದ ಜೊತೆಗಿರಬಹುದಾದ ಆತಂಕ ಮತ್ತು ಊಹೆಯ ಪ್ರತಿಫಲನ. [೧೫೦]
ಸಾಂಕೇತಿಕ AIDS ಅಪವಾದ — ಸಾಮಾಜಿಕ ಸಮುದಾಯಗಳಲ್ಲಿ ವರ್ತನೆಗಳನ್ನು ಹೇಳಿಕೊಳ್ಳಲು HIV/AIDSನ ಬಳಕೆ ಅಥವಾ ರೋಗದ ಜೊತೆಗೆ ಗುರುತಿಸಿಕೊಂಡಿರುವ ಜೀವನ ಶೈಲಿ.[೧೫೦]
AIDS ಅಪವಾದಕ್ಕೆ ಉಪಚಾರ — HIV/ಏಡ್ಸ್ ರೋಗಿಗಳ ಅಥವಾ HIV- ಪಾಸಿಟಿವ್ ಸೋಂಕಿತರ ದೂಷಣೆ.[೧೫೧]
ಸಾಮಾನ್ಯವಾಗಿ, AIDS ಅಪವಾದವನ್ನು ಒಂದು ಅಥವಾ ಹೆಚ್ಚಿನ ಇತರ ಅಪವಾದಗಳೊಂದಿಗೆ ಅಂದರೆ ನಿರ್ದಿಷ್ಟವಾಗಿ ಸಲಿಂಗಕಾಮ, ಉಭಯಲಿಂಗರತಿ, ಸ್ವಚ್ಛಂದ ಸಂಭೋಗ, ವೇಶ್ಯಾವೃತ್ತಿ, ಮತ್ತು ಮಾದಕ ದ್ರವ್ಯಗಳ ಬಳಕೆ ಜೊತೆ ಸಂಯೋಜಿಸಿ ಹೇಳಲಾಗುತ್ತದೆ.
ಹಲವು ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ, AIDS ಮತ್ತು ಸಲಿಂಗಕಾಮ ಅಥವಾ ಉಭಯಲಿಂಗರತಿ ನಡುವೆ ಒಂದು ಒಡನಾಟವಿದೆ, ಮತ್ತು ಈ ಒಡನಾಟವು ಉನ್ನತ ಮಟ್ಟದ ಲೈಂಗಿಕ ಪೂರ್ವಾಗ್ರಹಗಳಾದ ಸಲಿಂಗಕಾಮ-ವಿರೋಧಿ ವರ್ತನೆಗಳೊಂದಿಗೆ ಪರಸ್ಪರ ಸಂಬಂಧ ಹೊಂದಿದೆ.[೧೫೨]
AIDS ಮತ್ತು ಸೋಂಕಿತರಲ್ಲದ ಪುರುಷರ ನಡುವೆ ಲೈಂಗಿಕತೆ ಸೇರಿದಂತೆ ಎಲ್ಲ ಪುರುಷ-ಲೈಂಗಿಕ ನಡವಳಿಕೆ ನಡುವೆ ನೋಡಬಹುದಾದ ಒಡನಾಟವೂ ಇರುತ್ತದೆ
ಆರ್ಥಿಕ ಪರಿಣಾಮ
HIV ಮತ್ತು AIDS ರೋಗವು ಮಾನವ ಸಂಪನ್ಮೂಲವನ್ನು ಕಡಿಮೆಗೊಳಿಸುವುದರೊಂದಿಗೆ ಆರ್ಥಿಕ ಪ್ರಗತಿ ಮೇಲೆ ಪ್ರಭಾವ ಬೀರುತ್ತದೆ.[೮]
ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ಲಭ್ಯವಿರುವಂತೆ ಸರಿಯಾದ ಪೋಷಣೆ, ಆರೋಗ್ಯ ಪಾಲನೆ ಮತ್ತು ಔಷಧಗಳಿಲ್ಲದೆ AIDS-ಸಂಬಂಧಿತ ಸಮಸ್ಯೆಗಳಿಂದ ಸಾಕಷ್ಟು ಜನರು ನರಳುತ್ತಾರೆ ಮತ್ತು ಸಾವನ್ನಪ್ಪುತ್ತಾರೆ.
ಏಡ್ಸ್ ರೋಗಿಗಳಿಗೆ ಕೆಲಸ ಮಾಡಲು ಆಗುವುದಿಲ್ಲ, ಮಾತ್ರವಲ್ಲದೆ ಅವರಿಗೆ ಮಹತ್ವದ ವೈದ್ಯಕೀಯ ಕಾಳಜಿ ಅವಶ್ಯ.
AIDS ಪೀಡಿತರ ಗಣನೀಯ ಸಂಖ್ಯೆಯಿರುವುದರಿಂದಾಗಿ ದೇಶಗಳ ಆರ್ಥಿಕತೆಗಳು ಮತ್ತು ಸಮಾಜಗಳು ಪತನಗೊಳ್ಳಬಹುದು ಎಂದು ಭವಿಷ್ಯವಾಣಿ ಹೇಳಿದೆ. ಸೋಂಕು ಭಾರಿ ಪ್ರಮಾಣದಲ್ಲಿರುವ ಪ್ರದೇಶಗಳಲ್ಲಿ, ಈ ಸಾಂಕ್ರಾಮಿಕ ರೋಗವು ವಯಸ್ಸಾದ ಅಜ್ಜ-ಅಜ್ಜಿಯಂದಿರನ್ನು ನೋಡಿಕೊಳ್ಳುತ್ತಿದ್ದ ಹಲವರನ್ನು ಅನಾಥರನ್ನಾಗಿ ಮಾಡಿ, ಈಗ ಅವರಿಂದಲೇ ಉಪಚಾರ ಪಡೆಯುವಂತೆ ಮಾಡಿದೆ.[೧೫೩]
ಏಡ್ಸ್ ರೋಗಿಗಳ ಸಂಖ್ಯೆ ಅಧಿಕವಿರುವ ಭೂಭಾಗದಲ್ಲಿ ಮರಣ ಪ್ರಮಾಣ ಹೆಚ್ಚುವುದು ಕಿರು ಕಸುಬಿನಲ್ಲಿ ತೊಡಗಿರುವ ಜನಸಂಖ್ಯೆ ಮತ್ತು ಕಾರ್ಮಿಕ ವರ್ಗದ ಮೇಲೆ ಪರಿಣಾಮ ಬೀರುತ್ತದೆ.
ಈ ಸಣ್ಣ ಪ್ರಮಾಣದ ಕಾರ್ಮಿಕ ವರ್ಗದಲ್ಲಿ ಕಡಿಮೆ ಜ್ಞಾನ ಮತ್ತು ಕೆಲಸದ ಅನುಭವದ ಕೊರತೆಯಿರುವ ಯುವಕರೇ ಅಧಿಕವಾಗಿರುವುದರಿಂದ ಉತ್ಪಾದನೆ ಇಳಿಮುಖವಾಗುತ್ತದೆ.
ಅನಾರೋಗ್ಯ ಪೀಡಿತ ಕುಟುಂಬದ ಸದಸ್ಯರನ್ನು ಉಪಚರಿಸುವ ನಿಟ್ಟಿನಲ್ಲಿ ಕಾರ್ಮಿಕರು ತೆಗೆದುಕೊಳ್ಳುವ ರಜೆಗಳ ಹೆಚ್ಚಳ ಅಥವಾ ಅನಾರೋಗ್ಯ ರಜೆ ಕೂಡ ಉತ್ಪಾದನೆಯ ಪ್ರಮಾಣವನ್ನು ಇಳಿಸಬಹುದು.
ಜನರು ತಮ್ಮ ಆದಾಯ ಮತ್ತು ಹೆತ್ತವರನ್ನು ಕಳೆದುಕೊಳ್ಳುವುದರಿಂದ ಒಟ್ಟು ಮಾನವ ಸಂಪನ್ಮೂಲ ಮತ್ತು ಬಂಡವಾಳ ಸೃಷ್ಟಿ ವ್ಯವಸ್ಥೆಯನ್ನು ಸಾವಿನ ಪ್ರಮಾಣವು ಬಲಹೀನಗೊಳಿಸಬಹುದು.
ಮುಖ್ಯವಾಗಿ ವಯಸ್ಕ ಯುವಕರನ್ನು ಸಾಯಿಸುವುದರೊಂದಿಗೆ ತೆರಿಗೆ ಪಾವತಿಸುವ ಜನಸಂಖ್ಯೆಯ ಮೇಲೂ ಏಡ್ಸ್ ಪರಿಣಾಮ ಬೀರುತ್ತದೆ, ಇದರಿಂದಾಗಿ ಶಿಕ್ಷಣ ಮತ್ತು AIDS ಹೊರತಾದ ಆರೋಗ್ಯ ಸೇವೆ ಇತ್ಯಾದಿ ಸಾರ್ವಜನಿಕ ವೆಚ್ಚಗಳಿಗೆ ಬೇಕಾಗುವ ಸಂಪನ್ಮೂಲಗಳ ಕೊರತೆಯಾಗಬಹುದು. ರಾಜ್ಯದ ಹಣಕಾಸಿನ ಮೇಲೂ ಇದರ ಪರಿಣಾಮವುಂಟಾಗಿ ಆರ್ಥಿಕತೆಯ ಬೆಳವಣಿಗೆಯು ಕುಂಠಿತಗೊಳ್ಳಬಹುದು.
ಇದರಿಂದಾಗಿ ತೆರಿಗೆ ಮೂಲ ನಿಧಾನ ಬೆಳವಣಿಗೆಯಾಗಬಹುದು, ಮಾತ್ರವಲ್ಲದೆ ರೋಗದ ಚಿಕಿತ್ಸೆ ವೆಚ್ಚ, ತರಬೇತಿ(ರೋಗ ಪೀಡಿತ ಕಾರ್ಮಿಕರ ಬದಲಾವಣೆಯಿಂದ), ಅನಾರೋಗ್ಯ ವೇತನ ಮತ್ತು AIDS ಅನಾಥರಿಗೆ ಉಪಚಾರ ಇತ್ಯಾದಿಗಳಿಂದ ವೆಚ್ಚ ಹೆಚ್ಚಿದಲ್ಲಿ ಪರಿಣಾಮ ಇನ್ನಷ್ಟು ಗಂಭೀರವಾಗಬಹುದು.
ಜೊತೆಗೆ ವಯಸ್ಕರ ಮರಣದ ಸಂಖ್ಯೆ ಕ್ಷಿಪ್ರಗತಿಯಲ್ಲಿ ಏರುವುದರಿಂದ ಜವಾಬ್ದಾರಿ ವರ್ಗಾವಣೆಯಾಗುತ್ತದೆ ಮತ್ತು ಅನಾಥರ ಉಪಚಾರದ ವಿಷಯದಲ್ಲಿ ಅವರ ಕುಟುಂಬಗಳು ಸರ್ಕಾರವನ್ನು ಟೀಕಿಸುತ್ತವೆ.[೧೫೩]
AIDSನಿಂದಾಗಿ ಒಂದು ಮನೆಯಲ್ಲಿ ಆದಾಯದ ನಷ್ಟವಾಗುತ್ತದೆ ಮತ್ತು ಆರೋಗ್ಯ ವಿಷಯದಲ್ಲಿ ವೆಚ್ಚ ಮಾಡುವುದು ಹೆಚ್ಚುತ್ತದೆ. ಆದಾಯದ ಕೊರತೆಯಿಂದಾಗಿ ವೆಚ್ಚದಲ್ಲಿ ಇಳಿಮುಖವಾಗುತ್ತದೆ, ಅಲ್ಲದೆ ನಂತರ ಮನೆಮಂದಿ ಶಿಕ್ಷಣದ ಬದಲು ಆರೋಗ್ಯ ಮತ್ತು ಅಂತ್ಯಕ್ರಿಯೆಗೆ ವೆಚ್ಚ ಮಾಡುವಂತಾಗುತ್ತದೆ. ಇತರ ಮನೆಯವರ ವೈದ್ಯಕೀಯ ವೆಚ್ಚಕ್ಕೆ ಹೋಲಿಸಿದಲ್ಲಿ, ಒಬ್ಬ HIV/AIDS ರೋಗಿಯನ್ನು ಹೊಂದಿರುವ ಮನೆಯವರು ದುಪ್ಪಟ್ಟು ವೆಚ್ಚ ಮಾಡಬೇಕಾಗಿ ಬರುತ್ತದೆ ಎಂಬುದನ್ನು ಕೋಟ್ ಡಿ'ಐವೊರ್‌ನಲ್ಲಿ ನಡೆಸಿದ ಅಧ್ಯಯನ ತೋರಿಸಿದೆ.
ಧರ್ಮ ಮತ್ತು AIDS
ಧರ್ಮ ಮತ್ತು AIDS ವಿಷಯ ಕಳೆದ ಇಪತ್ತು ವರ್ಷಗಳಿಂದ ದೊಡ್ಡ ವಿವಾದವಾಗಿ ಪರಿಣಮಿಸಿದೆ, ಏಕೆಂದರೆ ಅನೇಕ ಪ್ರಮುಖ ಧಾರ್ಮಿಕ ಮುಖಂಡರು ಕಾಂಡೊಮ್‌ಗಳ ಬಳಕೆಯನ್ನು ವಿರೋಧಿಸಿ ಸಾರ್ವಜನಿಕವಾಗಿ ಹೇಳಿಕೆ ನೀಡಿದ್ದಾರೆ. ಆದರೆ ಈ ಸಾಂಕ್ರಾಮಿಕ ರೋಗಕ್ಕೆ ಕಡಿವಾಣ ಹಾಕಲು ಸದ್ಯಕ್ಕೆ ಕಾಂಡೊಮ್‌ಗಳ ಬಳಕೆಯೊಂದೇ ಮಾರ್ಗ ಎಂಬುದು ವಿಜ್ಞಾನಿಗಳ ಅಂಬೋಣ.
ಜಾಗತಿಕ ಆರೋಗ್ಯ ಪಾಲನೆ ಸೇವೆಗಳಲ್ಲಿ ಧಾರ್ಮಿಕ ಸಂಘಟನೆಗಳ ಪಾಲ್ಗೊಳ್ಳುವಿಕೆ ಮತ್ತು ಜಾತ್ಯಾತೀತ ಸಂಘಟನೆಗಳಾದ UNAIDS ಮತ್ತು ವಿಶ್ವ ಆರೋಗ್ಯ ಸಂಸ್ಥೆಯೊಂದಿಗೆ ಸಹಯೋಗ ಮುಂತಾದ ಇತರ ವಿಷಯಗಳನ್ನು ವಿವಾದ ಒಳಗೊಂಡಿದೆ
